2 Cronicas 25 - Samarenyo Meaning-Based Bible (1984)（MBBSAM）

Naghadi han Juda hi Hadi Amasias(2 Hadi 14:2-6)

1Baynte singko an panuigon ni Amasias han kahimo niya nga hadi ngan naghadi hiya hin 29 ka tuig ha Jerusalem. An iroy niya amo hi Joadan nga taga-Jerusalem.

2Ginbuhat niya an nakakalipay ha Ginoo, kundi diri gud kinasingkasing.

3Han marig-on na gud an iya gahom ginpatay niya an mga opisyal nga nagpatay han iya amay.

4Kundi waray niya pagpataya an ira mga anak kay ginsunod niya an iginsugo han Ginoo dida han Balaod ni Moises: “Diri papatayon an mga kag-anak tungod han mga sala nga ginbuhat han ira mga anak, ngan diri papatayon an mga anak tungod han mga sala nga ginbuhat han ira mga kag-anak; papatayon in tawo tungod han iya kalugaringon nga sala.”

Nakig-away han Edumea(2 Hadi 14:7)

5Gintindog nga mga hugpo hin kasondalohan ni Hadi Amasias an ngatanan nga kalalaken-an han Juda ug Benjamin sumala han hugpo hin mga panimalay nga nagsasakop ha ira, ngan ginbutangan hin mga opisyal hin pagdumara hin hugpo nga tinagyukot ka tawo ngan mga hugpo nga tinaggatos ka tawo. Lakip hini an ngatanan nga kalalaken-an nga 20 ngadto ha igbaw an panuigon nga 300,000 ngatanan. Mga pinili hira nga mga sondalo, nga andam hin pakiaway ngan batid maggamit hin mga bangkaw ngan mga taming.

6Labot hini nagsuhol hiya hin 100,000 nga mga sondalo nga taga-Israel nga binaydan hin mga 4,000 ka kilo nga salapi.

7Kundi kinmadto han hadi in manaragna ngan nagsiring ha iya, “Ayaw paupda ha imo ini nga mga sondalo nga Israelita. Diri upod an Ginoo hini nga mga tawo nga tikang ha Amihanan nga Ginhadian.

8Bangin ka makahunahuna nga makakahimo hira nga magmakusog ka ha pag-awayan, kundi an Dyos amo an may gahom hin paghatag hin pagdarag-an o kapirdehan, ngan ipapapirde ka niya han imo mga kaaway.”

9Ginpakianhan ni Amasias an manaragna, “Kundi ano na man adto ngatanan nga salapi nga iginbayad ko na para ha ira?”

Binmaton an manaragna, “Makakahatag ha imo an Ginoo hin labaw pa han imo nahatag!”

10Sanglit ginpalakat ngan ginpauli ni Amasias an sinuholan nga mga sondalo. Tungod hini nanguli ini hira nga duro an kasina ha mga tawo han Juda.

11Nagmaisog hi Amasias ngan gindara niya an iya kasondalohan ngadto ha Kahamub-an Asin. Didto nakig-away hira ngan ginpatay in 10,000 nga mga sondalo nga Edomitanhon

12ngan ginbihag in lain nga 10,000. Gindara nira an mga bihag ngadto ha bawbaw han umpas didto ha syudad han Sela ngan ginhulog hira, sanglit nagkamamatay hira didto han kababtoan ha ubos.

13Hito ngahaw nga panahon an mga syudad han mga taga-Juda nga nabubutnga han Samaria ug Betoron ginsulong han mga sondalo nga Israelita nga waray paupda ni Amasias ngadto ha pag-awayan; ira ginpatay in 3,000 nga mga tawo ngan ira ginbihag in damo nga mga tinikas.

14Han pagbalik na ni Amasias tikang han pakadaog niya han mga Edomitanhon, gindara han pagbalik niya an ira mga diyosdiyos, iginpahimutang ini, ginsingba, ngan gintuboran ini hin insyenso.

15Nakapasina ini han Ginoo, sanglit nagsugo hiya hin manaragna ngadto kan Amasias. Nagpakiana an manaragna, “Kay ano nga ginsingba mo in langyaw nga kadiyosan ngan diri ngani makakatalwas han ira kalugaringon nga mga tawo tikang han imo gahom?”

16Sinmagbang dayon hi Amasias, “Kakan-o ka pa namon paghimoa nga magsaragdon han hadi? Hunong na pagyinakan; kon diri ka buot mamatay!”

Hinmunong an manaragna kundi nagsiring anay, “Yana maaram ako nga naglarang na an Dyos hin pagpukan ha imo kay ginbuhat mo ini ngatanan ngan waray ka mamati han akon sagdon.”

Nakig-away han Israel hi Hadi Amasias(2 Hadi 14:8-20)

17Naglarang kontra han Israel hi Hadi Amasias ngan an iya mga magsaragdon. Niyan nagpadara hiya hin mensahe ngadto kan Hadi Joas han Israel nga anak ni Joacas nga apo ni Jehu, hin pag-ayat ha iya hin pakiaway.

18Ginpadara ni Joas kan Amasias ini nga baton: “Makausa nagpadara hin mensahe ngadto hin sidro in sapinit ha Kabukiran Libano: ‘Ipaasawa ha akon anak nga lalake an imo anak nga babaye.’ Linmabay in ihalas nga mananap ngan gintamaktamakan an tanom nga sapinit.

19Yana Amasias, naghihinambog ka nga imo ginpirde an mga Edomitanhon, kundi ginsasagdonan ko ikaw nga magpabilin ka ha imo balay. Kay ano nga nag-uugsong ka hin kasamok nga magdadara la hin karat-an ha imo ngan ha imo mga tawo?”

20Kundi nagpakabungol la hi Amasias. Kaburot-on ini han Dyos nga pirdehon hi Amasias kay ginsingba niya an mga diyosdiyos nga Edomitanhon.

21Sanglit nakig-away hi Hadi Joas han Israel kan Hadi Amasias han Juda. Nagkatapo hira didto ha Betsemes ha Juda,

22napirde an kasondalohan nga mga taga-Juda, ngan namalagiw an mga sondalo ngadto han ira mga balay.

23Ginbihag ni Joas hi Amasias ngan gindara ini hiya ngadto ha Jerusalem. Didto ginruba ni Joas an pader han syudad tikang ha Ganghaan Efraim ngadto han Kanto Ganghaan, nga mga 200 ka metros an kahirayo.

24Gindara han pagbalik niya ngadto ha Samaria, an ngatanan nga bulawan ug salapi ha Templo, an mga garamiton han Templo nga ginbantayan han mga tulin ni Obed Edom, ngan an mga manggad han palasyo. Gindara liwat niya in mga tawo nga ira hindakpan.

25Nabuhi pa hi Amasias han Juda hin 15 pa ka tuig tikang mamatay hi Hadi Joas han Israel.

26Nahisurat an iba pa nga mga butang nga ginbuhat ni Amasias tikang ha tinikangan ngadto ha kataposan han iya paghadi dida han Kasaysayan han Kahadian han Juda ug Israel.

27Tikang pa han panahon han pagsupil niya han Ginoo, may-ada na naghunahuna hin pagkontra ha iya didto ha Jerusalem. Ha kataposan pinmalagiw hiya ngadto ha syudad han Laquis, kundi ginsunod hiya han iya mga kaaway ngan ginpatay hiya didto.

28Isinakay an iya lawas dida hin kabayo ngadto ha Jerusalem, ngan iginlubong hiya didto han hadianon nga mga lubnganan ha Syudad ni David.