Kinaadman ni Solomon 6 - Samarenyo Meaning-Based Bible (1984)（MBBSAM）

May-ada Katungdanan an mga Punoan

1Sanglit, kamo nga kahadian, kamo nga mga punoan han bug-os nga kalibutan, pamatii an akon igsisiring, ngan pagtun-i niyo.

2Nagdudumara kamo hin damo nga mga tuna ngan naparayaw kamo nga damo in mga tawo nga sakop han iyo pagkahadi,

3kundi iginhatag ha iyo han Gihahataasi nga Ginoo ini nga pagburot-an. Panginginanoon niya kon ano an iyo nabuhat ngan kon ano an iyo ginhuhunahuna hin pagbuhat.

4Naghahadi kamo para han Dyos ngan han iya ginhadian, ngan kon diri matadong an iyo pamunoan, kon diri kamo magtahod han balaod, kon diri kamo mag-ukoy hin kinabuhi sumala han kaburot-on han Dyos,

5mag-aantos kamo hin tigda ngan makalilisang nga sirot. Mahigpit gud an paghukom hadton aada ha gahom.

6Bangin pasayloon tungod hin kalooy an kasaypanan han yano nga mga tawo, kundi maatubang hin mahigpit nga paghukom adton aada ha gahom.

7Diri nahadlok hin bisan hin-o an Ginoo han ngatanan, bisan magdiunan-o hin kagamhanan niya. Hiya ngahaw an naghimo han tagsa ka tawo, ma gamhanan hiya o ma yano, ngan waray pinalabi han paghatag ha ngatanan,

8kundi mahiruhigpit an iya paghukom han panggawi han mga punoan.

9Para ini ha iyo, mga gamhanan nga kahadian, nga akon ginsusurat ini nga mga pulong, basi mahibaro kamo hin pagbuhat dida hin kamaaram ngan hin paglikay hin kasaypanan.

10Baraan ini nga mga butang, ngan kon iyo ini paggawion ha baraan nga paagi, pag-iisipon kamo ngahaw nga mga baraan. Kon hinbaroan niyo ini nga pagturon-an, makakahimo kamo hin pagpanalipod ha iyo ngahaw didto han Paghukom.

11Sanglit himoa niyo an akon pagturon-an nga iyo manggad ngan kalipay, ngan matututdoan kamo hin maupay.

May Kapulsanan an Kinaadman

12Malamrag an Kinaadman ngan diri masirom; masayonay hiya hiagian hadton mga nahigugma ngan nagbibiling ha iya.

13Madali hiya magpakilala ha iya ngahaw hadton bisan hin-o nga naungara hiya.

14Bangon hin sayo ha kaagahon hin pagbiling ha iya, ngan waray nimo kasurok-an, hiaagian mo hiya nga nalingkod dida han imo portahan.

15An pamalandong han Kinaadman amo an pakaangkon hin hingpit nga pagsabot. Kon pangitaon mo hiya diri maiha makakaagi ka hin murayaw nga panhunahuna,

16kay mamimiling hiya hadton mga takos ha iya, ngan hiaagian ka niya bisan kon hain ka. Maloloy-on hiya ngan maupod hiya ha imo ha tagsa mo nga panhunahuna.

17Magtitikang an Kinaadman kon kinasingkasing an imo karuyag hin pag-aram. An pag-ungara han Kinaadman amo an paghigugma ha iya;

18an paghigugma ha iya amo an pagtuman han iya mga balaod; an pagtuman han iya mga balaod amo an pakaseguro han pagkawaray kamatayon,

19an pagkakawaray kamatayon makakapaharani ha imo ngadto han Dyos.

20An pag-ungara han Kinaadman makakaandam ha imo hin paghadi hin usa nga ginhadian.

21Sanglit kamo nga naghahadi hin mga nasod, kon ginpapakamahal niyo an iyo mga trono ngan an mga tigaman hin gahom, pagpasidunggi an kinaadman basi makaghadi kamo ha kadayonan.

Karuyag hi Solomon Magpaangbit han Iya Kinaadman

22Igsusumat ko ha iyo kon ano an Kinaadman ngan kon gin-unan-o an kahimo niya. Diri ako magtatago hin bisan ano. Pagsusulsugon ko an iya kasaysayan tikang han tinikangan ngan ipadadayag ko ha ngatanan an paghibaro hiunong ha iya. Diri ko pagpapasibay-an an bisan ano nga bahin han kamatuoran.

23An aw-anon nga ungara hin pagbantay han kalugaringon ko nga hibaro diri makakapugong ha akon, kay an Kinaadman ngan an kaawa diri magkakausa.

24Kon darudamo an mga tawo nga may-ada Kinaadman, diri na makulba hin pag-ukoy dinhe ha kalibutan. An masinabtanon nga hadi amo an matapod nga sinarigan han iya mga tawo.

25Sanglit pag-admi an akon igtututdo ha iyo, ngan makakagpahimulos ka hini.