1Natikang ini nga kasaysayan hadto nga panahon han pagsulong tikang ha Macedonia ni Alejandro Magno, nga anak ni Felipe han Macedonia, ngan han pakig-away niya kan Dario nga hadi han Persia ug Media. Ginpahiluag ni Alejandro an Griego nga katunaan pinaagi han pakadaog niya kan Dario ngan han pag-agawa niya han iya trono.
2Damo nga pag-awayan an inatubang ni Dario, nga nakabihag hiya hin mga syudad nga may madig-on nga mga lantawan, ngan pinamatay niya an kahadian hito nga mga dapit.
3Samtang nagtipaunhan hiya ngadto han mga sidsid han tuna, iya ginpuo in damo nga mga nasod: ngan han pagkadaog na niya han kalibutan, nagmapahitas-on ngan nagpalabilabi hiya.
4Pinaagi hin pagtindog hin usa nga makusog nga hugpo hin kasondalohan, iya ginsakop in bug-os nga kanasoran ngan an ira mga pangulo, ngan ginpugos an tagsatagsa hin pagbayad ha iya hin buhis.
5-7Katapos ni Alejandro mag-emperador sulod hin dose ka tuig, nasakit hiya ngan nakasabot nga mapatay na hiya. Iya gintirok an iya mga heneral, mga dagko nga pagkatawo nga katubo niya tikang pa han iya pagkabata, ngan iya ginbahinbahin an iya ginhadian, nga gintagan hin bahin an tagsa ha ira.
8Han kamatay na ni Alejandro, an mga heneral na an nagdumara,
9ngan an kada usa ha ira nagpakorona nga hadi han iya kalugaringon nga katunaan. Naghadi an mga sumusunod hini nga kahadian sulod hin damo nga katulinan ngan nagdara hin dagko nga kakurian dinhe ha kalibutan.
Hi Antioco Epifanes ngan an Maglingo nga mga Judiyo10Hi Antioco Epifanes, an mabangis nga pangulo, amo an anak ni Hadi Antioco Tercero han Siria. Usa hiya nga tulin han usa han mga heneral ni Alejandro. Nagin usa nga bihag didto ha Roma hi Antioco Epifanes san-o hiya mahimo nga hadi han Siria han tuig 137.
11Hadto nga panahon may-ada didto han tuna han Israel in usa ka hugpo hin mabudhion nga mga Judiyo nga waray pagtahod han Balaod ngan nakadarahig hin damo nga mga tawo. Nagsiring hira, “Pakisangkay kita han mga Hentil, kay an aton pagdumiri hin pakig-urosa ha ira waray nahimo kundi an kasamokan la.”
12Naruyag hini nga sagdon in damo nga mga tawo,
13ngan may-ada pira ha ira in nasindak hin duro nga kinmadto hira han hadi ngan gintugotan hira hin pagsunod han mga pamatasan han mga Hentil.
14Nagtindog hira didto ha Jerusalem hin usa nga murolayan sugad hadton didto han mga syudad nga Griego.
15Nagpaopera hira hin pagtago han ira tinurian, ginsalikway nira an baraan nga ginsaaran, ngan nagtikang hira hin pakig-urosa han mga Hentil, ngan nagbuhat han ngatanan nga magraot nga mga butang.
Ginsulong ni Antioco an Ehipto16Han marig-on na an pagkahadi ni Antioco nakahunahuna hiya hin pagsulong han Ehipto ngan paghadi hito nga nasod sugad man han Siria.
17Iya ginsulong an Ehipto pinaagi hin damo nga mga barko ngan makusog nga kasondalohan, lakip in mga karuwahe, mga elipante, ngan dikabayo nga mga sondalo.
18Han pagsulong nira, kinmalagiw hi Hadi Tolomeo han Ehipto, ngan pinamatay in damo han iya mga sondalo.
19Naagaw ni Antioco an mga syudad han Ehipto ngan pinanikasan an bug-os nga tuna.
Ginpakurian ni Antioco in mga Judiyo20Dida han tuig 143, katapos kaagaw an Ehipto, ginsulong ni Antioco, upod in usa nga dako nga hugpo hin kasondalohan, an tuna han Israel ngan an syudad han Jerusalem.
21Ha iya pagpalabilabi, ginsulod niya an templo ngan ginkuha niya an altar nga bulawan, an lamparahan upod an ngatanan nga kasangkapan hini,
22an lamesa para han tinapay nga iginhalad ngadto han Ginoo, an mga kupa ngan mga makaong, an bulawan nga mga karukaraha, an biray, ngan an mga korona. Iya liwat pinanlaknit an bulawan dida ha atubangan han Templo,
23ngan gindara an salapi ug bulawan ngan an ngatanan nga mahal nga mga butang, lakip an ngatanan nga mga manggad nga iya hin-agian nga ginhipos didto.
24Niyan iya ini ngatanan gindara ngadto han kalugaringon niya nga nasod. Iya liwat pinamatay in damo nga mga tawo ngan naghinambog pa hiya mahitungod hini.
25Nagkamay-ada dako nga kasubo ha ngatanan nga mga dapit ha tuna han Israel.
26Nagharoy tungod hin kabido an mga punoan ngan mga pangulo.
Linmuya an batan-on nga kalalaken-an ngan kababayen-an.
Naglubad an kahusay han aton kababayen-an.
27Nagkanta hin masulob-on nga kanta an kalalaken-an nga karaslon,
ngan nagkalingkod nga mabidoon didto han ira kwarto an kababayen-an nga karaslon.
28Naputos hin kaawod an ngatanan naton nga mga tawo,
ngan nangurog tungod ha ira an aton tuna.
29Paglabay hin duha ka tuig nagpadara hi Antioco hin usa nga dako nga hugpo hin kasondalohan tikang ha Misia kontra han mga bungto han Judea. Han pagsulod ha Jerusalem han mga sondalo,
30nakighimangraw han mga tawo, an ira kapitan nga ginpatapod hira ngan an iya tuyo amo an kalinaw ngan nalimbongan gud hira niya. Niyan tigda la nga ginsulong nira an syudad, nga gintiupay gud ini hin paghampaka ngan pinamatay in damo nga mga tawo.
31Iya gintikasan an syudad, ginsunog pa ini, ngan ginruba an mga kabablayan ngan mga pader.
32Gindara niya ngan han iya kasondalohan an kababayen-an ngan an kabataan nga mga priso, ngan gin-agaw nira an kabakahan.
33Niyan nagtindog hi Antioco ngan an iya mga kasondalohan hin higtaas nga mga pader ngan magrig-on nga mga lantawan didto han amihan nga dapit han Templo, nga ginhimo ini nga usa nga kota.
34Ira ginpasulod in usa nga hugpo hin magbudhion nga mga Judiyo ngan didto iginpahimutang hira.
35Ira liwat iginsulod in mga hinganiban ngan mga garamiton, ngan ginhimos didto han kota an ngatanan nga mga tinikas nga ira nakuha didto ha Jerusalem. Nahimo ini nga balwarte nga usa nga dako nga kataragman para han syudad.
36Usa nga kataragman para han Templo an kota,
usa nga dayon nga maraot nga tarhog para han Israel.
37Pinamatay palibot han altar in waray sala nga mga tawo;
ginhugawan hin mga parapamatay an Baraan nga Dapit.
38Nanngalagiw ha kahadlok an mga tawo han Jerusalem,
ngan nahimo an syudad nga usa nga urokyan hin mga lumalangyaw.
Diri na kinikilala an Jerusalem han iya kalugaringon nga mga tawo,
nga ginpugos hin pagpabaya han syudad.
39Sugad na hin usa nga kamingawan hin kamahawan an iya Templo;
nahimo nga mga adlaw hin kasubo an iya mga pyesta,
ngan kaarawdan an iya kalipay han Adlaw nga Iparahuway.
Nahimo nga usa nga pataraw-an nga butang an iya kadungganan.
40An iya kaarawdan, sugad kadako han iya una nga kabantogan,
ngan an iya pagkamapahitas-on nahimo nga labis nga kasubo.
41-43Nagpagawas na hi Antioco hin usa nga pasangyaw nga kinahanglan bayaan na han ngatanan nga mga nasod han iya ginhadian an kalugaringon nira nga mga pamatasan ngan mahimo na hira nga usa nga bungto. Tinmubyan ngadto hini nga pasangyaw an ngatanan nga mga Hentil ngan bisan pa ngani in damo han mga Israelita sinmugot hini nga sugo. Ira ginkarawat an opisyal nga tuloohan nga pagano, naghalad hin mga halad nga tinubod ngadto hin mga diyosdiyos, ngan waray na magtuman hira han Adlaw nga Iparahuway.
44Nagsugo liwat an hadi hin mga magsarangyaw ngan dara nira in mga surat ngadto ha Jerusalem ngan ngatanan nga mga bungto han Judea, nga nagsusugo han mga tawo hin pagpasunod hin lain nga mga pamatasan han ira nasod.
45Iya ginsugo hira hin diri na paghalad didto han Templo hin mga halad nga tinubod, mga halad nga pagkaon, o mga halad nga bino, ngan ginsugo hira nga pag-isipon an mga Adlaw nga Iparahuway ngan an mga iglilihi nga adlaw nga sugad na la hin ordinaryo nga mga adlaw hin pagbuhat.
46Ginsugo pa ngani hira hin paghugaw han Templo ngan han baraan nga mga butang.
47Ginsugo hira hin pagtindog hin pagano nga mga altar, mga templo, ngan mga arampoan, ngan paghalad hin mga baboy ngan iba nga maghugaw nga kamanampan didto.
48Gindid-an hira hin pagtori han ira mga anak nga kalalaken-an ngan ginkinahanglan hira nga magmahugaw hira ha diri pagtuman han seremonyas ha ngatanan nga paagi nga ira mahimo,
49basi hingalimtan nira an Balaod nga iginhatag han Ginoo pinaagi kan Moises ngan pagsupakon nira an ngatanan nga mga sugo.
50Kamatayon an ihahatag nga sirot para hadton magsupak han sugo han hadi.
51Diri la nga nagpagawas an hadi han amo ngahaw nga pasangyaw ha bug-os niya nga ginhadian, kundi nagtudlok liwat hiya hin mga opisyal nga magtitimangno han mga tawo ngan ginsugo an kada bungto didto ha Judea nga maghalad hin pagano nga mga halad nga tinubod.
52Andam in damo nga mga Judiyo hin pagbaya han Balaod ngan pagsugot hini nga mga opisyal. Ginhugawan nira an tuna pinaagi han ira karat-an,
53ngan an ira maraot nga buhat nakapugos han ngatanan nga matuod nga mga Israelita hin pagtago ha bisan diin nga dapit tubtob han ira mahimo.
54Dida han ika-15 nga adlaw han bulan han Kisleb han tuig 145, iginpahimutang ni Hadi Antioco an “Makaharadlok nga Taran-awon” dida han altar han Templo, ngan gintindog in pagano nga mga altar didto han mga bungto ha bug-os nga Judea.
55Iginhalad in pagano nga mga halad nga tinubod ha atubangan hin kabablayan ngan didto han kakalsadahan.
56Ginggisi ngan ginsunog in bisan ano nga mga basahan han Balaod nga hin-agian,
57ngan ginpatay, ha pagsugo han hadi, an bisan hin-o nga hidakpan nga may-ada kopya han baraan nga mga basahan o nagsugot han Balaod.
58Bulan-bulan ginamit hini nga magraot nga mga tawo an ira gahom kontra han mga Israelita nga hindakpan didto han mga bungto.
59Dida han ika-25 nga adlaw han bulan naghalad ini ngahaw nga magraot nga mga tawo hin mga halad nga tinubod dida han pagano nga altar nga gintindog ha bawbaw han altar didto han Templo.
60Ginpatay sumala han pasangyaw han hadi an mga iroy nga tinmugot hin pagpatori han ira mga minasus-an.
61Iginpakwentas an ira mga patay nga minasus-an ha ira liog ngan pinamatay an mga sakop han ira panimalay ngan adton mga nagtori ha ira.
62Kundi damo nga mga tawo didto ha Israel in sinmupil han pasangyaw han hadi ngan dinmiri hin pagkaon han diri malinis sumala han seremonyas.
63Gabay la hira mamatay kay hin pagsupak han baraan nga ginsaaran ngan hin pagkaon han diri malinis ngan damo gudman an nagkamatay.
64Tungod han kasina han Dyos, makalilisang an iya ginpaantos han Israel.
Who We AreWhat We EelieveWhat We Do
2025 by iamachristian.org,Inc All rights reserved.
