Deuteronomio 19 - Samarenyo Meaning-Based Bible (1984)（MBBSAM）

May mga Syudad nga Arayopan(Num. 35:9-28; Jos. 20:1-9)

1“Katapos pagpuoha han Ginoo nga iyo Dyos han mga tawo kanay tuna ihinahatag niya ha iyo, ngan katapos niyo makuha an ira mga syudad ngan mga balay, ngan mag-ukoy na kamo didto,

2-3pagtuloa niyo ka bahin an katunaan, nga an kada usa ka bahin may usa nga syudad nga masayunay la niyo maabot. Niyan an tawo nga makamatay, makakapalagiw ngadto ha usa hini nga mga syudad basi mapanalipdan hiya.

4Kon in usa ka tawo makamatay hin diri tinuyo hin tawo nga diri niya kaaway, makakapalagiw hiya ngadto ha bisan hain hini nga mga syudad ngan matatalwas hiya.

5Pananglitan, may duha ka tawo nga makadto ha kagurangan pagpulod hin kahoy, ngan han nagpupulod hin kahoy an usa ha ira, nahulso han pulo an parakol niya ngan nakamatay han iya kaupod, makakaayop hiya ngadto han usa hini nga mga syudad ngan matatalwas hiya.

6Kon uusa la an syudad, bangin hirayo ini hin duro, ngan mahiabtan hiya han uropod nga may katungod hin pagbulos para han namatay, ngan ha iya kasina, makamatay hiya hin tawo nga waray sala. Diri man ngani tinuyo nga iya pakamatay hin usa ka tawo nga diri niya kaaway.

7Amo ito nga nagsusugo ako ha iyo hin paggahin hin tulo nga mga syudad.

8“Kon pahiluagon na han Ginoo nga iyo Dyos an iyo katunaan sumala han iya iginsumat han iyo kaapoy-apoyan, ngan ihatag na ha iyo an ngatanan nga tuna nga iya iginsaad,

9niyan magpipili kamo hin tulo pa nga mga syudad. (Ighahatag niya ha iyo ini nga tuna kon pagbuhaton niyo an ngatanan nga akon iginsusugo ha iyo yana nga adlaw, ngan kon paghigugmaon niyo an Ginoo nga iyo Dyos, ngan mag-ukoy kamo hin kinabuhi subay han iya mga pagturon-an.)

10Buhata ini niyo basi diri magkamatay an mga tawo nga waray sala ngan basi diri kamo magin salaan hin pagpatay ha ira didto han tuna nga ighahatag ha iyo han Ginoo.

11“Kundi pananglit tuyoon hin usa ka tawo hin pagpatay han iya kaaway, ngan katapos kumalagiw hiya ngadto hin usa hini nga mga syudad basi panalipdan hiya,

12dida hini nga higayon, ipakukuha hiya han mga pangulo han iya kalugaringon nga bungto ngan itutubyan hiya ngadto han uropod nga may katungod hin pagbulos hin pagpatay, basi patayon hiya.

13Ayaw niyo kalooyi hiya. Kuhaa tikang ha Israel ini nga parapamatay basi maghingaupay kamo.

Ginpahimatngon hin Diri Pagbalhin han Kadaan nga mga Pag-ultan

14“Ayaw niyo pagbalhina an pag-ultan han tuna han imo amyaw nga gintindog hin maiha na didto han tuna nga ihahatag ha iyo han Ginoo nga iyo Dyos.

Ginpahimatngon hin Diri Pagsaksi hin Buwa

15“Diri igo in usa la nga saksi hin pagsirot hin tawo hiunong hin pakasala; kinahanglan in duha o tulo nga mga saksi para hin pagpamatuod nga salaan in usa ka tawo.

16Kon magtinguha in usa ka tawo hin pagdaot hin iba nga tawo pinaagi hin pagbutangbutang ha iya hin sala,

17kinahanglan kumadto hira nga duha han usa nga dapit hin pagsingba ngan paghukman hira han kapadian nga mga maghurukom nga natorno hito nga takna.

18Pag-uusisahon hin maupay han mga maghurukom an kalipongan; ngan kon an tawo nagsumbong hin buwa kontra han iya igkasi Israelita,

19makarawat hiya han kastigo nga kakarawaton unta han iginsumbong nga tawo. Ha sugad hini nga paagi makukuha niyo ini nga karat-an.

20Niyan hibabaroan han ngatanan an nahinabo; mahahadlok hira ngan waray na gud magbubuhat hin sugad nga karat-an.

21Ha sugad nga mga kalipongan, ayaw pagpakita hin pagkalooy; an kinabuhi babaydan hin kinabuhi, an mata babaydan hin igkasi mata, an ngipon hin igkasi ngipon, an kamot hin igkasi kamot, ngan an tiil hin igkasi tiil.