Judit 6 - Samarenyo Meaning-Based Bible (1984)（MBBSAM）

Namulong hi Holofernes

1Han pagmingaw na han kadam-an nga naglilibot han Labaw nga Hukmanan, naghimangraw hi Holofernes kan Aquior ha atubangan han bug-os nga katirok, han mga taga baybayon han Mediteraneo, han mga Moabitanhon, ngan han Amonitanhon nga mga sinuholan.

2“Aquior, hin-o ka ngani nga napaka manaragna ka man? Hin-o ka nga magsusugo ha amon hin diri pakig-away han mga Israelita tungod kay may-ada diyos nga mananalipod ha ira? Hi Nabucodonosor amo an amon diyos, ngan waray gud iba. Igpapadara niya an iya kasondalohan ngan pagpupuohon ini nga mga Israelita dinhe ha bawbaw han tuna. Diri an ira diyos makakabulig ha ira.

3Kundi nag-aalagad kami kan Nabucodonosor, ngan masayonay la in pagpuo ha ira, kay an ira bug-os nga kasondalohan sugad la hin usa ka tawo. Diri hira makakahimo hin pag-asdang han amon dikabayo nga kasondalohan;

4lulupigan ini hira. Mahuhumog an kabukiran han ira dugo ngan mapupuno an mga kahamub-an han ira patay nga mga lawas. Katapos han amon pagsulong, mapupuo gud hira; waray mahisasalin bisan in usa nga lutop nira. Amo ini an sugo ni Nabucodonosor nga ginoo han bug-os nga tuna, ngan matutuman gud an iya mga pulong.

5Aquior, usa ka la nga Amonitanhon nga sinuholan, ngan nagyayakan ka sugad hin usa nga malingo. Diri mo na ako igkikita liwat tubtob han pagkanhi ngan pagkastigo ko hini nga mga tulin hin mga kinmalagiw nga oripon.

6Ngan kon buhaton ko na ini, papatayon ka han akon mga sondalo. Usa ka na la nga ngaran dida han listahan hin mga patay.

7“Yana dadad-on ka han akon mga tawo ngadto ha kabukiran ngan igbibilin ka didto hin usa han mga bungto nga Israelita,

8ngan mamamatay ka upod han mga tawo didto.

9Kay ano nga baga nagugupong ka man, Aquior? Ano an imo hunahuna, nga an bungto makakaasdang ha akon? Tutumanon ko an ngatanan ko nga mga pagtarhog; ngan diri gud magsasayop!”

Gindara hi Aquior ngadto ha Betulia

10Niyan ginsugo ni Holofernes an iya mga tawo nga naghuhulat didto han iya tulda hin pagdakop kan Aquior, hin pagdara ha iya ngadto ha Betulia, ngan pagtubyan ha iya ngadto han mga Israelita.

11Sanglit gindakop han mga tawo hi Aquior ngan igingawas hiya han kampo ngadto han kahamub-an. Tikang didto ira gindara hiya ngadto han kabukiran tubtob han burabod ha ubos han Betulia.

12Han pakakita han mga tawo hini nga bungto nga tiarabot hira, ira pinurot an ira mga hinganiban ngan nagdadlagan hira ngadto han bawbaw han pungtod. An kada tawo nga nagamit hin labyog nga ira hinganiban nagpauran hin mga bato ngadto han mga sondalo ni Holofernes didto ha ubos, ngan napugngan hira hin pagtipaigbaw han bukid.

13Napirit an mga Asiriahanon hin pagsalipod ha ligid han bukid, diin ira gingapos hi Aquior ngan ginbayaan hiya nira nga nahigda ha ubos han bukid. Katapos binmalik hira ngadto kan Holofernes.

14Niyan, han paglugsong na han mga Israelita tikang ha Betulia, ira ginhubaran hi Aquior, gindara ini hiya ngadto han bungto, ngan ginpaatubang hiya han mga opisyal han bungto,

15nga hito nga panahon amo hira Uzias nga anak ni Nikas han tribo ni Simeon, Cabris nga anak ni Gotoniel, ug Carmes nga anak ni Malquiel.

16Gintirok han mga opisyal an mga katigurangan han bungto, ngan nagdadlagan liwat an ngatanan nga kababayen-an ngan kaulitawhan ngadto han katirok. Gindara hi Aquior ha atubangan han mga tawo, ngan nagtikang hi Uzias hin pagpakiana ha iya.

17Iginsumat ha ira ni Aquior an iginsiring didto han Labaw nga Hukmanan ni Holofernes, an iginsiring ngahaw ngadto han mga opisyal nga Asiriahanon, ngan an paghambog ni Holofernes hiunong han iya pagbubuhaton han mga Israelita.

18Han pakabati hini han mga tawo, nanluhod hira ngan nagsingba han Dyos. Nag-ampo hira:

19“O Ginoo nga Dyos han langit, tan-awa an imo mga tawo nga ginpapakaalohan han amon mapahitas-on nga mga kaaway! Kalooyi ngan buligi kami.”

20Niyan ira ginliaw hi Aquior ngan gindayaw hiya tungod han iya ginbuhat.

21Katapos han katirok, ginpaupod ni Uzias hi Aquior ngadto ha iya balay, ngan didto naghatag hiya hin usa nga bangkite para han mga katigurangan. Ha bug-os hito nga gab-i nag-ampo hira nga buligan hira han Dyos han Israel.