1 Macabeo 4 - Samarenyo Meaning-Based Bible (1984)（MBBSAM）

1Gindara ni Gorgias in 5,000 nga baktas nga mga sondalo ngan 1,000 han iya gibabatiri nga dikabayo nga mga sondalo ngan binmaya hira han kampo ha gab-i,

2upod in mga tawo nga tikang han kota didto ha Jerusalem nga iya mga magturutdo han ira aagian. Nakahunahuna hiya hin tigda nga pagsulong han mga kasondalohan nga Judiyo,

3kundi hinbaroan ni Judas ini, ngan ginmawas hi Judas ngan an iya mga tawo hin pagsulong han kasondalohan han hadi didto ha Emmaus

4samtang hirayo pa tikang han kampo hi Gorgias ngan an iya mga sondalo.

5Han pag-abot ni Gorgias ngan han iya kasondalohan didto han kampo ni Judas hito nga gab-i, waray nira hin-agian nga tawo didto. Naghunahuna hira nga naikaralagiw hi Judas ngan an iya mga tawo, sanglit nagtikang hira hin pagbiling ha ira didto ha kabukiran.

6Han maagahon pa didto na han patag hi Judas upod in 3,000 nga mga tawo, nga diri ngatanan hira sangkap hin mga hinganiban ha pag-awayan sugad han angay.

7Ira hinkit-an in damo hin duro nga kasondalohan nga Hentil hin batid nga mga sondalo nga nakakasul-ot hin hinganiban ha pag-awayan ngan pinanalipdan hin dikabayo nga mga sondalo.

8Kundi nagsiring hi Judas ha iya mga tawo, “Ayaw kamo kabaraka han kadamo han ira kasondalohan, ngan ayaw kamo kahadlok kon sumulong hira.

9Hinumdomi kon gin-unan-o hin pagtalwas han aton kaapoy-apoyan didto han Dagat Pula han ginlalanat hira han hadi han Ehipto upod an iya kasondalohan!

10Yana pangamuyo kita han Ginoo nga kalooyan kita. Pag-ampo kita nga pagpasidunggan niya an iya ginsaaran han aton kaapoy-apoyan ngan puohon niya ini nga kasondalohan kon sumulong kita yana nga adlaw.

11Niyan mahibabaro an ngatanan nga mga Hentil nga may-ada an Israel usa nga Dyos nga nagbabawi ngan nagtatalwas ha ira.”

12Han pakakita han mga Hentil kan Judas ngan han iya mga tawo nga nag-aandam para ha pag-awayan,

13ginmawas hira han ira kampo hin pakig-away. Niyan hi Judas ngan an iya mga tawo

14nagtrompeta ngan sinmulong hira. Nagsarang an mga Hentil ngan nanmalagiw ngadto han patag,

15kundi pinamatay an ngatanan nga mga nanhimulag. Ginlanat han mga Israelita an kaaway tubtob gud ha Gezer, ha kapatagan han Edumea, ngan han mga bungto han Asdod ug Jamnia. Pinamatay nira in mga 3,000 ngatanan han ira mga kaaway.

16Han pagbalik ni Judas ngan han iya kasondalohan tikang han panlanat,

17-18ginsiring niya an iya mga tawo, “Ayaw kamo kaikag hin panikas han mga butang. Aanhi pa ha hirani nga kabukiran hira Gorgias ngan han iya kasondalohan, sanglit dako pa nga araway an aton aatubangon. Kinahanglan umasdang kita hin marig-on ngan makig-away. Katapos, makakahimo na kamo hin pagkuha han ngatanan nga iyo karuyag tikason nga mga butang.”

19Kahuman la paghimangraw ni Judas, tinmangbo tikang han kabukiran in usa nga patrolya han ira kaaway,

20ngan hinkit-an hini nira nga nanmalagiw na an ira kasondalohan; nahibaro hira tikang han aso nga nasusunog an ira kampo.

21Han paghikit-i nira hini ngatanan, nagkahahadlok hira hin duro, ngan han paghikit-i liwat nira nga nakadto han patag an kasondalohan ni Judas nga andam na para ha pag-awayan,

22nanmalagiw hira ngatanan ngadto ha Filistia.

23Niyan binmalik hira Judas hin panikas han kampo han ira mga kaaway; kinuha nira in damo nga bulawan ug salapi, asol ngan pula nga mga hinero, ngan iba pa nga marahalon nga mga butang.

24Han pagbalik han mga Judiyo ngadto han kalugaringon nira nga kampo, nagkanta hira hin usa nga imno: “Angay pagdayawon an Ginoo; an iya kalooy ha kadayonan.”

25Nakahatag ito nga adlaw hin usa nga dako nga pagdarag-an han mga tawo han Israel.

Ginpirde hi Lisias(2 Mac. 11:1-12)

26Kinmadto kan Lisias an nagpakakalagiw nga Hentil nga mga kasondalohan ngan iginsumat an ngatanan nga nahinabo.

27Han pakabati ni Lisias nga nadaog ha pag-awayan an iya mga kasondalohan, nahipausa ngan nakaawod hiya nga waray madaog an Israel sumala han iginsugo han hadi.

28Han pagkasunod nga tuig nagtirok hi Lisias hin kasondalohan nga 60,000 nga tinutdoan hin maupay nga baktas la nga mga sondalo ngan 5,000 nga dikabayo nga mga sondalo, nga an tuyo amo an pagpirde han mga Judiyo.

29Napakadto hira ha Edumea ngan nagkampo didto ha Betsur. Inmabot hi Judas hin pag-asdang ha ira upod in 10,000 ka tawo.

30Han pakakita ni Judas han kakusog han kasondalohan han kaaway, nag-ampo hiya, “Pagdadayawon ka namon, O Magtaralwas han Israel. Gindaog mo an pagsulong han higante pinaagi han kamot ni David nga imo surugoon ngan tinugotan mo hira Jonatan nga anak ni Saul ngan han batan-on nga nagdara han iya mga hinganiban hin pagpirde han bug-os nga kasondalohan han Filistia.

31“Yana, ha amo ngahaw nga paagi tugoti man an imo mga tawo nga Israel hin pagpirde han amon kaaway. Pagpakaalohi hira, bisan ha ngatanan nira nga pagtapod han ira baktas ngan dikabayo nga mga sondalo.

32Himoa nga mahadlok hira; paluyaha an ira maisog nga kusog; pakuroga hira ha pagpaabot nira hin kapirdehan.

33Hinihigugma ngan ginsisingba ka namon; sanglit tugoti kami hin pamatay han amon mga kaaway, basi magkanta kami hin mga pagdayaw ha imo.”

34Nagtikang an away, ngan dida han tinag-usa nga asdangay, mga 5,000 han mga tawo ni Lisias an namatay.

35Han paghikit-i ni Lisias nga nadaog na an iya kasondalohan ngan han paghikit-i niya han mapintas nga kaisog nira Judas ngan han iya mga tawo, nga nagpakita nga andam hira hin dungganan nga pagkabuhi kon pagkamatay, binmalik hiya ngadto ha Antioquia. Didto kinmarawat pa hiya hin sinuholan nga mga sondalo ngan nakahunahuna hiya hin pagbalik ngadto ha Judea dara in darudamo pa nga kasondalohan.

Ginlinisan an Templo(2 Mac. 10:1-8)

36Nagsiring hira Judas ngan han iya kabugtoan, “Yana nga napirde an aton mga kaaway, pasingadto kita ha Jerusalem hin paglinis han Templo ngan hin pagbag-o han paghalad hini nga Templo.”

37Sanglit nagtirok an bug-os nga kasondalohan ngan sinmagka hira han Bukid Sion.

38Didto hinkit-an nira nga ginpabay-an la an Templo, mahugaw na an altar, sunog na an mga ganghaan, kabanwaan na an mga bungsaran, ngan ruba na an mga kwarto han kapadian.

39Ha ira kabido, ira ginggisi an ira mga panapton, nagtangis hira ha dako nga tingog, nagbutang hin mga agbon ha ira mga ulo,

40ngan nanngulob ha tuna. Han pagtunog han mga trompeta, nagsangpit an ngatanan ha dako nga tingog ngadto ha Ginoo.

41Niyan nagsugo hi Judas hin pira han iya mga tawo hin pagsulong han mga tawo didto han kota, samtang ginlilinisan niya an Templo.

42Nagpili hiya hin pira nga kapadian nga may-ada katakos ngan matinumanon han Balaod.

43Ira ginlinisan an Templo ngan ginkuha nira an ginpasipad-an nga mga bato ngan iginbutang ini didto hin usa nga dapit nga diri malinis.

44Naghiruhimangraw hira kon ano an angay pagbuhaton han altar hin mga halad nga tinubod, nga nahugawan na

45han mga Hentil, ngan nakahunahuna hira hin pagruba hini, basi diri ini tumindog didto nga usa nga hinumdoman han ira kaarawdan. Sanglit ginruba nira an altar

46ngan iginbutang nira an mga bato hini didto hin usa nga angay nga dapit ha pungtod han Templo, diin ginhimos ini tubtob nga may-ada pumakita nga usa nga manaragna ngan maglarang kon ano an maupay pagbuhaton hini.

47Niyan kinmuha hira hin diri tinabas nga mga bato, sumala han ginkinahanglan han Balaod ni Moises, ngan nagtindog hira hin usa nga bag-o nga altar nga sugad han daan.

48Gin-ayad nira an Templo, ha sakob ngan ha gawas, ngan ginbag-o hin paghalad an mga bungsaran hini.

49Naghimo hira hin bag-o nga mga garamiton para hin pagsingba ngan iginsulod ha Templo an burutangan han mga suga an altar hin insyenso, ngan an lamesa para han tinapay.

50Nagtubod hira hin insyenso dida han altar ngan gindagkotan an mga suga dida han burutangan, ngan nagkamay-ada kapawa didto han Templo!

51Iginbutang nira dida han lamesa an mga tinapay, igintaod an mga biray, ngan nahuman an ngatanan nga buruhaton.

52-54An ika-25 nga adlaw han ikasiyam nga bulan han Kisleb han tuig 148 amo an pagtagmo nga gindudumdom nira kay amo ani an adlaw nga ginpasipad-an han mga Hentil an altar. Dida hito nga adlaw iginhalad in usa nga halad nga tutuboron dida han bag-o nga altar ngan ginkanta in mga imno nga dinuyogan hin mga arpa, mga plauta, ngan mga gimbal.

55Nanyukbo ha tuna an ngatanan nga mga tawo ngan nagsingba ngan nagdayaw han Ginoo tungod han pagdarag-an nira.

56Nagsaurog hira han bag-o nga paghalad han altar sulod hin walo ka adlaw. Upod in dako nga pagrayhak nagdara hira hin mga halad nga tutuboron ngan naghalad hin mga halad hin pagkaurosa ngan mga halad hin pagpasalamat.

57Gin-adornohan nira an atubangan han Templo hin bulawan nga mga korona ngan mga taming, gin-ayad an mga ganghaan ngan an mga kwarto han kapadian ngan ira ginbutangan hin mga sada.

58Yana nga ginkuha na han mga Judiyo an kaarawdan nga gindara han mga Hentil, naghimo hira hin usa nga dako nga pagsaurog.

59Hira Judas, an iya kabugtoan, ngan han bug-os nga bungto nagsugo nga an pagbag-o han paghalad han altar kinahanglan pagsaurogon upod in usa nga pyesta hin pagrayhak ngan pagkalipay ha kada tuig, nga magtitikang dida han ika-25 nga adlaw han ikasiyam nga bulan han Kisleb ngan magpapadayon sulod hin walo ka adlaw.

60Niyan nagtindog hira hin higtaas nga mga pader ngan marig-on nga mga lantawan palibot han Bukid Sion, basi diri makasulod an mga Hentil hin pagpanamastamas ngan paghugaw na liwat ini.

61Ginbutangan ni Judas hin mga sondalo nga magbarantay han Templo. Iya liwat ginparig-on an bungto han Betsur, basi magkamay-ada usa nga balwarte nga naatubang ha Edumea an mga tawo han Israel.