1 Samuel 20 - Samarenyo Meaning-Based Bible (1984)（MBBSAM）

Binuligan ni Jonatan hi David

1Niyan kinmalagiw hi David ha Naiot didto ha Rama, ngan kinmadto hiya kan Jonatan. Nagpakiana hiya, “Ano ba an akon nabuhat? Ano an akon sala? Ano nga sayop an akon nabuhat han imo amay nga karuyag man niya hin pagpatay ha akon?”

2Binmaton hi Jonatan, “Diri unta itugot han Dyos nga patayon ka! Iginsusumat ha akon han akon amay an ngatanan nga binubuhat niya, maimportante ini o diri, ngan waray gud niya iginlilirong ha akon. Diri gud ini matuod.”

3Kundi binmaton hi David, “Sayod gud an imo amay han imo pagmahal ha akon, ngan diri hiya karuyag magsumat ha imo han iya bubuhaton, kay mabibido ka hin duro. Nagsusumpa ako ha imo pinaagi han buhi nga Ginoo nga haraniay na ako ha kamatayon!”

4Nagsiring hi Jonatan, “Tutumanon ko an bisan ano nga imo karuyag.”

5Binmaton hi David, “Buwas amo an Pyesta han Bag-o nga Subang han Bulan, ngan kinahanglan nga makigsaro ako han hadi. Kundi kon maupay ini para ha imo, tugoti ako hin pagtago didto ha uma ngada han pagkasangbuwas han gab-i.

6Kon iliwon ako han imo amay, sumati hiya nga nagsarit ako ha imo hin pagdali ngadto ha Betlehem, kay panahon ini han tinuig nga paghalad didto han akon bug-os nga panimalay.

7Kon sumiring hiya, ‘Maupay man,’ waray kahadlokan ko; kundi kon masina hiya, hibabaroan mo nga magtitinguha gud hiya hin pagpatay ha akon.

8Kundi kalooyi ako ngan tumana an iginsumpa mo ha akon. Kundi kon salaan man ako, ikaw na la an pagpatay ha akon! Kay ano nga dadad-on mo pa ako ngadto han imo amay basi patayon ako?”

9Binmaton hi Jonatan, “Ayaw gad paghunahuna hin sugad! Kon hinbaroan ko la nga may tuyo an akon amay hin pagpatay ha imo, diri ko ba ikaw pagsusumatan?”

10Sanglit nagpakiana hi David, “Hin-o man in magpapahibaro ha akon kon mangisog an imo amay hin pagbaton ha imo?”

11Binmaton hi Jonatan, “Tana, pakadto kita ha kaumhan.” Sanglit kinmadto hira,

12ngan nagsiring hi Jonatan kan David, “Maaton unta saksi an Ginoo nga Dyos han Israel! Ha sugad hini nga takna buwas ngan sangbuwas pakikianhan ko an akon amay. Kon maupay an iya paghunahuna ha imo, pahibabaroon ko ikaw.

13Kon magtuyo hiya hin pagpatay ha imo, patayon unta ako han Ginoo kon diri ko ikaw pahibaroon hini basi makapalagiw ka. Umupod unta ha imo an Ginoo sugad han iya pag-upod han akon amay!

14Ngan kon buhion pa ako, tumana gad an imo iginsumpa ngan unongi ako; kundi kon mamatay ako,

15igpakita an amo ngahaw nga imo pagmahal han akon panimalay ha kadayonan. Ngan kon pagpuohon na han Ginoo an ngatanan mo nga kaaway,

16diri la unta gihapon mabungkag an aton ginsaaran. Kon mabungkag ini, kakastigohon ka han Ginoo.”

17Ha makausa pa ginpasaad ni Jonatan hi David hin paghigugma ha iya, kay ginhigugma ni Jonatan hi David sugad han iya paghigugma ha iya ngahaw.

18Niyan nagsiring ha iya hi Jonatan, “Tungod nga Pyesta man han Bag-o nga Subang han Bulan buwas, iiliwon ka kon waray ka didto han pangaon.

19Ha pagkasangbuwas labi na gud nga iiliwon ka; sanglit pakadto han dapit nga gintagoan mo han una, ngan tago ha luyo han tinambak nga mga bato didto.

20Niyan mapana ako ngan pupontingon ko ito nga dapit hin makatulo.

21Niyan pakakadtoon ko an akon surugoon pamiling han mga pana. Ngan kon sidngon ko hiya, ‘Kitaa, aadi didi an mga pana hini nga ligid ha imo, kuhaa ini,’ karuyag sidngon hito nga waray na kataragman ngan makakagawas ka. Nagsusumpa ako pinaagi han buhi nga Ginoo nga waray mo sadang kahadlokan.

22Kundi kon sidngon ko hiya, ‘Aadto an mga pana ha imo luyo,’ lakat dayon, kay ginpapalakat ka han Ginoo.

23Mahitungod han ginsaaran naton, an Ginoo an maaram nga tutumanon ta ini ha kadayonan.”

24Sanglit tinmago hi David didto han uma. Dida han Pyesta na han Bag-o nga Subang han Bulan, kinmadto hi Hadi Saul hin pagkaon,

25ngan linmingkod hiya dida han iya hin-aaraan nga dapit ha may bungbong. Linmingkod hi Abner sapit ha iya ngan hi Jonatan tugbang ha iya. Waray nalingkod dida han dapit ni David,

26kundi waray la mag-aringasa hi Saul hito nga adlaw, kay naghunahuna hiya, “May nahinabo ha iya, ngan diri pa hiya malinis sumala han seremonyas.”

27Han pagkabuwas, an sunod nga adlaw han Pyesta han Bag-o nga Subang han Bulan, waray la gihapon nalingkod dida han dapit ni David, ngan nagpakiana hi Saul kan Jonatan, “Kay ano nga waray kumanhi hi David han pangaon kakulop o yana?”

28Binmaton hi Jonatan, “Nagsarit hiya ha akon nga makadto hiya ha Betlehem. Nagsiring hiya,

29‘Tugoti gad ako hin pagkadto, kay nagsasaurog an amon panimalay han pyesta hin paghalad didto ha bungto, ngan nagsugo ha akon an akon bugto nga kumadto gud ako. Sanglit, kon sangkay ko man ikaw, tugoti ako hin pagkadto ngan pakigkita han akon mga kauropdan.’ Amo ito nga waray hiya dida han iya dapit dinhe han imo lamesa.”

30Napungot hin duro hi Saul kan Jonatan ngan ginsiring hiya, “Anak ka hin masinupilon ngan malingo nga iroy! Yana maaram na ako nga naugop ka kan David, ngan ginpapakaalohan mo la an imo kalugaringon ngan ito nga iroy mo!

31Diri ka ba maaram nga samtang buhi pa hi David, diri ka gud mahihimo nga hadi hini nga nasod? Kadto na, ngan dad-a hiya nganhi—kinahanglan mamatay hiya!”

32Binmaton hi Jonatan, “Kay ano nga papatayon hiya? Ano an iya nabuhat?”

33Dida hito, ginbangkaw ni Saul hi Jonatan hin pagpatay ha iya, ngan sinmabot hi Jonatan nga tuyo gud ni Saul hin pagpatay kan David.

34Binmuhat hi Jonatan ha lamesa nga napupungot gud ngan waray gud hiya kumaon hito nga adlaw—an ikaduha nga adlaw han Pyesta han Bag-o nga Subang han Bulan. Duro gud an iya kabido hiunong kan David, kay ginpakaalohan hi David ni Saul.

35Han pagkaaga kinmadto hi Jonatan ha uma hin pakigkita kan David, sumala han ira sabot. Ginpaupod niya in usa nga bata nga lalake,

36ngan ginsiring niya, “Dalagan ngan pamilnga an mga pana nga akon iginpunting.” Dinmalagan an bata ngan ipinunting ni Jonatan an pana ha unhan niya.

37Han pag-abot han bata ngadto han dapit nga nahulogan han pana, ginmoliat hi Jonatan, “Aadto pa ha unhan an pana!

38Ayaw pagtinukdaw la dida! Dali!” Ginpurot han bata an pana ngan iginbalik ini ngadto han iya agaron,

39nga waray gud hiya kalibutan han karuyag sidngon; hi Jonatan ngan hi David la an maaram.

40Iginhatag ni Jonatan an iya mga hinganiban ngadto han bata ngan ginpauli niya ngadto ha bungto.

41Han paghilakat na han bata, binmuhat hi David ha luyo han tinambak nga mga bato, linmuhod, ngan yinmukbo ha tuna makatulo. Magkasi nagtatangis hira David ug Jonatan nga naghaharokay; darodako ngani an kabidoan ni David kay han kan Jonatan.

42Niyan nagsiring hi Jonatan kan David, “Maada unta ha imo an Dyos. Kikitaon gud han Ginoo nga tutumanon ha kadayonan an aton ginsumpaan nga ginhimo nimo ngan nakon, ngan han imo ngan akon mga tulin.” Niyan linmakat hi David, ngan binmalik hi Jonatan ngadto ha bungto.