Ester (Griego) 9 - Samarenyo Meaning-Based Bible (1984)（MBBSAM）

Ginpuo han mga Judiyo an Ira mga Kaaway

1Dida han ika-13 nga adlaw han Adar nga amo an adlaw nga igintalaan hin pagtuman han hadianon nga pasangyaw,

2an kaaway han mga Judiyo amo lugod an nagkamatay. Didto han Judiyo nga bahin han tagsa nga syudad han ginhadian nagkatirok an mga Judiyo pagsulong han bisan hin-o nga nagtinguha hin pagdaot ha ira. An mga tawo ha ngatanan nga dapit nahadlok han mga Judiyo ngan waray gud may naato ha ira.

3Ha pagkatinuod an ngatanan nga mga opisyal han lalawigan—mga gobernador, mga punoan, ngan mga tumindog han hadi naghatag hin katalahoran han mga Judiyo kay nahadlok hira ngatanan kan Mardoqueo.

4-5An ginpasangyaw nga sugo amo an nakapabantog han iya ngaran ha bug-os nga ginhadian.

6Didto ha Susa ngahaw nga kapital nga syudad pinamatay han mga Judiyo in 500 nga mga tawo,

7-10ngan gintikas an ira mga hiagi. Upod ha ira an napulo nga mga anak nga kalalaken-an ni Aman nga anak ni Hamedata, nga kaaway han mga Judiyo: hira Parsanestain, Delfon, Pasga, Paradata, Barea, Sarbaka, Marmasima, Aroupeus, Arseus, ug Sabouteus.

11Hito manta nga adlaw iginsumat han hadi an kadamo han mga tawo nga pinamatay didto ha Susa.

12Niyan nagsiring hiya kan Rayna Ester, “Didto la ha Susa pinanmatay han mga Judiyo in 500 nga mga tawo. Ano daw an ira nahimo didto han mga lalawigan! Sumati ako kon ano pa an imo karuyag, ngan ihahatag ko ha imo.”

13Binmaton hi Ester, “Tugoti an mga Judiyo nga buhaton nira liwat didto ha Susa buwas nga adlaw an itinugot mo ha ira hin pagbuhat yana nga adlaw. Ngan ipabitay didto ha biritayan an mga lawas han napulo nga mga anak ni Aman.”

14Tinmangdo an hadi ngan tinugotan an mga Judiyo nga ipakita ha kadam-an nga mga tawo an mga lawas han napulo nga mga anak nga kalalaken-an ni Aman.

15Dida han ika-14 nga adlaw han Adar, nagkatirok na liwat an mga Judiyo han Susa ngan pinamatay in 300 pa nga mga tawo didto han syudad. Kundi waray hira panikas.

16Nagkaurosa liwat an mga Judiyo didto han mga lalawigan ha pagpanalipod han ira kalugaringon. Ginpuo nira an ira mga kaaway pinaagi hin pagpatay hin 5,000 nga mga tawo dida han ika-13 nga adlaw han Adar. Kundi waray hira manikas.

17Dida han pagkabuwas nga ika-14 nga adlaw, waray na hira pamatay, ngan ginhimo nira ini nga malipayon nga adlaw hin pagkombite ug kaliawan.

18Kundi ginhimo han mga Judiyo didto ha Susa nga pyesta opisyal an ika-15 nga adlaw, tungod nga pinamatay nira an ira mga kaaway dida han ika-13 ngan ika-14 nga mga adlaw, ngan pinmahuway hira hin pamatay dida han ika-15.

19Amo ini nga ginsasaurog han mga Judiyo nga nag-uokoy didto han gudtiay nga mga bungto an ika-14 nga adlaw han bulan han Adar nga malipayon nga iglilihi nga adlaw, panahon hin pagkombite ngan paghinatagay hin mga regalo nga pagkaon, samtang an mga Judiyo didto han mga dagko nga syudad nagsasaurog hini nga iglilihi nga adlaw dida han ika-15 nga adlaw.

Gintukod an Pyesta han Purim

20Iginpasurat ni Mardoqueo ini nga mga hinabo ngan ginpadad-an niya hin mga surat an ngatanan nga mga Judiyo nga higrani ngan higrayo ha bug-os nga ginhadian han Persia,

21ha pagsumat ha ira nga kinahanglan pagsaurogon an ika-14 ngan ika-15 nga mga adlaw han Adar nga mga iglilihi nga adlaw kada tuig.

22Amo ini an mga adlaw nga ginpuo han mga Judiyo an ira mga kaaway. Pagsasaurogon liwat han mga Judiyo an bug-os nga bulan nga iglilihi kay amo ini an bulan nga nabalhin in panahon hin kabidoan ngan pagturaw ngadto hin panahon hin pagrayhak ngan pagkalipay. Gintugon hira hin pagsaurog hini nga mga adlaw pinaagi hin mga kombite ngan mga panagtawo, paghinatagay hin mga regalo nga pagkaon ngadto han ira kasangkayan, ngan ngadto han mga kablas.

23Sanglit ginsunod han mga Judiyo an kan Mardoqueo mga tugon.

24Iginpasurat ni Mardoqueo kon gin-unan-o ni Aman nga anak ni Hamedata nga taga-Macedonia, hin pakig-away niya kontra han ngatanan nga mga Judiyo, kon gin-unan-o an pagpasamwak niya hin sugo ngan hin pagripa basi hisabotan an adlaw nga pagpatay niya ha ira

25ngan kon gin-unan-o niya hin pagkadto han hadi hin paghangyo nga bitayon hi Mardoqueo. Kundi gin-antos ni Aman an amo nga kapalaran nga iya nahunahunaan para han mga Judiyo—ginbitay hiya ngan an iya mga anak didto han biritayan.

26-28Tungod han surat ni Mardoqueo, tungod han ngatanan nga ira gin-antos, ngan tungod han ngatanan nga nahinabo ha ira, kinarawat han mga Judiyo an sagdon ni Mardoqueo ngan nahimo nga turumanon nira, han ira mga tulin, ngan bisan hin-o nga magigin Judiyo, nga dida han angay nga panahon ha kada tuig pirme pagsasaurogon ini nga mga adlaw sugad nga hinumdoman tikang ha usa ngadto han sunod nga katulinan, didto han tagsa nga syudad, lalawigan ngan nasod. An mga Judiyo kinahanglan manumdom ngan magsaurog han mga adlaw han Purim ha ngatanan nga panahon nga tiarabot, ngan diri gud nira pagpabay-an. (Ini nga mga iglilihi nga adlaw ginngaranan nga Purim, kay an Purim ha ira pinulongan karuyag sidngon, “mga ripa”.)

29-30Niyan hi Rayna Ester nga anak ni Abinadab, upod hi Mardoqueo, an Judiyo, nagsurat han ira ginbuhat diin ibinutang an bug-os nga pagburot-an han rayna hin pagparig-on han surat hiunong han Purim.

31Hira nga duha amo an nagpatapod hin pagtindog han pyesta, ngan ira gud pagtutumanon bisan ano an umabot.

32Gintindog ni Rayna Ester an pyesta ha kadayonan, ngan ginhimo in usa nga sinurat nga babasahon mahitungod han iya opisyal nga sugo.