Sirac 22 - Samarenyo Meaning-Based Bible (1984)（MBBSAM）

An Kahubya ug An Kalurongan

1-2An hubya nga tawo diri ngani sugad han baya hin mananap; mabaho hiya nga waray gud napahirani ha iya.

3Makaarawod para han amay kon may-ada niya anak nga diri disiplinado labi na kon babaye ini nga anak.

4An may-ada buot nga anak nga babaye magbibiling hiya hin bana, kundi an waray alo nga babaye makakabido la han iya amay.

5An babaye nga waray alo ikinaaawod han iya amay ug bana; diri hiya pagtatahoron nira.

6An pagmaymay mo han imo mga anak, kon usahay diri naaasya, sugad la hin pag-awit ngadto hin mga masulob-on nga tawo, kundi an paglamba amo in usa nga maupay nga pagdisiplina ha bisan ano nga panahon.

7An pagtutdo hin usa nga lurong sugad la hin pagturugkop hin buong nga daba, sugad hin pagpukaw hin usa nga hinmumuokan.

8An pagsaysay ngadto hin usa nga lurong sugad la ini hin pagsaysay ngadto hin pinipiraw nga tawo; kahuman nimo pagyakan, masiring ini hiya, “Ano ngani an imo ginyinakan?”

11Nagmamasulob-on kita han mga minatay tungod kay diri na man hira makakakita han kapawa. Kinahanglan nga magmasulob-on kita han mga lurong kay kulang man hira hin pagsabot. Ngani, kinahanglan matugob kita hin kamasulob-on para han mga lurong kay an ira kinabuhi maraotraot pa kay han kamatayon. An mga minatay napahuway na.

12Masulob-on kita sulod hin pito ka adlaw tungod hin minatay, kundi an lurong ug waray pagkahadlok han Dyos nga mga tawo nakakahatag ha aton hin kabidoan ha bug-os naton nga kinabuhi.

13Ayaw pagduaw ug pagkinaragi an imo panahon hin pakighimangraw ha ira. Pahirayo ha ira; ngan diri hira makakadarahig ha imo ngan makakaukoy ka nga malinawon hin waray magsasamok ug magguguol ha imo pinaagi han ira mga patuyaw nga buhat.

14In sugad nga mga tawo maburubug-at pa pagdad-on kay hin timga ngan “mga lurong” an angay gud la nga pulong para ha ira.

15Masarusayon pa an pagdara hin usa ka pundok nga baras, asin ug puthaw kay hin pag-antos han kalurongan hin tawo.

16An usa nga troso nga madig-on an kataod ngada hin balay diri matatanggal hin linog; in usa nga tawo mahimo nga tutdoan hin paggamit han iya pangatadungan ug an maupay nga kaburot-on ngan diri hiya magugupong ngan malilisang kon maabot na an kakurian.

17An usa nga tawo nga maaram maggamit han iya hunahuna sugad hiya hin madig-on nga pader nga sinabongan hin maupay.

18An gudti nga mga bato ha bawbaw han pader mapapalid kon hanginon; an tawo kanay mga linurong nga panhunahuna amo an nakapaawod ha iya diri makakatindog hin maupay kon umabot in makalilisang nga mga higayon.

An Pagkasarangkay

19Kon maduklat an imo mga mata, magpapanluha ka; ngan kon dako an imo pakabido hin usa nga tawo, ipapasabot ha imo an iya tinuod nga pagbati.

20Kon labayon mo hin bato in mga tamsi, malupad hira hin pagkalagiw; ngan kon pakaalohan mo in usa nga sangkay, mabubungkag an iyo pagkasangkay.

21-22Bisan kon mapaso an imo pakiglantugi hin usa mo nga sangkay ngan matarom an imo mga pulong, diri mawawara an ngatanan. Makakahimo ka pa hin pakigtuhay ha iya. Kundi bubulagan ka han imo sangkay kon magpakaalo ka, kon magpakahin-o ka, kon igbuyagyag mo an iya mga tinago o kon paglinibakon mo hiya ha iya talikoran.

23Talinguhaa nga tumapod ha imo an imo amyaw dida ha iya kakablasan; niyan makakaangbit ka han iya kalipayan kon magmainuswagon na hiya. Ayaw hiya bayai ha iya mga kakurian kon karuyag mo nga may-ada mo hiangbitan ha iya ha pag-abot hin mauruupay nga panahon.

24Nag-uuna hin pagpakita an alindanga ug aso san-o an kalayo; nauuna an pagpakaalo san-o an paggamit hin kusog.

25Diri gud ako mahahadlok hin pagpanalipod hin sangkay ngan diri tatalikdan in sangkay kon hiya magkinahanglan ha akon.

26Kon mag-antos ako tungod ha iya, adton mahibaro hini, maghihirot na ha iya.

Pangamuyo hin Panabang Kontra han Sala

27Karuyag ko unta nga kabantayan an akon baba, basi an akon mga im-im diri na magpasagad hin mga waray hinungdan nga mga pulong. Makakabulig ini ha akon hin paglikay hin mga sayop ngan hin pagdaot ha akon ngahaw pinaagi han akon dila.