1 Samuel 22 - Samarenyo Meaning-Based Bible (1984)（MBBSAM）

Ginpuo an Syudad han Kapadian

1Kinmalagiw hi David tikang han syudad han Gat ngan kinmadto hiya hin usa nga lungib hirani han bungto han Adulam. Han paghibaro han iya kabugtoan ngan han iba han iya panimalay nga nakadto hiya, tinmampo hira ha iya.

2Kinmadto ha iya an mga tawo nga gintalumpigos, o mga utangan, o mga diskontento, mga 400 ka tawo ngatanan, ngan nahimo hiya nga ira pangulo.

3Tikang didto nagpadayon hi David ngadto ha Mispa didto ha Moab, ngan nagsiring han hadi han Moab, “Mahimo ba nga maanhi la anay an akon amay ug iroy ha imo tubtob han pakasabot ko han kaburot-on han Dyos ha akon?”

4Sanglit ibinilin ni David an iya mga kag-anak upod han hadi han Moab, ngan nag-ukoy hira didto samtang tinmago hi David didto han lungib.

5Niyan kinmadto kan David hi Gad nga manaragna ngan nagsiring, “Ayaw pag-ukoy dinhe; pakadto dayon han tuna han Juda.” Sanglit linmakat hi David ngan kinmadto hiya ha kagurangan han Haret.

6Usa ka adlaw nakadto hi Saul ha Gabaa, nalingkod hiya ha sirong hin usa nga kahoy nga tamarisko didto hin usa nga pungtod. Nakapot hiya hin bangkaw, ngan nag-aalirong ha iya an ngatanan niya nga mga opisyal. Ginsumatan hiya nga hinkit-an hi David ngan an iya mga tawo,

7ngan nagsiring hiya han iya mga opisyal, “Pamati kamo nga mga tawo ni Benjamin! Naghuhunahuna ba kamo nga tatagan kamo ngatanan ni David hin kaumhan ngan mga urubasan, ngan hihimoon kamo nga mga opisyal han iya kasondalohan?

8Amo ba ito an hinungdan nga nakahunahuna kamo hin paglingo ha akon? Waray usa ha iyo nga nagsumat ha akon nga an akon kalugaringon nga anak ngan hi David may-ada ginsabotan. Waray ha iyo nanginginlabot ha akon, o nagsusumat ha akon nga hi David, usa han akon mga tawo, namimiling yana hin usa nga higayon hin pagpatay ha akon, ngan gin-aghat hiya han akon anak!”

9Natindog didto hi Doeg nga taga-Edumea upod han mga opisyal ni Saul, ngan nagsiring hiya, “Hinkit-an ko hi David didto ha Nob han pagkadto niya kan Ahimelec nga anak ni Ahitub.

10Nagpakiana hi Ahimelec han Ginoo kon ano an angay pagbuhaton ni David, ngan katapos, gintagan niya hi David hin pagkaon ngan han espada ni Goliat nga Filisteohanon.”

11Sanglit iginpakuha ni Hadi Saul hi Ahimelec nga padi ngan an ngatanan niya nga kauropdan nga kapadian didto ha Nob. Kinmadto ini hira ha iya.

12Nagsiring hi Saul kan Ahimelec, “Pamati, Ahimelec!”

“Namamati ako ha imo,” binmaton hiya.

13Ginpakianhan hiya ni Saul, “Kay ano nga nagsabot man kamo ngan hi David hin pakig-away ha akon? Kay ano nga tinagan mo hiya hin pagkaon ngan hin usa nga espada ngan nagpakiana ka han Dyos para ha iya? Yana inmato na hiya ha akon, ngan naghuhulat na la hiya hin usa nga higayon hin pagpatay ha akon!”

14Binmaton hi Ahimelec, “Hi David amo an labi kamatinumanon nga imo opisyal! Kalugaringon mo hiya nga umagad, kapitan han imo mga gwardya ngan tinahod gud han ngatanan didto han imo palasyo.

15Tinuod, nagpakiana ako han Dyos para ha iya, ngan diri ini syahan pa la. Hiunong hin paglarang hin paglingo ha imo, diri mo ako angay igsumbong, Harangdon nga Hadi, o bisan hin-o han akon panimalay. Waray gud ako hini hinbabaroan.”

16Nagsiring an hadi, “Ahimelec, kinahanglan mamatay ka ngan an ngatanan mo nga kauropdan!”

17Niyan ginsiring niya an mga gwardya nga natukdaw hirani ha iya, “Pamataya niyo an kapadian han Ginoo! Nakigsarabot hira kan David, ngan waray ako pagsumati nira nga kinmalagiw hiya, bisan kon maaram na hira nga daan hini.” Kundi dinmiri an mga gwardya hin pagpatay han kapadian han Ginoo.

18Sanglit nagsiring hi Saul kan Doeg, “Ikaw an pagpatay ha ira!”—ngan pinamatay hira ngatanan ni Doeg. Hito nga adlaw iya ginpatay in 85 nga kapadian nga may katungod hin pagsul-ot han efod.

19Iginpapatay liwat ni Saul an ngatanan nga mga umurokoy han Nob nga syudad hin kapadian: kalalaken-an ngan kababayen-an, kabataan ngan mga minasus-an, kabakahan, kaasnohan, ngan kakarnerohan—pinamatay hira ngatanan.

20Kundi nakapalagiw hi Abiatar nga usa han mga anak nga kalalaken-an ni Ahimelec, ngan kinmadto hiya ngan tinmampo kan David.

21Iginsumat niya kan David an pagpataya ni Saul han kapadian han Ginoo.

22Nagsiring ha iya hi David, “Han paghikit-i ko kan Doeg hito nga adlaw, maaram ako nga magsusumat gud hiya kan Saul. Sanglit ako an may baratonon han kamatayon han ngatanan mo nga kauropdan.

23Pabilin ha akon ngan ayaw kahadlok. Karuyag ni Saul hin pagpatay ha aton nga duha, kundi waray mahinanabo ha imo samtang upod ka ha akon.”