2 Macabeo 11 - Samarenyo Meaning-Based Bible (1984)（MBBSAM）

Ginpirde ni Judas Macabeo hi Lisias(1 Mac. 4:26-35)

1Waray kaiha tikang mapirde hi Timoteo, hinbatian an nahinabo ni Lisias nga magmarangno ngan uropod han hadi, ngan nagdumara han pamunoan. Nasina hiya

2ngan nagmando hin 80,000 nga baktas nga kasondalohan ngan ngatanan niya nga dikabayo nga mga sondalo kontra han mga Judiyo, kay karuyag niya himoon an Jerusalem nga usa nga Griego nga syudad.

3Aaroan hin buhis an Templo sugad han ngatanan nga mga dapit hin pagsingba han mga Hentil, ngan mahimo ibaligya kada tuig an katungdanan hin pagka Labaw nga Padi.

4Nalipay hi Lisias han iya yinukotyukot nga baktas nga kasondalohan, han iya yinukot nga dikabayo nga mga sondalo, ngan han iyo 80 nga mga elepante, nga waray niya pagpainoinoha an gahom han Dyos.

5Iya naagaw an Judea ngan ginsulong niya an kota han Betsur nga mga 45 ka kilometros ha salatan han Jerusalem.

6Han pakabati nira Judas ngan han iya mga tawo nga ginsulong ni Lisias an ira mga kota, nagtangis ngan nagnguyngoy hira ngan an ngatanan nga mga tawo. Naghangyo hira han Ginoo nga magpadara hiya hin usa nga maupay nga anghel nga magtatalwas ha ira.

7Hi Judas amo an una nga nag-andam han iya hinganiban, ngan iya gin-aghat an iba nga umupod ha iya hin pag-unong han ira kinabuhi ha pagbulig han ira mga igkasi Judiyo. Sanglit kay ira gud karuyag, nag-urosa hira hin pakig-away.

8Kundi han diri pa hira hirayo tikang ha Jerusalem, tigda la nga ira inabat nga ginmamandoan hira hin usa nga dikabayo nga nakakabado hin busag ngan nakakadara hin bulawan nga mga hinganiban.

9Ha gilayon nag-urosa hira ngatanan hin pagpasalamat han Dyos tungod han iya pagkalooy; ginpaisog hira han Dyos diri la hin pagsulong hin mga tawo, kundi bisan pa han labi kamapintas nga kamanampan, o bisan pa mga pader nga puthaw.

10Sanglit nag-atag hira hin pakig-away, ngan upod ha ira an iginpadara han Ginoo tungod han iya pagkalooy, hin pakig-away ugop ha ira.

11Niyan ginsulong nira an kaaway sugad hin mga liyon, ngan ira pinamatay in 11,000 nga mga baktas nga kasondalohan ngan 1,600 nga mga dikabayo nga mga sondalo, ngan an iba napirit hin pagkalagiw.

12Mga samad ngan nawad-an han ira mga hinganiban an kaurog hadton mga nangalagiw, ngan nakakalagiw hi Lisias ngahaw tungod la nga dinmalagan hiya sugad hin usa nga matalaw.

Nakigsabot hin Kalinaw han mga Judiyo hi Lisias(1 Mac. 6:56-61)

13Diri lurong hi Lisias. Samtang nagpapainoino hiya hiunong han kapirdehan nga iya gin-antos, nakasabot hiya nga tungod ini nga an Dyos binmulig han mga Judiyo hin pakig-away, nga tungod hini makuri gud hira mapirde. Sanglit nagpadara hiya hin surat ngadto han mga Judiyo,

14nga diin nagtalinguha hiya hin pag-aghat ha ira nga umuyon hin usa nga matadong nga katuhayan ngan nagsaad liwat hiya nga bubuhaton niya an ngatanan nga iya mahimo, basi an hadi makigsangkay ha ira.

15Gin-isip ni Judas Macabeo nga maupay gud ini para han mga tawo, sanglit inmuyon hiya han ngatanan nga ginhangyo ni Lisias, tungod nga igintugot man han hadi an tagsa nga sinurat nga hangyo nga iginpahayag ni Judas kan Lisias.Nagsurat hi Lisias ngadto han mga Judiyo

16Iini in usa nga kopya han surat ni Lisias ngadto han mga Judiyo:

“Tikang kan Lisias ngadto han mga Judiyo damo nga pangumosta.

17Iginduhol ha akon nira Juan ug Absalon nga imo mga tumindog, an opisyal nga dokumento nga imo iginpadara pinaagi ha ira, ngan ira ako ginhangyo nga umuyon ako han mga sulod hini nga surat.

18Iginpahibaro ko han hadi an mga butang nga kinahanglan niya hisabotan, ngan tinmangdo hiya hin pagbuhat han bisan ano nga mahihimo.

19Kon magpadayon kamo hin pag-ugop han pamunoan, bubuhaton ko an ngatanan nga akon mahihimo hin pagpakaupay han iyo nasod ha tiarabot nga mga panahon.

20Gintugon ko an imo mga tumindog sugad man han akon, nga makigkita hira ha iyo hin paghiruhimangraw han mga bahin hini nga mga butang.

21Hinaot unta nga waray hinabo nga maraot dida ha iyo. Ginpitsahan ini han ika-15 nga adlaw han bulan han Dioscorinto han tuig 148.”Nagsurat an Hadi ngadto kan Lisias

22Iini in usa nga kopya han surat han hadi:

“Tikang kan Hadi Antioco ngadto han talahoron nga Lisias, damo nga mga pangumosta.

23Yana nga tinmalikod na ha kadayonan hin pakigkaupod han mga diyos an akon amay, karuyag ko nga an mga sakop han akon ginhadian maglugaring ngan pasagdan hin pagdumara han ira mga buruhaton.

24Nasayod ako nga nadiri an mga Judiyo hin pagsunod han Griego nga pamatasan ngan naghangyo nga tugotan hira hin pag-ukoy sumala han kalugaringon nira nga mga pamatasan.

25Tungod kay tuyo ko man nga mag-ukoy hira nga malinawon sugad han iba nga mga nasod han akon ginhadian, akon yana iginsusugo nga igbalik ha ira an ira Templo ngan tugotan hira hin pag-ukoy sumala han mga pamatasan han ira kaapoy-apoyan.

26Alayon hin pagpahibaroa ha ira hiunong hini nga larang ngan patapora hira han akon pakigsangkay ha ira, basi magtuman hira nga malinawon han ira mga buruhaton, hin waray gud bisan ano nga kabaraka.”

27Iini in usa nga kopya han surat han hadi ngadto han mga Judiyo:

“Tikang kan Hadi Antioco ngadto han Judiyo nga mga pangulo ngan han ngatanan nga mga Judiyo, damo nga mga pangumosta.

28Naglalaom ako nga maupay an iyo kamutangan. Maupay an akon panlawas.

29Ginsumatan ako ni Menelao han iyo ungara hin pag-uli ngan pagdumara han iyo kalugaringon nga mga buruhaton.

30Sanglit adton hin-o man ha iyo nga umoli han ika-30 nga adlaw han bulan han Xantico, iginpapatapod ko ha iyo nga waray na niyo sadang kahadlokan.

31Makakapadayon na kamo hin pagtuman han iyo mga balaod hin pagkaon ngan iba pa nga mga balaod, sugad han iyo ginbuhat hadto ngan waray na Judiyo nga pagkakastigohon tungod hin diri tinuyo nga pagtalapas.

32Ginsusugo ko hi Menelao basi diri na kamo mabaraka.

33Maghingaupay unta an ngatanan dida ha iyo. Pinitsahan han ika-15 nga adlaw han bulan han Xantico han tuig 148.”Nagsurat an mga Romano ngadto han mga Judiyo

34Ginpadad-an liwat han mga Romano an mga Judiyo han nasunod nga surat:

“Tikang kanda Quinto Memmio ug Tito Manio nga mga tumindog han mga Romano ngadto han mga Judiyo, damo nga mga pangumosta.

35Hingpit an amon pag-uyon han ngatanan nga igintugot ha iyo han talahoron nga Lisias.

36Tikadto na kami ha Antioquia yana, sanglit alayon hin pag-usisa hin maupay adton mga butang nga iginkadto ni Lisias han hadi. Niyan balosa kami dayon, basi madara namon para han iyo kaupayan ha atubangan han hadi. Buhata gud ini dayon,

37hin waray paglangan, basi hibaroan namon kon ano an iyo ginkasarabotan.

38Maghingaupay unta an ngatanan dida ha iyo. Pinitsahan han ika-15 nga adlaw han bulan han Xantico han tuig 148.”