Deuteronomio 24 - Samarenyo Meaning-Based Bible (1984)（MBBSAM）

Turumanon Bahin hin Pagbulag hin Mag-asawa

1“Pananglit mangasawa hin babaye in usa nga lalake, ngan katapos diri na hiya maruyag han babaye kay hin-agian niya in diri niya naruruyagan hiunong ha iya. Makakahimo an lalake hin pagsurat hin pakigbulag ngan ighahatag ini niya ngadto han babaye, ngan paiiwason niya ha iya balay an babaye.

2Niyan pananglit pumaasawa ini nga babaye hin lain nga lalake,

3ngan katapos an ikaduha nga lalake diri na liwat maruyag hini nga babaye, magsusurat liwat hiya hin pakigbulag, ighahatag ini ngadto han babaye, ngan paiiwason ini nga babaye ha iya balay. O pananglit mamatay an iya ikaduha nga bana.

4Diri na hiya mahihimo pangasaw-on han iya syahan nga bana; iisipon han bana nga mahugaw hiya nga babaye. Kon pangasaw-on na liwat niya an babaye, makangangalas ini para han Ginoo. Ayaw kamo pagbuhat hin sugad ka makaharadlok nga sala didto han tuna nga ihahatag ha iyo han Ginoo nga iyo Dyos.

Iginhatag in Magkalainlain pa nga mga Balaod

5“Kon bag-o pa la nga nakaasawa in usa nga lalake, kinahanglan diri hiya papagsondalohon o papagbuhaton hin bisan ano nga katungdanan ha gobyerno; kinahanglan igawas hiya hin katungdanan sulod hin usa ka tuig, basi magpabilin hiya ha balay ngan makalipay han iya asawa.

6“Kon magpautang kamo ha usa ka tawo, ayaw niyo pagkuhaa nga garantiya an iya gilingan nga bato nga iya ginagamit hin paggiling han iya kakaonon. Usa ini nga pagkuha niyo han ginagamit han panimalay hin pag-andam han ira pagkaon basi mabuhi hira.

7“Kinahanglan patayon an bisan hin-o nga magpirit hin pagdara hin igkasi Israelita ngan paghimoon hiya nga iya oripon o igbaligya hiya ngadto hin pagkaoripon. Ha sugad hini nga paagi makukuha niyo ini nga karat-an ha iyo bungto.

8“Kon nag-aantos kamo hin makaharadlok nga sakit ha panit, kitaa gud nga talinguhaon niyo hin pagtuman han igintugon ha iyo han kapadian nga Levita; pagsunda niyo an mga tugon nga akon iginhatag ha ira.

9Hinumdomi niyo an ginbuhat han Ginoo nga iyo Dyos kan Miriam han paggawas niyo tikang ha Ehipto.

10“Kon magpautang kamo ha iyo igkasi tawo, ayaw kamo pagsulod han iya balay hin pagkuha han bado nga iya ighahatag ha iyo nga garantiya;

11hulat la kamo didto ha gawas ngan hiya an pahataga hini ha iyo.

12Kon kablas hiya nga tawo, ayaw ini pagtipigi ngada han pagkagab-i;

13ig-oli ini ha iya kada gab-i basi magamit ini niya hin pagkaturog. Niyan magpapasalamat hiya ngan malilipay ha iyo an Ginoo nga iyo Dyos.

14“Ayaw niyo paglimbongi in usa nga kablas ngan makalolooy nga sinuholan nga surugoon, bisan igkasi Israelita hiya o lumalangyaw nga nag-uokoy didto hin usa han iyo mga bungto.

15Ha kada adlaw nga diri pa natutunod an adlaw, baydi hiya han suhol han iya trabaho hito nga adlaw; ginkikinahanglan niya an kwarta ngan naghuhulat hiya hini. Kon diri niyo hiya baydan, masangpit hiya han Ginoo kontra ha iyo ngan magigin salaan kamo.

16“Diri papatayon an mga kag-anak tungod han sala nga ginbuhat han ira mga anak, ngan diri papatayon an mga anak tungod han sala nga ginbuhat han ira mga kag-anak; papatayon in usa ka tawo tungod han iya kalugaringon nga sala nga iya nabuhat.

17“Ayaw niyo pagkuhai han ira mga katungod an mga lumalangyaw ngan mga ilo; ngan ayaw pagkuhaa nga garantiya hin utang an bado hin balo nga babaye.

18Hinumdomi niyo nga mga oripon kamo didto ha Ehipto ngan gintalwas kamo han Ginoo nga iyo Dyos; sanglit iginhatag ko ha iyo ini nga sugo.

19“Kon mag-ani kamo han iyo mga tanom ngan may-ada nabayaan niyo nga iyo gin-ani, ayaw na niyo pagbalika ini; igbilin niyo ini para han mga lumalangyaw, mga ilo, ngan mga balo nga kababayen-an, basi bendisyonan kamo han Ginoo nga iyo Dyos han ngatanan nga iyo ginbubuhat.

20Kon nanguha na kamo han iyo mga olibo, ayaw na niyo pagbalika hin pagkuha adton mga nanhisalin; para na ini han mga lumalangyaw, mga ilo, ngan mga balo nga kababayen-an.

21Kon manguha na kamo han iyo mga ubas, ayaw na niyo pagbalika an mga puno hin panguha hin ikaduha; para na han mga lumalangyaw, mga ilo, ngan mga balo nga kababayen-an an mga ubas nga nahisalin.

22Ayaw niyo hingalimti nga mga oripon kamo didto ha Ehipto; sanglit iginhatag ko ha iyo ini nga sugo.