Tobit 3 - Samarenyo Meaning-Based Bible (1984)（MBBSAM）

Nag-ampo hi Tobit

1Nahiubos ngan naawod ako hin duro ngan igintangis ko an akon kabidoan. Niyan, ginpudngan ko an akon mga luha ngan nag-ampo ako:

2“Matadong ka, O Ginoo!

Malolooyon ka ha ngatanan nga imo mga buhat.

Matinumanon ka ha ngatanan nga imo mga paagi.

Ikaw an maghurukom hini nga kalibutan.

3-4Nakikimalooy ako ha imo,

kalooyi intawon ako.

Ayaw ako pagkastigoha tungod han akon mga sala;

Bisan an mga sala nga diri ako maaram.

Inmato an akon kaapoy-apoyan

ngan sinmupil han imo mga sugo.

Kundi ayaw ako pagkastigoha tungod han ira mga sala.

Itinugot mo nga an amon mga tawo,

panikasan han ira mga butang.

Nga ighalin hira nga mga bihag ngan magkamatay.

Ginhimo mo nga susbaranan han amon mga tawo.

Nga hira amo an himalang-an han pagtamay ug pagyubit.

Didto ha mga nasod nga ginpasarangan ha ira.

5Masukot mo paghukman an akon mga ginikanan,

tungod han ira mga sala;

ngan ginkastigo mo ako tungod han akon liwat mga sala.

Naglingo kami ha imo ngan ginsalikway namon an imo mga sugo;

sanglit matadong gud man an imo pagkastigo ha amon.

6“Yana ikaw an labi maaram,

kon uunanhon ako nimo.

Kuhaa an akon kinabuhi basi maanaw na ako dinhe ha tuna.

Pabalika an akon lawas ngadto ha tuna.

Gabay pa lugod nga mamatay ako.

Nag-antos ako hin mga pakaalo nga diri angay ha akon.

Ngan nawarayan na gud ako hin paglaom.

Ginoo, pagsugo na—

Taposa na an akon kasamokan.

Dad-a na ako ngadto han akon dayon nga pagpahuway.

Ayaw isalikway an akon pag-ampo.

Gabay ako mamatay kay mabuhi hin paghingalooy,

ngan umatubang ako hin sugad nga mga pagpakaalo.”

Nagmasulob-on hi Sara

7Hito ngahaw nga adlaw didto ha syudad han Ecbatana han Media, nahinabo nga hi Sara, an anak ni Raguel, ginpakaalohan hin usa han mga kababayen-an nga surugoon han iya amay.

8Nakapito pakaasawa hi Sara kundi diri pa ngani nahuhuman an kasal ginpapatay na ni Asmodeus, an maraot nga yawa, an tagsa nga bana ni Sara. Nagsiring kan Sara an babaye nga surugoon, “Ikaw nga paropamatay hin bana! Siplat ha imo ngahaw! Nagkamay-ada ka na pito nga bana kundi waray usa ha ira nga nahilungon ha imo hin maiha basi makahatag ha imo hin anak nga lalake.

9Kay ano nga kami an imo ginbabasol hini? Kay ano nga diri ka makadto hin pagtampo han imo mga patay nga bana? Waray namon paglaom na makita kami hin imo anak!”

10Duro an kabido ni Sara nga namiligaybigay an iya mga luha. Sinmaka hiya ngan karuyag gud niya hin paghikog. Kundi kahuman pagpainoinoha niya ini, nagsiring hiya ha iya ngahaw, “Diri ko bubuhaton ini! Pagpapakaalohan han mga tawo an akon amay ngan masiring hira, ‘May-ada ka la usa nga anak nga babaye nga labis an imo paghigugma ha iya kundi naghikog hiya kay makalilisang an iya kabidoan.’ Babalonon han akon lagas nga amay in sugad nga kasakitan ngadto han iya lubnganan ngan ako an pagsasalaon hini. Diri ako mag-uunay; hahangyoon ko la an Ginoo nga mamatay na la ako. Niyan diri na ako makakabati han mga pakaalo.”

Nag-ampo hi Sara

11Niyan tinmukdaw hi Sara ha may bintana, ginbayaw an iya mga kamot ha pag-ampo ngan magsiring,

“Malolooyon nga Dyos, takos ka han amon pagdayaw.

Dayuday pagpasidunggan unta an imo ngaran.

Dayawon ka unta ha kadayonan han ngatanan nga imo mga binuhat.

12“Ginoo, naayop ako ha imo hin pakibulig.

13Igyakan an pulong ngan talwasa ako hini nga kinabuhi;

ngan diri na ako makakabati hini nga mga pakaalo.

14Maaram ka, Ginoo,

nga uray pa ako nga daraga.

Waray pa ako kadum-iti hin bisan hin-o nga lalake.

15Waray pa ako magpakaalo ha akon ngahaw

ngan han ngaran han akon amay,

samtang nag-uokoy pa kami nga mga bihag didto hini nga tuna.

Waray iba nga anak an akon amay nga iya magigin-sumurunod;

ngan waray bisan ano nga uropod nga akon maaasawa.

Nawad-an na ako hin pito nga bana,

kinahanglan pa ba nga mabuhi ako?

Kundi diri nimo buot hin pagkuha han akon kinabuhi.

Ipakita gad, Ginoo, an imo kalooy ha akon.

Ayaw na gad liwat ako pabatia hini nga mga pagpakaalo!”Pinamatian an Pag-ampo ni Tobit ug Sara

16Samtang nag-aampo hira Tobit ug Sara, pinamatian han Dyos ha langit an ira pag-ampo,

17ngan ginsugo hi Rafael nga iya anghel hin pagbulig ha ira. Ginsugo hi Rafael hin pagkuha han bulog han mata ni Tobit basi makakita na liwat hi Tobit ngan hin pagtuhay han pag-asawa nira Sara ug Tobias nga anak ni Tobit, nga tungod kay iya patod, may-ada katungod hi Tobias hin pangasawa kan Sara. Ginsugo liwat hi Rafael hin pagpaiwas han yawa nga hi Asmodeus dida kan Sara. Ha amo nga takna nga sinmulod hi Tobit han iya balay tikang ha bungsaran, linmusad liwat hi Sara ha iya balay didto ha Ecbatana.