Ezequiel 31 - Samarenyo Meaning-Based Bible (1984)（MBBSAM）

Igintanding an Ehipto hin usa nga Kahoy nga Sidro

1Dida han syahan nga adlaw han ikatulo ka bulan han ika-11 ka tuig han amon pagkabihag, naghimangraw ha akon an Ginoo.

2Nagsiring hiya, “Anak hin tawo, sidnga an hadi han Ehipto ngan an ngatanan niya nga mga tawo:

Hin pagkagamhanan niyo!

Ano in akon ikakatanding ha iyo?

3Sugad kamo hin usa nga sidro didto ha Libano,

Nga may magtahom ngan magrampag nga mga sanga,

Usa nga kahoy nga hitaas hin duro nga naabot ngadto han mga dampog.

4May-ada tubig nga nagpapatubo hini,

Ngan mga salog ha ilarom han tuna nga nagbubuhi hini.

Gintubigan hini an dapit nga tinutugkan han kahoy

Ngan ginpaawas in mga sapa ngadto han ngatanan nga kakahoyan ha kagurangan.

5Tungod nga natubigan ini hin maupay,

Tinmubo ini labaw han iba nga mga kahoy.

Habog ngan madig-on an mga sanga hini.

6Nagsasalag an magkalainlain nga katamsihan dida han mga sangahini;

Nag-aanak an ihalas nga kamanampan ha sirong han mga sanga hini;

Napahuway an mga nasod han kalibutan dida han lindong hini.

7Hin pagkamatahom han kahoy!

Hitaas hin duro, nga may higlaba nga mga sanga.

Naabot an mga gamot hini ngadto ha ilarom han tuna diin may nag-aawas nga mga sapa.

8Waray sidro didto han tanaman han Dyos nga makakatanding hini.

Waray pa gud palotsina nga masugad hin kamarampag,

Ngan waray kahoy nga sikamura nga mahitatanding han iya mga sanga.

Waray gud kahoy didto han kalugaringon nga tanaman han Dyos nga sugad hin kamatahom.

9Ginhimo ko ini nga matahom pagkit-on, nga may magrampag nga mga sanga.

Ngan naipa ha iya an tagsa nga kahoy didto ha Eden nga tanaman han Dyos.

10“Sanglit yana, ako nga Ginoo nga Dyos magsusumat ha imo han dadangatan hito nga kahoy nga tinmubo tubtob nga inmabot ini ngadto han mga dampog. Samtang nagtitikahitaas ini, nagmamapahitas-on liwat ini;

11sanglit iginsalikway ko ini ngan ipinaangkon ko ini hin usa nga langyaw nga punoan. Ighahatag niya ngada hito nga kahoy an angay para hini nga kahoy tungod han pagkamaraot hini.

12Pagpupudlon ngan babayaan ini hin magbangis nga mga lumalangyaw. An mga sanga ngan an mga saringsing hini magkakahuglog ngada han tagsa nga bukid ngan kahamub-an didto han nasod. Mangingiwas an ngatanan nga mga nasod nga nag-ukoy dida han lindong hini.

13Magkakaabot an katamsihan ngan manhahapon dida han natumba nga kahoy, ngan maglalakat an ihalas nga kamanampan dida han mga sanga hini.

14Sanglit tikang yana, waray na kahoy nga magkadiano hin kamay-ada tubig, nga matubo na liwat hin sugad kahitaas, o makakaabot ha mga dampog an talimpongayan hini ngan makakaabot hin sugad nga kahitaas. Ini ngatanan may-ada pagkamatay sugad hin mga tawo nga may-ada kamatayon, nga igintalaan hin pagtampo hadton mga mapakadto han kalibutan han mga patay.”

15Amo ini an igyayakan han Ginoo nga Dyos: “Dida han adlaw makadto na an kahoy han kalibutan han mga patay, patatahoban ko ini han katubigan ha ilarom han tuna sugad nga usa nga tigaman hin pagkamabidoon. Pupudngan ko an mga salog ngan diri ko paaawason an damo nga mga sapa. Tungod nga namatay na an kahoy, magmamasirom an Kabukiran han Libano ngan malalaya an ngatanan nga kakahoyan ha kagurangan.

16Kon ilabog ko na ini ngadto han kalibutan han mga patay, mababay-og an mga nasod han aringasa han pagkapukan hini. An ngatanan nga kakahoyan han Eden, ngan an ngatanan nga pinili ngan natubigan hin maupay nga mga kahoy han Libano nga nanhingadto na han ubos nga kalibutan malilipay han pagkapukan hini.

17Maupod hira ngadto han kalibutan han mga patay basi mahitampo hira hadton mga nagkamatay na. Ngan magsasarang dida han mga nasod an ngatanan nga nag-uokoy dida han sirong han lindong hini.

18“An kahoy amo an hadi han Ehipto ngan an ngatanan niya nga mga tawo. Diri ngani masugad ha iya hin kahigtaas ngan kamagtahom an kakahoyan ha Eden. Kundi yana, sugad han kakahoyan han Eden, malusad ini ngadto han kalibutan han mga patay ngan matampo han diri mga dyosnon ngan hadton mga pinanmatay didto ha pag-awayan. Ako an nagyakan,” nasiring an Ginoo nga Dyos.