1 Cronicas 12 - Samarenyo Meaning-Based Bible (1984)（MBBSAM）

An mga Sondalo nga Kabulig ni David Tikang han Tribo ni Benjamin

1Didto hi David pag-ukoy ha Siclag, an bungto nga iya kinadtoan han iya pagkalagiw kan Hadi Saul. Tinmampo ha iya didto in mga batid ngan katataporan nga mga sondalo,

2mga sakop han tribo ni Benjamin nga banay liwat ni Saul. Ini nga mga sondalo nga hag-id maggamit hin pana ngan maglabyong hin mga bato, bisan wala ug tuo nga kamot.

3-7Hira Ahieser ug Joas, an mga anak ni Sama nga taga-Gabaa, amo an ira mga pangulo. Amo ini an mga sondalo:

hira Jesiel ug Pelet, nga mga anak ni Asmot

hira Berca ug Jehu nga mga taga-Anatot

hi Ismaias nga taga-Gabaon, usa nga bantogan nga sondalo ngan usa han mga pangulo han hugpo han “Traynta”

hira Jeremias, Jahasiel, Joanan, ug Jerabad nga mga taga-Gaderot

hira Elusai, Jeremot, Baalia, Samaria, ug Safatias nga taga-Haruf

hira Elcana, Jesia, Ascarel, Joezer, ug Jesbaam nga tulin ni Cora

hira Joela ug Sabadias nga mga anak ni Jeroboam nga taga-Kedor

An mga Sondalo nga Kabulig ni David Tikang han Tribo ni Gad

8Amo ini an mga ngaran han mga bantogan ngan mga mag-aram nga mga sondalo tikang han tribo ni Gad nga tinmampo han mga sondalo ni David han nakadto hi David han balwarte ha kamingawan. Mga batid ini hira hin paggamit hin taming ug mga bangkaw, ngan mga mag-isog ini hira sugad hin mga liyon ug maglaksi ini hira sugad han mga ihalag nga bugsok.

9-13Amo ini an ira pagkasunodsunod: Ezer (an pangulo nira), Obadias, Eliab, Masmana, Jeremias, Eti, Eliel, Johanan, Elizebed, Jeremias, ug Macbanay.

14An iba hini nga mga sondalo tikang han tribo ni Gad ginhimo nga mga higtaas nga ranggo nga opisyal nga nagmangulo hin tinagyukot nga mga tawo; an barobata nga mga opisyal ginhimo nga mga pangulo hin tinaggatos nga mga tawo.

15Dida han syahan nga bulan han tuig, ha panahon nga nabaha an Salog Jordan, tinmabok hira han salog, ginsarang nira an mga tawo nga naukoy didto han mga kahamub-an ha sinirangan ug katundan nga dapit han salog.

An mga Sondalo nga Kabulig ni David Tikang kan Benjamin ug Juda

16May-ada usa ka hugpo hin mga tawo tikang han mga tribo nira Benjamin ug Juda nga kinmadto han balwarte nga inuokyan ni David.

17Gintapo hira ni David ngan ginsiring, “Kon an iyo pagkanhi pakigsangkay ngan pagbulig ha akon, akon ta kamo kakarawaton. Tampo kamo ha amon! Kundi kon an iyo tuyo amo an paglingo ha akon ug pagtubyan ha akon ngadto han akon mga kaaway, bisan kon waray ko hunahuna hin pagraogdaog ha iyo, makakasabot an Dyos han amon mga ginikanan ngan kakastigohon kamo niya.”

18Kinmunsad an espiritu han Dyos ngada kan Amasai, nga pangulo han “Traynta,” ngan nagsiring hiya,

“David, anak ni Isai, imo kami mga sondalo!

Magmainuswagon unta ikaw ug adton mga nabulig ha imo!

An Dyos naugop ha imo.”

Kinarawat hira ni David ngan ginhimo hira nga mga opisyal han iya kasondalohan.

An mga Sondalo nga Kabulig ni David Tikang kan Manases

19May-ada mga sondalo tikang han tribo ni Manases nga tinmampo kan David dida han pagsulong niya ug han mga Filisteohanon kontra kan Hadi Saul. Ha pagkatinuod waray hi David magbulig han mga Filisteohanon kay an ira mga hadi nahadlok nga paglingoon hira ni David ngan igtubyan hira ngadto han ira una nga agaron, hi Hadi Saul; sanglit ginpabalik hiya ngadto ha Siclag.

20Amo ini an mga sondalo nga tinmampo kan David dida han pag-uli na niya; hira Edna, Josabad, Jedihel, Micael, Josabad, Eliu, ug Salati. Mga opisyal ini hira hin tinagyukot nga mga sondalo didto han tribo ni Manases.

21Gintudlok liwat hira ni David nga mga opisyal han iya mga kasondalohan kay mga bantogan hira nga mga sondalo. Nahimo liwat hira nga mga opisyal han kasondalohan han Israel.

22Kon haros kada adlaw may-ada bag-o nga kalalaken-an nga tinmampo han hugpo han kasondalohan ni David, sanglit nagtikadamo an iya hugpo hin kasondalohan.

An Lista han mga Kasondalohan ni David

23-37Han nakadto hi David ha Hebron, damo nga mga mag-upay nga sondalo an tinmampo han iya hugpo hin kasondalohan ngan amo ini hira an naghimo ha iya nga hadi, liwan kan Saul sumala han iginsaad han Ginoo. An ira kadamo amo inin masunod:

Juda: 6,800 nga mga tawo, sangkap hin mga taming ug bangkaw;

Simeon: 7,100 nga mga tawo nga maupay an katutdo hin pakiaway;

Levi: 46,000 nga mga tawo;

Sakop ni Joyada, tulin ni Aaron: 3,700 nga mga tawo;

Kauropdan ni Sadoc, usa nga maisog nga batan-on: 22 nga mga pangulo;

Benjamin (tribo ngahaw ni Saul): 3,000 nga mga tawo (an kaurog han mga tawo ni Benjamin inmugop kan Saul);

Efraim: 20,800 nga bantogan nga mga tawo dida han ira mga banay;

Katundan nga Manases: 18,000 nga ginpili nga mga tawo nga kinmadto kan David basi himoon hiya nga hadi;

Isacar: 200 nga mga pangulo, upod an mga tawo nga ira ginpapangulohan (ini nga mga pangulo maaram kon ano an sadang buhaton han Israel ngan kon san-o an maupay nga pagbuhat hini);

Zabulon: 50,000 nga mainugupon ug katataporan nga mga tawo nga andam hin pakig-away, gintutdoan hin paggamit hin bisan ano nga hinganiban;

Neftali: 1,000 nga mga opisyal, upod an ira 37,000 nga mga tawo nga sangkap hin mga taming ug bangkaw;

Dan: 28,600 nga maupay nga tinutdoan nga mga tawo hin pakiaway;

Aser: 40,000 nga mga tawo nga andam hin pakig-away;

Mga tribo ha sinirangan han Jordan (mga tribo nira Ruben, Gad, ug Sinirangan Manases): 120,000 nga mga tawo nga maaram gumamit hin mga hinganiban.

38Ini ngatanan nga mga sondalo nga andam hin pakig-away, kinmadto ha Hebron kay karuyag gud nira nga hi David maghadi han bug-os nga Israel. An iba nga mga tawo han Israel nakig-usa ha ira para hin amo gihapon nga panuyo paghimo kan David nga hadi.

39Didto hira upod kan David sulod hin tulo ka adlaw, nangaon ug nag-irignom hira kay gin-andaman man hira han ira mga igkasi taga-Israel.

40Tikang ha mga higrayo nga dapit sugad han mga amihanan nga tribo ni Isacar, Zabulon, ug Neftali, inmabot an mga tawo nga may-ada dara nga mga kamelyo, asno, kabayo, ug mga baka nga kargado hin mga pagkaon—arina, igos, pasas, bino, ug lana hin olibo. Nagdara liwat hira hin mga irihawon nga mga baka ug karnero. Ini ngatanan ira pagpakita han kalipay han bug-os nga nasod han Israel.