Sirac 13 - Samarenyo Meaning-Based Bible (1984)（MBBSAM）

1Kon kaptan mo an alkitran, mapilit ini ha imo, ngan kon makig-upod-upod ka hin mga tawo nga palabi-labihon, masusugad ka ha ira.

2Ayaw pag-alsa hin butang nga makuri maalsa nimo, ngan ayaw pakig-upod-upod hin mga tawo nga mas riko ngan mas gamhanan pa kay ha imo. Diri mahihimo nga pagtuparon mo an daba ngan an kaldero nga puthaw; mabubuong an daba kon hirantok dida han kaldero.

3Kon makasayop in usa nga riko kontra hin usa ka tawo, makakahimo pa hiya hin pagpakaalo han tawo. Kundi kon an kablas amo an hinsal-an, napipirit hiya pangaro hin pasaylo.

4Gagamiton ka hin usa nga riko samtang makakagpahimulos hiya ha imo, kundi kon magkinahanglan ka ha iya, babayaan ka ngan waray makakabulig ha imo.

5Kaupod mo hiya samtang may-ada mo pa kwarta ngan masingabot hiya ha imo tubtob han kawaray; ha imo.

6Kon magkinahanglan hiya ha imo lilimbongan ka niya han iya mga pahiyom ngan malipayon ngan maloloy-on nga mga pulong. “Ano an imo kinahanglan?” masiring hiya.

7Pakakaonon ka niya tubtob nga maawod ka. Pagkatapos kon makaduha o makatulo ka na niya pagpakaalohi, pagtataw-an ka pa niya. Kon ha orhe magkita pa kamo, mapasangil hiya nga diri hiya nakilala ha imo ngan lalabyan ka la niya.

8Pagbantay nga diri ka mahilisa; mahihimo nga malipayon ka ha imo kalugaringon ngan ha tigda la maaalohan ka.

9Kon dapiton ka ngadto han panimalay hin dako nga pagkatawo bantayi an imo panggios. Niyan susukoton ka hin pagdapita.

10Ayaw papirit hin pagduok ha iya, kay bangin ka la pabay-an niya. Ha luyo nga bahin, ayaw pagpahirayo ha iya basi diri ka niya hingalimtan.

11Ayaw pakasiring nga tupong ka ha iya o nga nasarig ka han ngatnan nga iya iginyayakan. Dida han iyo maiha ngan matinahuron nga hiruhimangraw, panumdom nga ginsasarihan ka niya.

12An tawo nga diri katataporan hin mga sekreto, waray hiya pagkalooy; diri hiya mag-aalang hin pagdaot o pagpapriso ha imo.

13Tipigi an imo mga sekreto ha imo kalugaringon ngan maghirot ka, kay dayuday naglalakat ka ha butnga han kataragman.

15Hinihigugma han tagsa nga binuhat an iya igkasipareho, ngan amo man liwat ini an mga tawo.

16Sugad nga nagpupurundok an amo ngahaw nga igkasipareho nga mga mananap, an mga tawo nakikig-upod-upod hin mga tawo nga igkasipareho niya.

17An makasasala nga tawo diri igkakausa han mainampoon nga tawo sugad nga diri magkakausa an lubo ngan hin usa nga nati nga karnero.

18Diri magkakausa an riko ngan an kablas sugad man an mabangis nga mananap ngan an ayam.

19Sugad nga kinakaon han mga liyon an ihalas nga mga asno ha kamingawan ginraraogdaog man han mga riko an mga kablas.

20An parayawan nga mga tawo nagtatamay han mga magpinaubsanon ngan amo man an binubuhat han mga riko ngadto han mga kablas.

21Kon natutumba in usa nga riko, kinakaptan hiya hin pagpatukdaw han iya kasangkayan, kundi kon natutumba in kablas nga tawo, diri nanginginlabot an iya kasangkayan.

22Kon nagsasayop in usa nga riko, damo an mga tawo an natabang ha iya. Kon magyakan hiya hin kalurongan, tinutuod la hiya gihapon. Kundi kon magsayop in usa nga kablas, binabasol hiya dayon. Bisan maupay an iya ginyayakan, waray gud tawo nga namamati.

23Kon nagyayakan in tawo nga riko, naghihilom an ngatanan ngan gindadayaw hiya nira ngadto ha langit tungod han iya ginyayakan. Kundi kon nagyayakan in tawo nga kablas, nasiring hiya, “Hin-o ito?” Ngan kon hiya nahipapakdol, itinitikwang pa hiya nira.

24Diri maraot an pagkariko kon waray ka pakasala han pag-angkon mo han bahandi. Kundi diri liwat maraot an pagkakablas. An diri natoo han Dyos amo la an nakakahunahuna hini.

25Tikang ha sag-od han imo kasingkasing hisasabotan ha imo bayhon, kon malipayon o mabidoon ka.

26Kon malipayon an imo pagbati, malipayon ka man pagkit-on bisan kon an paghimo hin mga darahonon nagkikinahanglan hin listo nga panhunahuna.