Ezequiel 37 - Samarenyo Meaning-Based Bible (1984)（MBBSAM）

Nagkabubuhi an Uga nga mga Tul-an

1Inmabat ako nga an Ginoo aanhi ha akon, ngan gindara ako han iya espiritu ngan iginbutang ako didto hin usa nga kahamub-an nga luob hin mga tul-an.

2Iginlibot ako niya han kahamub-an, ngan hinkit-an ko nga damo hin duro an mga tul-an ngan duro na hin ka mga uga.

3Nagsiring hiya ha akon, “Anak hin tawo, mabubuhi pa ba ini nga mga tul-an?”

Binmaton ako, “Ikaw la an makakabaton hito; Ginoo nga Dyos!”

4Nagsiring hiya, “Ipanagna ngadto han mga tul-an. Sidnga ini nga uga nga mga tul-an nga mamati han pulong han Ginoo.

5Sidnga ini nga nasiring ako nga Ginoo nga Dyos: Maginhawa ko ngada ha iyo ngan bubuhion ko kamo.

6Tatagan ko kamo hin mga ugat ngan mga kusog, ngan puputson ko kamo hin panit. Giginhawaan ko kamo hin gininhawa ngan bubuhion ko kamo. Niyan makilala kamo nga ako amo an Ginoo.”

7Sanglit nanagna ako sumala han iginsugo ha akon. Han nagyayakan ako, hinbatian ko in linagatak nga aringasa, ngan nagtikang pagturugkop an mga tul-an.

8Samtang nagkikinita ako, naputos hin mga ugat ngan mga kusog an mga tul-an, ngan naputos liwat hin panit. Kundi waray ginhawa dida ha ira.

9Nagsiring ha akon an Dyos, “Anak hin tawo, panagna an hangin. Sidnga an hangin nga nagsusugo an Ginoo nga Dyos, nga guminhawa hiya ngadto hini nga patay nga mga lawas, basi mabuhi hira.”

10Sanglit nanagna ako sumala han iginsugo ha akon. Nagkamay-ada gininhawa an mga lawas. Nabuhi hira ngan nanindog. Igo an ira kadamo hin usa ka hugpo hin kasondalohan.

11Nagsiring ha akon an Dyos, “Anak hin tawo, sugad an mga tawo han Israel hini nga mga tul-an. Nasiring hira nga uga na hira, nga waray na gud paglaom, ngan waray na kabubwason.

12Sanglit panagna ngadto han akon mga tawo, an Israel, ngan sidnga hira nga bubuksan ko, an Ginoo nga Dyos, an ira mga lubnganan. Igagawas ko hira ngan ibabalik hira ngadto han tuna han Israel.

13Kon buksan ko na an mga lubnganan nga ginlubngan han akon mga tawo ngan mahigawas na hira, makilala hira nga ako amo an Ginoo.

14Giginhawaan ko hira, bubuhion ko hira, ngan pauokyon ko hira didto han ira kalugaringon nga tuna. Niyan makilala hira nga ako amo an Ginoo. Nagsaad ako nga pagbubuhaton ko ini—ngan pagtutumanon ko gud. Ako nga Ginoo an nagyakan.”

Gin-usa nga Ginhadian an Juda ug Israel

15Naghimangraw na liwat ha akon an Ginoo.

16Nagsiring hiya, “Anak hin tawo, kuha hin lipak hin kahoy ngan surati ini han mga pulong, ‘An ginhadian han Juda.’ Niyan kuha hin lain nga lipak ngan surati ini han mga pulong, ‘An ginhadian han Israel.’

17Niyan kapti an duha nga lipak ngan tugkopa an mga kataposan basi masugad na la ini hin usa nga lipak pagkit-on.

18Kon pakianhan ka han imo mga tawo han kahulogan hini,

19sidnga hira nga kukuhaon ko, an Ginoo nga Dyos, an lipak nga natindog han Israel ngan itatampo ko ini han lipak nga natindog han Juda. Hihimoon ko nga an duha nga lipak mausa na la nga lipak dinhe ha akon kamot.

20“Kon an duha nga mga lipak nga sinuratan imo na kaptan, ngan hikit-an ini han mga tawo,

21sumati hira nga kukuhaon ko, an Ginoo nga Dyos, an ngatanan ko nga mga tawo tikang han mga nasod nga ira hinngadtoan, titirokon ko hira, ngan ibabalik ko hira ngadto han ira kalugaringon nga tuna.

22Pag-uusahon ko hira nga nasod dida han tuna, didto han kabukiran han Israel. Uusa na la an hadi ha ira ngatanan ngan diri na gud hira magkakaduha nga mga nasod, o magkakaduha nga mga ginhadian.

23Diri na hira maghuhugaw ha ira ngahaw pinaagi hin magpakapupungot nga mga diyosdiyos o hin ira mga sala. Tatalwason ko hira tikang han ngatanan nga mga paagi hin pagpakasala ngan paglingo ha akon. Paglilinisan ko hira; magigin akon hira mga tawo, ngan magigin Dyos ako nira.

24Magigin hadi nira in usa nga hadi nga sugad kan David nga akon surugoon. Magigin usa hira ngatanan ha ubos hin usa nga punoan ngan magsusugot hira nga matinumanon han akon mga balaod.

25Mag-uokoy hira didto han tuna nga gin-ukyan han ira kaapoy-apoyan, an tuna nga akon iginhatag ngadto kan Jacob nga akon surugoon. Didto mag-uokoy hira ha kadayonan, ngan sugad man an ira mga anak ngan an ngatanan nira nga mga tulin. Maghahadi ha ira ha kadayonan in usa nga hadi nga sugad kan David nga akon surugoon.

26Maghihimo ako ha ira hin ginsabotan nga magpapasarig han ira dayon nga kahimyangan. Paririg-onon ngan padadamoon ko hira, ngan tatalinguhaon ko nga magpabilin ha kadayonan an akon Templo didto han ira tuna.

27Mag-uokoy ako didto upod ha ira; magigin Dyos ako nira, ngan magigin akon hira mga tawo.

28Kon ibutang ko na didto an akon Templo nga mahitatampo ha ira ha kadayonan, niyan mahibabaro an mga nasod nga ako nga Ginoo amo an nagpili han Israel nga magin akon kalugaringon nga nasod.”