2 Macabeo 15 - Samarenyo Meaning-Based Bible (1984)（MBBSAM）

Mapintas an Larang ni Nicanor

1Hinbaroan ni Nicanor nga nakadto hira Judas ngan han iya mga tawo han katunaan han Samaria, sanglit naghunahuna hiya hin pagsulong ha ira dida hin usa nga Adlaw nga Iparahuway, diin mahihimo niya ini hin waray kataragman para ha iya ngahaw.

2An mga Judiyo nga ginpirit hin pag-upod han iya kasondalohan nakimalooy ha iya nga diri niya pagbuhaton in sugad kamapintas ngan sinalbahis nga butang, kundi pagtahoron lugod niya an adlaw nga ginpasidunggan han Dyos nga nakita han ngatanan ngan ginhimo niya nga labi hin kabaraan han ngatanan nga mga adlaw.

3Niyan nagpakiana hi Nicanor, an labi hin kabastos nga binuhat ha tuna, kon may-ada ba labaw nga punoan ha langit nga nagsugo ha ira hin pagpasidungog han Adlaw nga Iparahuway.

4Ngan binmaton an mga Judiyo, “Oo, an buhi nga Ginoo nga naghahadi ha langit, nagsugo ha amon nga pagpasidunggan an Adlaw nga Iparahuway.”

5Kundi binmaton hi Nicanor, “Amo ako an punoan ha tuna, ngan nagsusugo ako ha iyo hin pag-andam han iyo mga hinganiban ngan pagsugot han mga sugo han hadi.” Kundi waray hiya makahimo hin pagpadayon han iya waray kalooy nga nahunahunaan.

Gin-andam ni Judas hin Pakig-away an Iya Kasondalohan

6Ha iya kamapahitas-on naghambog hi Nicanor nga magtitindog hiya hin usa nga monumento hin pagpasidungog han iya pagdarag-an kontra kan Judas.

7Kundi tinmapod gud hi Judas nga an Ginoo mabulig ha iya,

8sanglit iya gin-aghat an iya mga tawo nga diri hira mahadlok han kaaway. Iya gindasig hira hin pagpahinumdom kon gin-unan-o han Labi Kamakagarahum hin pagbulig ha ira han naglabay nga mga panahon ngan pagtapod nga ihahatag liwat ha ira an pagdarag-an yana nga panahon.

9Iya ginbag-o an ira paglaom pinaagi hin pagbasa ha ira tikang han Balaod ngan han mga Manaragna ngan pinaagi hin pagpahinumdom ha ira han mga pag-awayan nga ira gindaog.

10Han andam na hin pakig-away an iya mga tawo, iya igintutdo ha ira an angay nira pagbuhaton ngan iya liwat ginsumatan hira nga diri gud matataporan an mga Hentil, kay waray hira magtuman han ira mga ginkasarabotan hin kalinaw.

11Iya ginsangkap an ngatanan niya nga mga tawo, diri pinaagi hin pagdasig ha ira nga asay nira taporan an mga taming ngan mga bangkaw, kundi hin pag-aghat ha ira pinaagi hin mga pulong nga nakakadasig. Iya liwat ginparig-on an ira pagtapod pinaagi hin pagsaysay ha ira hiunong han iya inop, nga usa nga panan-awon nga ira kasasarigan.

12Iya ginsumatan hira nga iya hinkit-an dida hin usa nga panan-awon hi Onias, an Labaw nga Padi hadto anay, ito nga gamhanan ngan makatarag-ob nga tawo, nga mapinaubsanon ngan makiangayon, nga usa nga bantogan nga mamurulong ngan gintutdoan tikang ha pagkabata kon uunanhon hin pag-ukoy hin usa nga kinabuhi nga maupay an ginawian. Hi Onias nagbayaw han iya mga kamot ngan nag-aampo para han bug-os nga Judiyo nga nasod.

13Niyan hinkit-an ni Judas in usa nga makaaramdok ngan ubanon na nga tawo nga may-ada dako nga dungog ug gahom.

14Nagsiring hi Onias, “Amo ini hi Jeremias, an manaragna han Dyos, nga nahigugma han iya igkasi mga Judiyo ngan naghahalad hin mga pag-ampo para ha aton ngan para han Jerusalem, an baraan nga syudad.”

15Ngan ginbayaw ni Jeremias an iya tuo nga kamot ngan gintagan hi Judas hin usa nga bulawan nga espada, upod an pagsiring,

16“Usa nga regalo tikang han Dyos ini nga baraan nga espada. Karawata ini ngan puoha an imo mga kaaway.”

17An maupay nga pagpahimutang han mga pulong nga iginhimangraw ni Judas nakapaisog han tagsatagsa ngan nakapadasig han mga batan-on hin pakig-away sugad hin mga hamtong na hira. Nakada ha kataragman an ira syudad, an ira tuloohan, ngan an ira Templo. Sanglit nagkaarabuyon an mga Judiyo hin diri pagkarag hin panahon, kundi hin maisog nga pagsulong kontra han kaaway ngan ha maisog nga pagtubyan han ira kapalaran dida hin tag-usaay nga pakig-asdang ha pag-awayan.

18Larolabaw an ira kabaraka han baraan nira nga Templo kay han ira kabaraka han kalugaringon nira nga mga panimalay ngan mga kauropdan.

19Ngan duro gud an kabaraka han mga tawo nga nagpabilin didto ha Jerusalem kon ano an dadangatan han araway didto han mahawan nga kapatagan.

Napirde ngan Namatay hi Nicanor

20Naghinulat an ngatanan hin pagkita kon hin-o an magdadaog han araway. Tikahirani na an kaaway nga kasondalohan nga ginpapaluyoan han dikabayo nga mga sondalo, ngan upod an ira mga elepante nga iginbutang ha importante nga mga dapit han kapatagan.

21Hinkit-an ni Judas Macabeo an damo nga kaaway nga kasondalohan, an magkalainlain nira nga mga hinganiban, ngan an mag-isog nira nga mga elepante. Niyan iya ginbayaw an iya mga kamot ngadto ha langit ngan nag-ampo hiya han Ginoo nga nagbubuhat hin mga milagro, kay maaram hiya nga ginpapadaog han Ginoo adton mga takos hini, diri adton mga may-ada makusog nga kasondalohan.

22Nagsiring hi Judas: “O Ginoo, han hadi pa han Juda hi Ezequias, nagsugo ka han imo anghel nga nanmatay hin 185,000 ka tawo ni Hadi Senaquerib.

23Yana, O Ginoo han langit, sugoa na liwat an imo maupay nga anghel basi mangurog hin kahadlok an amon mga kaaway.

24Pinaagi han dako mo nga gahom puoha ini nga mga tawo, nga nagnanamastamas ha imo, ngan kinmanhi hin pagsulong han pinili mo nga mga tawo.” Ginhuman ni Judas an iya pag-ampo.

25Nagpadayon hin pagtikahirani an kasondalohan ni Nicanor ha tunog hin mga trompeta ngan mga kanta hin pag-awayan,

26kundi kinmadto ha pag-awayan hira Judas ngan han iya mga tawo nga nagtatawag han Dyos hin pakibulig.

27Sanglit pinaagi hin pakig-away han ira mga kamot ngan pag-ampo ngadto ha Dyos dida han ira mga kasingkasing, pinanmatay han mga Judiyo in kapin hin 35,000 han mga kaaway. Hin pagkadako han ira pagpasalamat tungod han tambulig nga ira kinarawat tikang han Dyos!

28Han kahuman na han araway ngan samtang nagtitipauli na hira nga nagsasaurog han ira pagdarag-an, ira hinkit-an hi Nicanor nga sangkap pa hin bug-os nga hinganiban, nga nalunay nga patay na didto han patag han pag-awayan.

29Niyan pinaagi hin dagko nga mga goliat ira gindayaw an Ginoo ha kalugaringon nira nga yinaknan.

30Hi Judas Macabeo nga dayuday nakig-away ha bug-os niya nga lawas ug kalag para han igkasi niya mga Judiyo, nga waray gud kawad-i han pagkamaunongon han bungto ha iya pagkabatan-on, nagsugo han iya mga tawo nga pugoton an ulo ngan an tuo nga butkon ni Nicanor ngan dad-on ini ngadto ha Jerusalem.

31Han pag-abot nira ha syudad, iya gintirok an ngatanan nga mga tawo, iginpahimutang an kapadian ha atubangan han altar, ngan ginpatawag an mga tawo didto han balwarte.

32Iya iginpakita ha ira an ulo han maraogdaog nga Nicanor ngan an butkon nga ginbayaw hito nga maraot nga tawo kontra han baraan nga Templo han Dyos nga Labi Kamakagarahum.

33Niyan iya gin-utod an dila hito nga diri dyosnon nga tawo, upod an pagsaad nga itutubong ini hin tinalagudti ngadto han katamsihan, ngan ginbitay an iya ulo didto ha tugbang han Templo, nga usa nga pagpamatuod nga amo ini an iya dinangatan tungod han iya pagkalurong.

34Hinmangad ha langit an ngatanan nga nakadto ngan nagdayaw han Ginoo nga nagpadayag han iya gahom, ngan nagpanalipod basi diri pagnamastamasan an iya Templo.

35Ginbitay ni Judas an ulo ni Nicanor tikang han pader han kota nga usa nga dayag nga tigaman para han ngatanan han tambulig han Dyos.

36Ginkauruyonan han ngatanan nga diri gud hingalimtan ini nga adlaw, kundi pagsaurogon ha kada tuig dida han gab-i han Adlaw ni Mardoqueo, nga amo an ika-13 nga adlaw han ika-12 nga bulan, nga gintawag Adar ha Aramaico.

Pangataposan

37Amo ito an dinangatan ni Nicanor. Tikang hito nga panahon nagpabilin an syudad han Jerusalem ha kamot han mga Judiyo, sanglit tataposon ko dinhe an akon susumaton.

38Kon maupay ini nga kasurat ngan klaro kaupay, nalilipay ako; kon diri man ngan diri makalilipay pagbasahon, ginbuhat ko gihapon tubtob han akon mahimo.

39Maaram kita nga diri maupay pag-imnon in bino o tubig la, kundi an bino nga ginsalaktan hin tubig nahihimo nga manamit ngan marasa nga irimnon. Amo man gihapon an usa nga maupay nga susumaton nga maupay hin pagkasurat nakakaliaw hadton mga nagbabasa hini. Dida hini akon ini tataposon.