Esdras 9 - Samarenyo Meaning-Based Bible (1984)（MBBSAM）

Hinbaroan ni Esdras an mga Pag-asawa han Diri Igkasi mga Judiyo

1Katapos pagbuhata ini ngatanan, inmabot in mga pangulo han mga tawo han Israel ngan nagsumat ini hira ha akon nga an mga tawo, an kapadian, ngan an mga Levita waray lumain han mga tawo han higrani nga mga nasod—an Canaan, Amon, Moab, ug Ehipto—o han mga Hiteohanon, Periseohanon, Jebuseohanon, ngan mga Amoreohanon. Ginbuhat nira an makaarawod nga mga butang nga ginbuhat hini nga mga tawo.

2Nangasawa hin langyaw nga kababayen-an an kalalaken-an nga mga Judiyo, sanglit nahugawan an baraan nga mga tawo han Dyos. An mga pangulo ngan mga opisyal amo an nag-una hini nga mga pagtalapas.

3Han pakabati ko hini, ginggisi ko an akon panapton tungod hin pagturaw, ginrabot ko an akon buhok ngan akon bungot, ngan linmingkod ako nga mabidoon.

4Linmingkod ako didto nga mabidoon ngada han pag-abot han takna han ikinagab-i nga paghalad, ngan nag-alirong ha akon an mga tawo—an ngatanan nga nahadlok tungod han iginsiring han Dyos han Israel mahitungod han mga sala hadton mga binmalik na tikang han paghalina ha ira.

5Han takna na han gab-i nga paghalad, binmuhat ako ha akon lingkoran ngan samtang nakakabado pa ako han gisi nga panapton, linmuhod ako hin pag-ampo ngan gin-alsa ko an akon mga kamot ngadto han Ginoo nga akon Dyos.

6Nagsiring ako, “O Dyos, ikinaaawod ko ngan waray ako nawong hin pag-atubang ha imo. Nagtikahitaas na an tambak han amon sala nga linapos na han amon ulo; naabot na ngani ngadto ha kalangitan.

7Tikang pa han mga adlaw han amon kaapoy-apoyan ngada yana kami, an imo mga tawo, nagbuhat hin dagko nga mga sala. Tungod han amon mga sala, nahingadto kami, an amon kahadian ug kapadian ha mga kamot hin langyaw nga kahadian; ginpatay, gintikasan, ngan ginbihag kami, ngan naalohan gud kami sugad hinin kamutangan namon yana.

8Yana, sulod hin haliputay nga panahon, O Ginoo nga amon Dyos, nalooy ka ha amon ngan itinugot mo nga makapalagiw ha pagkabihag ngan mag-ukoy ha kahimyangan in pira ha amon dinhe hini nga baraan nga dapit. Iginlikay mo kami ha pagkaoripon ngan iginhatag mo ha amon in bag-o nga kinabuhi.

9Mga oripon kami, kundi waray mo kami pabay-i ha pagkaoripon. Nagbuot ka nga umugop ha amon an mga emperador han Persia ngan tumugot ini hira ha amon hin pag-ukoy ngan pagtindog na liwat han imo Templo nga naruba, ngan hin pakaagi han amon katalwasan didto ha Juda ug Jerusalem.

10“Kundi yana, O Dyos, ano in amon masisiring katapos han ngatanan nga nahinabo? Ginsupak na liwat namon an ngatanan nga mga sugo

11nga imo ginhatag ha amon pinaagi han imo mga surugoon nga mga manaragna. Nagsumat hira ha amon nga mahugaw an tuna nga amon pag-uokyan, kay ginpuno han mga tawo nga nag-ukoy hito hin makaarawod ngan maghugaw nga mga binuhatan an ngatanan nga katunaan.

12Ginsiring kami nira nga diri gud kami makig-aragsawa hito nga mga tawo ngan diri gud kami bumulig basi hira magmainuswagon kon karuyag namon magpahimulos han tuna ngan ipasunod ini ha kadayonan han amon mga tulin.

13Bisan han katapos han ngatanan nga nahinabo ha amon nga ihinatag mo nga sirot han amon mga sala ngan mga sayop, maaram kami nga ikaw nga amon Dyos nagkastigo ha amon ngani kulang pa ini han angay ha amon nga kastigo ngan gintugotan mo pa kami nga mabuhi.

14Niyan pababay-an na la namon an imo mga sugo ngan makikig-aragsawa kami hini nga magraogdaog nga mga tawo? Kon buhaton namon ini, mapupungot ka gud ha amon ngan pupuohon mo kami, ngan diri ka na matugot nga may mabuhi pa ha amon.

15O Ginoo nga Dyos han Israel, matadong ka, kundi gintugotan mo kami nga mabuhi. Nagkokompisal kami ha imo han amon sala; waray gud kami katungod hin pagkada ha imo atubangan.”