Isaias 59 - Samarenyo Meaning-Based Bible (1984)（MBBSAM）

Ginhukman han Manaragna an mga Sala han Katawhan

1Ayaw kamo paghunahuna nga maluya hin duro an Ginoo hin pagtalwas ha iyo, o bungol hin duro hin pagpamati han iyo pagtawag hin pakibulig!

2Tungod ini han iyo mga sala nga diri hiya nabati ha iyo. An iyo mga sala amo an nakapabulag ha iyo tikang han Dyos kon nagtitinguha kamo hin pagsingba ha iya.

3Mga salaan kamo hin pagbinuwa, panlupig, ngan pagpatay.

4Napakadto kamo ha hukmanan kundi diri kamo nadapig han katadongan. Natapod kamo hin mga buwa basi la kamo makadaog han iyo kaso. Gintutuman niyo an iyo mga larang hin pagdaot han iba.

5-6An magraot nga mga larang nga iyo ginhihimo makamaratay pa ini kay han mga bunay hin malara nga halas. Buonga in usa nga bunay ngan magawas dayon in usa nga halas! Kundi diri makakaupay ha iyo an iyo magraot nga mga larang—sugad la ini hin waray gamit nga dugnit nga hinimo tikang hin mga lawalawa!

7Dayuday la kamo naglalarang hin maraot ngan diri ngani kamo nakakahulat hin pagbuhat hini. Diri gud kamo nag-aalang hin pagpatay hin tawo nga waray sala. Ibinibilin niyo in kabungkagan ngan kapirdehan ha bisan diin nga dapit nga iyo kinakadtoan,

8ngan waray gud tawo nga himyang an kamutangan kon aada kamo. Diri matadong an ngatanan nga binubuhat niyo. Naglalakat kamo dida hin baliko nga agian ngan waray gud tawo nga naglalakat hito nga agian nga magagawas hin kataragman.

Nagkompisal an mga Tawo han Ira Sala

9Nasiring an mga tawo, “Maaram na kami yana kon kay ano nga diri kami tinatalwas han Dyos tikang hadton mga nagtatalumpigos ha amon. Naglalaom kami hin kapawaan nga amon paglalaktan, kundi asay la lugod an kasisidman,

10ngan nangangapkap kami sugad hin mga buta. Nahipapakdol kami bisan kon udto nga daw sugad hin gab-i na ini, nga daw sugad hin aadto kami han masirom nga kalibutan han mga patay.

11Nahahadlok ngan kinukurian kami. Naghihiningyapan kami han Dyos nga talwason kami niya tikang han pagtalumpigos ug kasaypanan, kundi waray gud nahinanabo ha amon.

12“Ginoo, damo gud an amon mga pagtalapas kontra ha imo. An amon ngahaw mga sala an nagsusumbong ha amon. Maaram gud kami hini ngatanan.

13Sinmupil kami ha imo, iginsalikway ka namon, ngan dinmiri kami hin pagsunod ha imo. Gintalumpigos namon in iba nga mga tawo ngan binmaya kami ha imo. Buwaon an amon mga panhunahuna ngan mga buwa an amon mga pulong.

14Ginsalikway namon an katadongan ngan hinmirayo ha amon an matadong. Napupukan an kamatuoran didto han mga plasa, ngan diri ngani nakakasulod an pagkatangkod.

15Kulang na an pagkatangkod, sanglit adton naundang hin pagbuhat hin maraot amo lugod an gintatalumpigos.”

Nag-andam an Ginoo

hin Pagtalwas han Iya mga Tawo

Hinkit-an ini han Ginoo ngan nabido hiya tungod kay waray na an pagkamatadong.

16Nahipausa hiya nga waray gud nabulig han mga gintatalumpigos. Sanglit gagamiton niya an iya kalugaringon nga gahom hin pagtalwas ha ira ngan hin paghatag ha ira han pagdarag-an.

17Igsusul-ot niya an pagkamatadong sugad hin bado nga hinganiban ngan an nagtatalwas nga gahom sugad hin helmet. Igbabado niya an makusog nga tinguha hin pagtadong han mga butang, ngan hin pagkastigo ngan pagbulos han mga sayop nga gin-aantos han mga tawo.

18Kakastigohon niya an iya mga kaaway sumala han ira nabuhat, bisan pa adton mga nag-uokoy didto han higrayo nga katunaan.

19Mahahadlok ha iya ngan han iya dako nga gahom an ngatanan tikang ha sinirangan ngadto ha katundan. Maabot hiya sugad hin nabuklos nga salog, sugad hin makusog nga hangin.

20Nagsiring an Ginoo ngadto han iya mga tawo, “Maabot ako ngadto ha Jerusalem hin pagpanalipod ngan pagtalwas ha iyo ngatanan nga nabaya han iyo mga sala.

21Ngan maghihimo ako hin ginsaaran ha iyo: Iginhatag ko ha iyo an akon gahom ngan an akon mga pagturon-an nga basi maiyo ha kadayonan, ngan tikang yana magsusugot kamo ha akon ngan magtututdo kamo han iyo mga anak ngan han iyo mga tulin hin pagsugot ha akon ha ngatanan nga panahon nga tiarabot.”