17 Nagpakiana an hadi, “Ano ngani, Ester? Sumati ako kon ano an imo karuyag ngan tatagan ta ikaw—bisan han katunga ini han akon ginhadian.”
18 Binmaton hi Ester, “Yana nga adlaw amo in usa nga mahinungdanon nga adlaw para ha akon. Kon makalipay ini han akon ginoo, karuyag ko unta dapiton ikaw ngan hi Aman nga akon mga bisita niyan nga gab-i didto hin usa nga bangkite nga akon gin-aandam para ha iyo.”
19 Sanglit nagsugo an hadi nga kumadto dayon ha iya hi Aman, basi magin bisita hira ni Ester. Sanglit kinmadto an hadi ngan hi Aman han bangkite ni Ester.
20 Han nag-iinom hira, ginsiring na liwat han hadi hi Ester, “Sumati ako kon ano an imo karuyag, Rayna Ester.”
21 Binmaton hi Ester,
22 “Kon malolooy an akon agaron hin paghatag han akon hangyo, karuyag ko unta nga magin akon bisita hi ikaw ngan hi Aman buwas didto hin lain nga bangkite nga akon pag-aandamon para ha iyo. Masusugad gud la hini adto nga bangkite.”
Naglarang hi Aman hin Pagpatay kan Mardoqueo23 Han pagbaya na ni Aman han hadi, malipayon hiya ngan maupay an iya buot tubtob han paghikit-i niya kan Mardoqueo nga Judiyo didto han bungsaran han palasyo. Nakapapungot ini ha iya,
24 kundi nagpadayon hiya hin pag-uli. Niyan gindapit niya an iya kasangkayan ngadto han iya balay ngan ginhangyo niya hi Zares nga iya asawa nga tumapo ha ira.
25 Pinmarayaw hiya ha ira nga riko na hiya ngan ginpasidunggan hiya han hadi dida han pagtungdi ha iya hin hitaas nga katungdanan, ngan han paghimoa ha iya nga primero ministro.
26 “Labaw pa hini,” nagpadayon hi Aman, “naghatag hi Rayna Ester hin bangkite para gudla han hadi ngan ha akon, ngan ginadapit gihapon kami niya para buwas.
27 Kundi waray la ini kaupayan ha akon samtang nga hinkikit-an ko pa ito nga Judiyo nga hi Mardoqueo nga nalingkod dida han aragian han palasyo.”
28 Sanglit nagsiring an iya asawa ngan an ngatanan niya nga kasangkayan, “Kay ano nga diri ka magpatindog hin biritayan nga 22 ka metros an kahitaas? Buwas han aga makakahangyo ka han hadi nga bitayon hi Mardoqueo, ngan makakakadto ka nga malipayon han bangkite.”
Naghunahuna hi Aman nga maupay ini nga larang, sanglit iginpatindog niya an biritayan.
Who We AreWhat We EelieveWhat We Do
2025 by iamachristian.org,Inc All rights reserved.
