Judit 11 - Samarenyo Meaning-Based Bible (1984)（MBBSAM）

1Pagsiring hi Holofernes kan Judit, “Ayaw kabaraka; diri na kinahanglan nga mahadlok ka. Waray ko pa ginpasakitan nga bisan hin-o nga karuyag hin pag-alagad kan Nabucodonosor nga hadi han bug-os nga kalibutan.

2Bisan yana, kon waray la an imo mga tawo didto han kabukiran magpakaalo ha akon, diri unta ako nakikig-away ha ira. Hira ngahaw an naglugaring hin pagdara hini ngatanan nga kasamokan.

3Kundi sumati ako, kay ano nga binmaya ka ha ira ngan kinmanhi ka ha amon? Waray maglalabot ha imo dinhe. Ayaw na kahadlok. Amon gintalwas an imo kinabuhi yana nga gab-i, ngan diri ka sadang mabaraka para han tiarabot.

4Waray tawo dinhe nga magdadaot ha imo; pag-aabiabihon ka hin maupay han ngatanan, sugad han ngatanan nga mga surugoon han akon agaron nga hi Nabucodonosor.”

5Niyan nagsiring hi Judit kan Holofernes, “Tugoti ako hin paghimangraw ha imo, akon ginoo, ngan alayon pamati han akon igsisiring. Igsusumat ko ha imo an kamatuoran.

6Kon pagsundon mo an akon igsasagdon, magbubuhat ha imo an Dyos hin dako nga butang, ngan diri kakawangon han akon Ginoo an iya nahunahunaan.

7Kay nagsusumpa ako ha imo hangranan han kinabuhi ug kusog ni Nabucodonosor nga hadi han bug-os nga kalibutan, nga nagsugo ha imo hin pagdara hin katuhayan ngadto han ngatanan nga mga sakop han iya ginhadian, nga diri la mga tawo an mag-aalagad ha iya, kundi tungod ha imo, bisan an ihalas nga kamanampan, an kahayopan, ngan an katamsihan nagsusugot ha iya. Tungod ha imo magmamainuswagon hi Nabucodonosor ngan an bug-os niya nga ginhadian.

8Hinbatian namon an imo kinaadman ngan an imo kalisto. Maaram an bug-os nga kalibutan nga ikaw an labi katakos, kabatid, ngan kamaaram nga heneral ha bug-os nga Asiriahanon nga ginhadian.

9Gintalwas han mga tawo han Betulia hi Aquior, ngan iya iginsumat ha amon an iya iginsiring didto han iyo Labaw nga Hukmanan.

10Alayon, sir, ayaw igsalikway hin dalidali an iginsumat ha iyo ni Aquior, kundi painoinoha ini hin tinuod, kay matuod ini. Waray makakadaot o makakadaog han amon mga tawo labot kon makasala hira kontra han ira Dyos.

11“Kundi diri ka mag-aantos hin bisan ano nga kapakyasan o makakawang an imo gintutuyo. Kon makasala an mga Israelita ngan mapungot an Dyos ha ira, magkakamatay hira.

12Naubos na an ira pagkaon ngan kon haros waray na nira tubig, sanglit nakahunahuna na hira hin pangihaw han ira kahayopan ngan pagkaon han igindidiri han Balaod han Dyos hin pagpakaon ha ira.

13Nakahunahuna na hira hin pagkaon hin trigo nga iginggahin tikang han una nga inani ngan han mga ikanapulo nga bahin han bino ug lana, nga mga baraan ini ngan iginahin para la han kapadian nga nag-aalagad han Dyos didto ha Jerusalem. An iba ha amon diri tinutugotan hin pagkamkam hini nga baraan nga pagkaon,

14kundi tungod kay ginsupak na man ini nga balaod han mga tawo ha Jerusalem, nagpasugo an mga tawo han amon bungto ngadto han Labaw nga Hukmanan ha Jerusalem hin paghangyo nga buhaton namon sugad han ira ginbuhat.

15Dida han adlaw nga karawton nira an pagtugot hin pagkaon ngan ira gud man ini kaonon, makakahimo kamo hin pagpatay ha ira.

16Han paghibaro ko la hiunong hini, kinmalagiw ako tikang han akon mga tawo. Ginsugo ako han Dyos hin pagbuhat ha imo hin usa nga butang nga makakapahiburong han ngatanan nga mga tawo ha bug-os nga kalibutan nga makabati hiunong hini.

17Sir, usa ako nga masingbahon nga babaye; ginsisingba ko an Dyos ha langit adlaw gab-i magpapabilin ako dinhe han imo kampo, ngan kada gab-i magawas ako ngadto han kahamub-an hin pag-ampo ngadto sa Dyos, ngan susumatan ako niya kon nakasala na ba an mga Israelita.

18Kon makasabot ako, makanhi ako ngan susumatan ko ikaw, ngan makakasulong ka na upod an bug-os mo nga kasondalohan. Diri makakahimo an mga Israelita hin pagpanalipod ha ira ngahaw kontra ha imo.

19Pag-uunhan ko ikaw hin paglatas ha butnga han tuna han Juda tubtob han pag-abot naton ha Jerusalem, diin pagkokoronahan ko ikaw nga hadi didto ha butnga han syudad. Pagsasarangon mo an mga tawo ha Jerusalem sugad hin mga karnero nga waray magmarangno. Waray ngani bisan usa nga ayam nga magpapasipara hin pag-usig ha imo. Iginpadayag nga daan ha akon han Dyos ini nga mga butang, ngan ginsugo ako niya hin pagsumat hini ha imo.”

20Nalipay hi Holofernes ngan an iya mga surugoon han iginsiring ni Judit, ngan gindayaw nira an iya kinaadman.

21Manhinsiring ha ira, “Amo gud ikaw an may-ada hitaas in hibaro ngan gimamahusayi nga babaye ha kalibutan.”

22Niyan nagsiring ha iya hi Holofernes, “Maupay gud ini nga ginsugo ka han Dyos nganhi hin pagdara ha amon hin pagdarag-an ngan pagpuo hadton mga nagpakaalo kan Hadi Nabucodonosor.

23Diri la kay mahusay ka, kundi maaram ka pa mamulong. Kon buhaton mo sumala han imo iginsaad, matoo ako han imo Dyos. Mag-uokoy ka didto han palasyo ni Hadi Nabucodonosor ngan magigin bantogan ka ha bug-os nga kalibutan.”