Job 14 - Samarenyo Meaning-Based Bible (1984)（MBBSAM）

1Natatawo kita ngatanan nga maluya ngan makalolooy.

An kinabuhi han ngatanan haliputay ngan puno hin kasamokan.

2Naturok ngan sugad hin bukad nalalaya kita dayon;

ngan napaanaw kita sugad hin mga lambong.

3Matan-aw ka ba ha akon, O Dyos,

o dadad-on mo ba ako ngadto ha hukmanan ngan paghuhukman mo ba ako?

4Waray gud magawas nga malinis

tikang hin bisan ano nga mahugaw sugad han tawo.

5Ginlarang na nga daan an kahilawig han iya kinabuhi—

an kadamo han iya mga bulan.

Igintalaan mo na ini, ngan diri na ini maliliwat.

6Ayaw siplat ha iya ngan pabay-i la hiya;

tugoti hiya hin pagpahimulos han iya makuri nga kinabuhi—kon makakahimo hiya.

7May paglaom pa in usa nga kahoy nga ginpulod na;

mabubuhi pa ini ngan mananaringsing.

8Bisan magurang an mga gamot hini,

ngan mauga an tuod dida ha tuna,

9kundi kon katubigan ini, mananaringsing ini sugad hin linghod nga tanom.

10Kundi napatay in usa nga tawo, ngan amo ito an iya kataposan;

napatay hiya, ngan hain man hiya?

11Sugad hin mga salog nga diri na naawas,

ngan mga lanaw nga hinubsan,

12napatay an mga tawo nga diri na gud mabangon.

Diri na gud hira magmamata samtang may-ada pa kalangitan;

magpapadayon na la hira hin pagkaturog.

13Karuyag ko unta nga tagoon mo ako didto han kalibutan han mga patay;

patagoa ako tubtob han pagpapas han imo kasina,

ngan unina pagtalaan hin panahon nga amo an imo paghinumdom ha akon.

14Kon mamatay in usa ka tawo, mabubuhi pa ba hiya?

Kundi maghuhulat ako hin mauruupay nga mga panahon,

maghuhulat ngada han katapos hini nga panahon hin kakurian.

15Niyan matawag ka ngan mabaton ako,

ngan malilipay ka ha akon nga imo binuhat.

16Niyan babantayan mo an tagsa ko nga pitad,

kundi diri mo pag-uusisahon an akon mga sala.

17Pasasayloon mo ngan hikakalimtan mo ini;

paparaon mo an ngatanan nga mga sayop nga akon nabuhat.

18Maabot an panahon nga magtitimpag an kabukiran,

ngan mababalhin an mga pangpang.

19Maibas an mga bato pinaagi han daganas han tubig

ngan maaanas an tuna pinaagi hin makusog nga uran;

sanglit binubungkag mo an kanan tawo paglaom han kinabuhi.

20Dinadaog mo in usa ka tawo ngan pinapaiwas mo hiya ha kadayonan;

ha kamatayon naliliwat an iya panagway.

21Nakarawat hin kadungganan an iya mga anak nga kalalaken-an,

kundi diri gud niya ini hinbabaroan,

diri liwat hiya ginsusumatan kon naaalohan hira.

22An iya la inaabat amo an kamaol-ol han iya kalugaringon nga lawas

ngan an kaguol han iya kalugaringon nga hunahuna.