1 Ginoo, ayaw ha akon pagdumot ug kasina!
Ha imo kapungot, ayaw ako pagkastigoha!
2Kalooyi ako nga tugob hin kaluya, Ginoo.
Tagi ako hin kusog,
kapoy na ako hin duro.
3An bug-os ko nga kinabuhi,
lonlon kasakitan.
Maiha pa ba, Ginoo,
an imo ha akon pagtabang?
4Pakadi, Ginoo, ngan ako talwasa;
ha imo kalooy, ha kamatayon ako bawia.
5Hingangalimtan ka ha tuna han mga patay;
an mga pagdayaw ha imo waray.
6Maluya na ako tungod han kabidoan,
Kada gab-i mahulos an akon higdaan;
hamog na hin mga luha an akon ulonan,
tungod han pagtangis nga diri kapupudngan.
7Makuri na an akon pagkita,
kay nanhuhupong na an akon mga mata,
han pagtinangis nga waray na hunong,
buhat ha akon han mga kaaway nakon.
8Pahirayo ha akon,
kamo nga nagbuhat hin karat-an.
An akon pagtangis,
han Ginoo pinamatian;
9nabaton hiya han akon pangaro hin pakitabang;
ngan an akon pag-ampo dayuday pinamamatian.
10An akon mga kaaway
masabot han mapait nga kaalo,
han pagkakawang han ira mga paniguro;
magkakasaramok hira ngan mangangalagiw.
Who We AreWhat We EelieveWhat We Do
2025 by iamachristian.org,Inc All rights reserved.
