1Kay ano nga ipinaparayaw mo an imo karat-an, kusgan nga tawo?
Dayon an kanan Dyos kamatinumanon.
2Naglalarang ka ha bug-os nga adlaw ha pagdaot hin iba nga mga tawo;
pareho hin matarom nga labaha an imo dila.
Dayuday ka naghihinimohimo hin mga buwa.
3Hinihigugma mo an maraot labaw han maupay
ngan an pagbuwa labaw han kamatuoran.
4Naruruyag ka hin pagdaot hin mga tawo pinaagi han imo mga pulong, ikaw nga buwaon!
5Sanglit pupukanon ka ha kadayonan han Dyos;
kakaptan ka niya ngan aagawon ka tikang han imo balay;
kukuhaon ka niya tikang han kalibutan han mga buhi.
6Hikikit-an ini han magtadong
nga mga tawo ngan mahahadlok hira;
niyan pagtataw-an ka nira ngan masiring,
7“Kitaa, iini in tawo nga waray tumapod han Dyos sugad nga iya arayopan,
kundi sinmarig la lugod han iya dako nga karikohan
ngan nangita hin karig-onan dida han iya pagkamaraot.”
8Kundi sugad ako hin kahoy nga olibo nga naturok ha balay han Dyos.
Nasarig ako han iya dayuday
nga paghigugma hin kadayonan.
9Dayuday pasasalamatan ko ikaw,
Dyos, tungod han imo ginbuhat;
ha atubangan han imo mga tawo
igsasangyaw ko an imo pagkamaupay.
Who We AreWhat We EelieveWhat We Do
2025 by iamachristian.org,Inc All rights reserved.
