Deuteronomio 22 - Samarenyo Meaning-Based Bible (1984)（MBBSAM）

1“Kon hikit-an niyo nga nakabuhi in baka o karnero hin iyo igkasi Israelita, ayaw ini pagpabay-i; ig-oli ini ngadto han tag-iya.

2Kundi kon hirayo hin duro an tag-iya hini o diri ka maaram kon hin-o an tag-iya hini, dad-a ini ha imo balay. Kon umabot an tag-iya nga nagbibiling hini, ighatag ini ha iya.

3Amo man gihapon kon hiagian mo in usa nga asno, o panapton o bisan ano nga nawara hin imo igkasi Israelita.

4“Kon natumba in asno o baka hin imo igkasi Israelita, ayaw ini pagpabay-i; buligi hiya hin pagpatukdaw liwat han iya hayop.

5“Diri magsul-ot an kababayen-an hin kanan kalalaken-an panapton, ngan sugad man an kalalaken-an diri magsul-ot hin kanan kababayen-an panapton; nangangalas an Ginoo nga iyo Dyos hin mga tawo nga nagbubuhat hin sugad.

6“Kon hiagian niyo in salag hin tamsi didto hin kahoy o dida ha tuna nga may iroy nga tamsi nga naluob dida han iya mga bonay o han iya mga piso, ayaw niyo pagdad-a an iroy nga tamsi.

7Madadara niyo an mga piso, kundi kinahanglan buhian niyo an iroy nga tamsi, basi mabuhi kamo hin maiha ngan mainuswagon nga kinabuhi.

8“Kon magtindog kamo hin bag-o nga balay, talinguhaa nga iyo pagbutangan hin ulang an barisbisan han atop. Niyan diri na kamo pagsasalaon kon may mahulog ngan mamatay.

9“Ayaw niyo pasirongi hin lain nga mga tanom an iyo mga urubasan; kon pagbuhaton ini niyo, diri tugot ha iyo in paggamit han mga ubas o han mga abot han ginpasirong nga tanom.

10“Ayaw niyo pagpadisa hin pag-arado in baka ug asno.

11“Ayaw kamo pagsul-ot hin dugnit nga ginhimo hin barahibo hin karnero ug lino, nga gin-usa la hin paghablon.

12“Tahii niyo hin mga puntiyas dida han upat nga mga kanto han iyo mga panapton.”

Igintutdo an mga Balaod hiunong hin Pagkauray

13“Pananglit in usa nga lalake mangasawa hin babaye, ngan katapos diri na hiya maruyag hini nga iya asawa;

14tungod hini, pagbubutangbutangan ngan igsusumbong niya nga diri hiya uray han pag-asawa nira.

15“Kon mahinabo ini, dadad-on han mga kag-anak han babaye an dugoon nga taplak han ira pagkasal nga nagpapamatuod nga uray an babaye, ngan ipapakita ini nira didto ha hukmanan ngadto han mga pangulo han bungto.

16Masiring ha ira an amay han babaye, ‘Iginpaasawa ko hini nga lalake an akon anak nga babaye, ngan yana diri na hiya naruruyag ha iya.

17Ginbutangbutangan niya an akon anak nga diri hiya uray han pangasaw-a niya ha iya. Kundi iini an saksi nga uray an akon anak nga babaye; kitaa ini nga dugoon nga taplak han pagkasal!’

18Niyan kukuhaon han mga pangulo han bungto an bana ngan paglalatobon hiya.

19Pagmumultahan liwat hiya hin usa ka gatos ka bug-os nga salapi ngan ighahatag an kwarta ngadto han amay han babaye kay ginpakaalohan han lalake in usa nga Israelita nga babaye. Labot pa, magpapadayon nga iya asawa an babaye ngan diri na gud an lalake makakabulag ha iya samtang buhi pa hiya.

20“Kundi kon matuod an sumbong ngan waray man saksi nga uray an babaye,

21niyan dadad-on nira an babaye ngadto han agian han balay han iya amay, diin pagbabatoon hiya han kalalaken-an han iya syudad ngada han iya kamatay. Ginbuhat niya in makaarawod nga butang dida han aton mga tawo pinaagi hin pakighilawas nga waray pa hiya pangasaw-a, samtang nag-uokoy pa hiya didto han balay han iya amay. Ha sugad hini nga paagi makukuha niyo ini nga karat-an ha iyo bungto.

22“Kon hidakpan in usa nga lalake nga nakikighilawas hin asawa hin lain nga lalake, papatayon hira nga duha. Ha sugad hini nga paagi makukuha niyo ini nga karat-an ha iyo bungto.

23“Pananglit hidakpan in usa nga lalake didto hin bungto nga nakikighilawas hin babaye nga may kasabot na nga iba nga lalake.

24Iyo dadad-on hira nga duha ngadto ha gawas han bungto ngan pagbabatoon hira ngada han kamatay nira. Papatayon an babaye kay waray hiya gumoliat hin pakibulig bisan kon nakadto hiya ha sakob han bungto nga hibabatian unta hiya. Ngan papatayon an lalake kay nakighilawas hiya hin babaye nga may kasabot na. Ha sugad hini nga paagi makukuha niyo ini nga karat-an ha iyo bungto.

25“Pananglit maglugos in usa nga lalake didto ha kaumhan hin babaye nga may kasabot na nga lain nga lalake. Niyan an lalake la an papatayon.

26Diri paglalabtan an babaye kay waray hiya makasala hin sala nga angay hin kamatayon. Sugad ini nga kaso hin usa ka tawo nga dinmasmag hin lain nga tawo ngan ginpatay hiya.

27Ginlugos han lalake didto ha kaumhan an may kasabot na nga babaye, ngan bisan kon ginmoliat hiya hin pakibulig, waray gud tawo nga makakabulig ha iya.

28“Pananglit hidakpan in usa nga lalake nga naglulugos hin usa nga babaye nga waray pa igkasabot hin lalake.

29Pagbabaydan han lalake an amay han babaye han prisyo hin karaslon nga babaye nga 50 ka bug-os nga salapi, ngan magigin asawa hiya han lalake, kay ginpirit hiya hin pakighilawas ha iya. Diri na gud hiya makakabulag han babaye samtang buhi pa hiya.

30“Waray tawo nga magpakaalo han iya amay pinaagi hin pakighilawas han bisan hin-o han mga asawa han iya amay.