2 Macabeo 13 - Samarenyo Meaning-Based Bible (1984)（MBBSAM）

Ginpatay hi Menelao

1Dida han tuig 149 hinbaroan nira Judas Macabeo ngan han iya mga sakop nga napakadto na hi Antioco Eupator hin pagsulong han Judea upod in dako nga hugpo hin kasondalohan,

2ngan upod hi Lisias nga amo an tagmangno han batan-on nga hadi ngan an pangulo han iya pamunoan. May-ada hira hugpo hin Griego nga kasondalohan nga 110,000 nga baktas nga kasondalohan, 5,300 nga mga dikabayo, 22 nga mga elepante, ngan 300 nga mga karuwahe nga may-ada magtarom nga mga surab nga tinaod ngada han mga ruyda han mga karuwahe.

3Ha pagpahimulos han higayon, dinmapig ha ira hi Menelao ngan gin-aghat hira hin pagpadayon, diri tungod nga napaid hiya han nasod, kundi tungod nga naglaom hiya nga hihimoon hiya nga ira Labaw nga Padi.

4Kundi an Dyos nga Hadi han mga hadi tinmugot nga hi Antioco mapungot kan Menelao. Ginpamatud-an ni Lisias hi Antioco nga ini nga kriminal hi Menelao, amo an tinikangan han ngatanan niya nga kasamokan, sanglit nagsugo hi Antioco nga pagdad-an hiya ngadto ha Berea ngan patayon hiya ha paagi nga ira ginbubuhat didto.

5May-ada didto hito nga syudad usa nga lantawan nga mga 16 ka metros an kahitaas. May sulod ini nga mga agbon ngan may-ada papag palibot han sakob han torre, nga nahilig tipakadto han mga agbon.

6An mga tawo nga iginsumbong kontra han kadiyosan o hin bisan ano nga dagko nga mga pagtalapas, gindadara ngadto ngan ilinalabog ngadto ha ubos basi mamatay.

7Ginpatay hi Menelao hito nga paagi, nga waray ngani ini hiya mahilubong,

8ngan angay ini para ha iya. Agsob niya nga magnamastamas han baraan nga mga agbon han kalayo han altar didto han Templo, ngan yana namatay hiya dida hin mga agbon.

Nag-araway Hirani han Syudad han Modin

9Hi Hadi Antioco nagmapahitas-on hin pagpadayon han iya mapintas nga pagsulong han Judea, nga nakahunahuna nga pagpapakurian gud niya an mga Judiyo hin labaw pa han ginbuhat han iya amay.

10Han paghibaro ni Judas hini, iya gin-aghat an mga tawo nga mag-ampo han Ginoo adlaw gab-i, kay aada hira ha kataragman nga mawara an ira Balaod, an ira nasod, ngan an ira baraan nga Templo. Waray pa gud han naglabay nga panahon nga magkinahanglan hira han iya pagbulig ngan pagpanalipod,

11basi an ira bag-o pa la nga nahiuli nga nasod diri mahingadto ha mga kamot han waray pagtahod han Dyos nga mga Hentil.

12Sulod hin tulo ka adlaw waray ginbuhat an mga tawo labot hin pagkulob ha tuna, pagpuasa ngan pagtangis, ha paghangyo han maloloy-on nga Ginoo han iya tambulig. Katapos, naghimangraw hi Judas hin mga pulong hin pagdasig ngadto han mga tawo, ha nag-aghat ha ira hin pag-andam para hin pakig-away.

13Katapos hini, nakigkita hi Judas hin hilit han mga pangulo nga Judiyo ngan nagkauruyon hira hin paggawas nga binuligan han Dyos hin pakig-away kontra han hadi, kay hin paghulat nga mauna ni Antioco hin pagsulong han Judea ngan pag-agaw han Jerusalem.

14Niyan igintubyan ni Judas ngadto han Magburuhat han kalibutan kon ano an dadangatan han araway ngan iya gindasig an iya mga tawo hin pakig-away ngan maandam hin pag-unong han ira kinabuhi para han ira mga balaod, han Templo, han Jerusalem, han ira nasod, ngan han ira naaraan nga mga pamatasan. Nagkampo hira hirani han syudad han Modin.

15“Natikang han Dyos an pagdarag-an,” amo an goliat hin pakig-away nga iginhatag ni Judas han iya mga tawo, ngan hito nga gab-i, upod in pinili nga kasondalohan han iya labi kamag-isog nga mga batan-on, ginsulong niya an dapit ha hirani han tulda han hadi ngan pinamatay nira in mga 2,000 ka tawo. Ira liwat ginbuno an nag-uuna nga elepante ngan an magmarangno hini.

16Duro an kahadlok ngan nagkalisanglisang an ngatanan didto ha kampo han kaaway samtang binmaya nga madinaogon hira Judas ngan han iya mga tawo,

17han waray pa sisidlit an adlaw. Nahimo ini ngatanan tungod han tambulig ngan pagpanalipod han Dyos.

Nakigsabot hin Kalinaw han mga Judiyo hi Antioco Quinto(1 Mac. 6:48-63)

18Ini nga hinkit-an nga kaisog han mga Judiyo, igo na hin pagpamatuod kan Hadi Antioco nga kinahanglan mangita hiya hin mauruupay nga paagi hin pag-agaw han mga tuna han mga Judiyo.

19Ginsulong niya an marig-on nga kota han mga Judiyo didto ha Betsur, kundi nakadamo hiya umisol ngan ha kataposan ginpirde hiya.

20Nagpadara hi Judas hin mga kasangkapan ngadto han mga tawo nga nananalipod han kota,

21kundi may-ada usa nga Judiyo nga sondalo nga ginngaranan kan Rodoco nga naghatag hin hilit nga pahibaro ngadto han kaaway. Kundi hinbaroan hiya, gindakop hiya, ngan ginpatay.

22An hadi naghimo hin ikaduha nga pakigsabot hin kalinaw han mga taga-Betsur, ngan han pagkauruyon nira, ginpaisol niya an iya kasondalohan. Niyan ginsulong niya hi Judas ngan ginpirde na liwat hiya.

23Hini nga panahon iginbilin hi Felipe didto ha Antioquia nga tinaporan han pamunoan, kundi hinbaroan ni Hadi Antioco nga sinmupil hiya. Waray na mahibaro an hadi kon ano an iya pagbubuhaton, sanglit nag-una hiya hin pakigsabot hin kalinaw han mga Judiyo, nagkauruyon hira, ngan nagsaad an hadi nga pagdudumaraon niya hin matadong an mga Judiyo. Basi matuman an ginsabotan, naghalad an hadi hin usa nga hayop nga tinubod, naghatag hin usa nga dako nga regalo hin pagpakita han iya pagtahod para han Templo,

24ngan gin-abiabi niya hin maupay hi Judas Macabeo. Katapos, gintudlok han hadi hi Hegemonidas nga gobernador han katunaan nga nabubutnga han mga syudad han Tolomaida ug Gerar,

25ngan kahuman kinmadto hiya ngahaw ha Tolomaida. Nagkasisina an mga tawo didto tungod han ginsabotan hin kalinaw nga iya ginhimo han mga Judiyo—duro gud an ira kasina nga karuyag nira nga paraon adto nga ginsabotan.

26Kundi namulong ha atubangan han mga tawo hi Lisias basi niya kapanalipdan an ginsabotan tubtob han iya mahimo. Katapos niya pagpamingawa an mga tawo ngan pagpamatuod ha ira nga matadong an iya ginbuhat, binmalik hiya ngadto ha Antioquia.

Dida hini nga paagi nahimo lugod nga usa nga pag-isol an pagsulong ni Hadi Antioco.