1Hito nga panahon may-ada usa nga padi han panimalay ni Joyarib nga ginngaranan nga Matatias nga anak ni Juan ngan apo ni Simeon. Binmalhin hiya tikang ha Jerusalem ngan nag-ukoy didto ha Modin.
2May-ada hi Matatias lima nga mga anak nga kalalaken-an: hira Juan (nga gintawag liwat nga Gaddi),
3Simon (nga gintawag liwat nga Tassi)
4Judas (nga gintawag liwat nga Macabeo),
5Eleazar (nga gintawag liwat nga Avaran), ug Jonatan (nga gintawag liwat nga Appo).
6Han pakakita ni Matatias han ngatanan nga mga sala nga ginbuhat didto ha Judea ug Jerusalem,
7nagsiring hiya:
“Kay ano nga natawo ako hin pagkita hini nga makalilisang nga mga butang,
han pagkabungkag han akon nasod ngan han baraan nga syudad?
Kinahanglan ba nga lumingkod la ako dinhe nga waray nahihimo
samtang igintutubyan na an syudad ngadto han mga kaaway
ngan aagawon na an Templo han mga lumalangyaw?
8An Templo sugad hin usa ka tawo nga waray kadungganan.
9Ginpanikas na an iya magtahom nga mga garamiton.
Pinamatay na didto han kakalsadahan an amon kabataan,
ngan an amon kaulitawhan pinaagi han espada han kaaway.
10Gin-ukyan an syudad han tagsa nga nasod ha kalibutan
ngan gintikasan hiya han iya mga hiagi.
11Gin-agaw ha iya an ngatanan niya nga mga rayandayan;
usa na hiya nga oripon yana, ngan diri na talwas.
12Tan-awa an amon Templo nga ginhugawan han mga Hentil,
nga gin-ubosan hin pagkuhai han ngatanan nga kamaanyag niya.
13Kay ano nga magpapadayon pa man kita hin kabuhi?”
14Dida han ira kabidoon, ginggisi nira Matatias ngan han iya mga anak an ira mga panapton, nagbado hira hin sako ngan nagpadayon hin tugob nga kamasulob-on.
15Niyan an mga opisyal han hadi nga nagpugos han mga tawo hin pagbaya han Dyos kinmadto han bungto han Modin basi piriton nira an mga tawo didto hin paghalad hin pagano nga mga halad nga tutuboron.
16Tinmapo ha ira in damo han mga Israelita, lakip hi Matatias ngan an iya mga anak.
17Nagsiring kan Matatias an mga opisyal han hadi, “Usa ka nga tinahod nga pangulo dinhe hini nga bungto, ngan binuligan ka han imo mga anak ngan mga kauropdan.
18Kay ano nga diri ka mag-una hin pagbuhat han iginsugo han hadi? An ngatanan nga mga Hentil, an mga tawo han Judea, ngan an ngatanan nga mga tawo nga nanhisalin didto ha Jerusalem nagtuman na han sugo. Kon pagbuhaton mo ini, papasidunggan ka ngan an imo mga anak hin pagtawaga ha iyo nga ‘Kasangkayan han Hadi,’ ngan babaloson ka hin salapi ug bulawan ngan damo nga mga regalo.”
19Binmaton hi Matatias ha dako nga tingog, “Saho kon nagsugot na han hadi an ngatanan nga mga Hentil dinhe hini nga ginhadian ngan tinmubyan na ngadto han sugo hin pagbaya han tuloohan han ira kaapoy-apoyan.
20Magpapadayon an akon mga anak, akon mga kauropdan ngan ako hin pagtuman han ginsaaran nga ginhimo han Dyos ha amon kaapoy-apoyan.
21Pinaagi han bulig han Dyos diri gud kami mabaya han Balaod o masupak han iya mga sugo.
22Diri kami magsusugot han pasangyaw han hadi ngan diri namon pagliliwaton an amon paagi hin pagsingba bisan magutiay.”
23Han kahuman la niya paghimangraw, naglarang in usa ka tawo nga taga-Modin hin pagsugot han pasangyaw han hadi, ngan kinmadto hiya ha atubangan han ngatanan hin paghalad hin usa nga pagano nga halad nga tutuboron dida han altar nga natindog didto.
24Han paghikit-i ha iya ni Matatias, nasina hi Matatias hin duro nga ginbuhat niya an angay pagbuhaton. Samtang nangungurog hiya hin kapungot, dinmalagan hiya ha atubangan ngan ginpatay niya an tawo didto gud han altar.
25Ginpatay liwat niya an opisyal han hadi nga nagpirit han mga tawo hin paghalad, ngan kahuman ginruba niya an altar.
26Dida hini nga paagi iginpakita ni Matatias an iya tinuod nga pagmahal han Balaod, sugad han ginbuhat ni Pinehas han pagpataya niya kan Simri nga anak ni Salu.
Nagigirilya hi Matatias27Niyan nagsudoy han bungto hi Matatias nga naggogoliat, “Sumunod ha akon an ngatanan nga matinumanon han ginsaaran han Dyos ngan nagsusugot han iya Balaod!”
28Tungod hini pinmalagiw ngadto ha kabukiran hiya ngan an iya mga anak, ngan ginbayaan an ngatanan nga ira hiagi.
29-30Hito liwat nga panahon damo han mga Israelita nga nagtalinguha nga magin matadong sa Dyos pinaagi hin pagsugot han Balaod, in kinmadto hin pag-ukoy ha kamingawan, dara an ira mga anak, mga kaasaw-an, ngan an ira kahayopan, tungod han makalilisang nga pagraogdaog nga ira gin-antos.
31Nakaabot dayon an sumat ngadto han mga opisyal han hadi ngan han mga sondalo didto han kota han Jerusalem nga nangalagiw ngadto ha kamingawan hin pagtago an pipira nga mga tawo nga inmato han hadi.
32Ginlanat ini hira hin usa ka hugpo hin kasondalohan, hin-abtan hira, nagkampo tugbang ha ira, ngan nag-andam hin pagsulong ha ira ha Adlaw nga Iparahuyaw.
33Ginggoliatan nira an mga Judiyo, “May-ada pa niyo panahon. Pagkagawas kamo ngan pagsugot han sugo han hadi, ngan tatalwason namon an iyo kinabuhi.”
34Binmaton hira, “Diri kami magkakagawas. Diri kami magsusugot han sugo han hadi, ngan diri namon pagpapasipad-an an Adlaw nga Iparahuway.”
35Ha gilayon ginsulong hira han mga sondalo,
36kundi waray umato an mga Judiyo; waray ngani hira maglabay hin bato o mag-ulang han mga aragian ngadto han mga lungib nga ira gintagoan.
37Nagsiring hira, “Magkakamatay kami ngatanan nga malinis an amon konsyensya. Saksi an langit ug tuna nga diri matadong an iyo panmatay ha amon.”
38Sanglit ginsulong hira han kaaway ha Adlaw nga Iparahuway ngan pinamatay an kalalaken-an, an ira kaasaw-an, an ira kabataan, ngan an ira kahayopan. Nagkamatay in 1,000 nga mga tawo.
39Han pakabati ni Matatias ngan han iya kasangkayan han nahinabo, nagmabidoon hira hin duro
40ngan may hinsiring ha ira, “Kon sugaron naton pagbuhat han ginbuhat hini nga aton igkasi mga Judiyo, ngan diri kita umato han mga Hentil ha pagpanalipod han aton kinabuhi ngan han aton tuloohan, diri maiha mapupuo kita ha bawbaw han tuna.”
41Hito ngahaw nga adlaw nagkasarabot hira nga kon may-ada sumulong ha ira ha Adlaw nga Iparahuway, ira aatohan ha pagpanalipod han ira kalugaringon, basi diri magkamatay hira ngatanan sugad han ira igkasi mga Judiyo nga nagkamatay didto han mga lungib.
42Niyan tinmampo kan Matatias ngan han iya kasangkayan in usa ka hugpo hin mag-inampoon ngan mag-inugopon han bungto nga mga Judiyo, an duro kamagkusog ngan kamag-isog nga mga tawo ha Israel, ngan ha ira kaburot-on binmulig hira hin pagpanalipod han Balaod.
43Labot hini, tinmampo ha ira an ngatanan nga kinmalagiw tungod han pagpakurii ha ira, ngan nagmakusog an ira hugpo hin kasondalohan.
44Yana nga may-ada na hira kasondalohan, ira na inuyonan an ira kasina pinaagi hin pagsulong nira han magtalumpigoson nga mga Judiyo. Adton nagpakakalagiw napirit hin paglikay ngadto han mga Hentil para han ira katalwasan.
45Kinmadto hi Matatias ngan han iya kasangkayan ha ngatanan nga dapit hin pagruba ngan han pagano nga mga altar,
46ngan ginpirit nira hin pagtori an ngatanan nga diri pa tinori nga kabataan nga ira hin-agian ha sakob han mga pag-ultan han Israel.
47Ira liwat hindakpan an mga mapahitas-on nga Hentil nga mga opisyal.
48Ira nabawi an Balaod ni Moises tikang han mga Hentil ngan han ira kahadian, ngan naagaw nira an gahom han maraot nga Hadi Antioco.
Namatay hi Matatias49Han tikamaratay na hi Matatias, nagsiring hiya ha iya mga anak, “Mga panahon ini hin kasamokan ngan kakurian. Aada kita ha ubos han gahom han mapahitas-on nga mga tawo ngan gin-iinintrimisan la kita nira.
50Kundi kamo, mga anak ko, kinahanglan pagmahalon niyo an Balaod ngan maandam kamo hin pagpakamatay ha pagpanalipod han ginsaaran han Dyos ha aton kaapoy-apoyan.
51Hinumdomi an ginbuhat han aton kaapoy-apoyan ngan kon ano an ira nahimo ha ira panahon. Sunda an ira susbaranan, ngan babaloson kamo hin dako nga himaya ngan hin bantog nga diri hingangalimtan.
52Hinumdomi kon gin-unan-o ni Abraham hin pagsalig han Ginoo han pagsarihi ha iya, ngan kon gin-unan-o nga an Ginoo nalipay ha iya ngan kinarawat hiya.
53Hi Jose, ha iya panahon hin kakurian, nagsugot han mga sugo han Dyos ngan nahimo hiya nga punoan han tuna han Ehipto.
54Hi Pinehas nga aton ginikanan, tungod han iya mapaso nga paghigugma, ginsaaran nga an iya mga tulin ubos magigin mga padi.
55Ginhimo hi Josue nga usa nga maghurukom ha Israel kay ginsugot niya an sugo ni Moises.
56Ibinalik ni Caleb in maupay nga sumat ngadto han bungto, ngan gintagan hiya hin usa ka bahin han tuna nga usa nga balos ha iya.
57Ginhimo nga hadi hi David ngan ginsaaran hiya nga an iya mga tulin ubos magigin mga hadi tungod han iya padayon nga kamaunongon sa Dyos.
58Hi Elias, tungod han iya dako nga pagmahal han Balaod, ikinayab ngadto ha langit.
59Gintalwas tikang han kalayo hira Ananias, Azarias, ug Misael tungod han ira makusog nga pagtoo.
60Hi Daniel usa ka tawo nga matadong, ngan gintalwas hiya han Ginoo tikang han baba han mga liyon.
61Himoa nga susbaranan an tagsa hini nga aton kaapoy-apoyan, ngan hisasabtan mo nga an tawo nga nasarig han Ginoo diri kukulangan hin kusog.
62Ayaw kamo kahadlok han mga pagtarhog hin usa nga maraot nga tawo. Hinumdomi nga mapatay hiya ngan matatapos an ngatanan niya nga kaanyag ngan kakaonon hin mga ulod an nadudunot niya nga lawas.
63Yana bangin pinasidunggan hiya, kundi buwas diri na hiya hikikit-an, mabalik ha tuna an iya lawas ngan matatapos an iya mga tinguha.
64Kundi kamo, mga anak ko, magmaisog ngan magmadasigon kamo ha pag-ugop han Balaod, kay pinaagi han Balaod nga maaangkon niyo in dako nga kadungganan.
65“Hi Simon nga iyo bugto may-ada kinaadman, sanglit dayuday pamati kamo ha iya sugad han iyo pamati ha akon.
66Nagmakusog hi Judas Macabeo ha bug-os niya nga kinabuhi; hiya an magigin kapitan niyo ngan magmamando ha iyo ha pag-awayan kontra han iyo kaaway.
67Tawga an ngatanan nga nagsusugot han Balaod han Dyos nga umapi ha iyo; niyan bulsa niyo an mga kasaypanan nga ginbuhat ha iyo mga tawo.
68Bulsa an mga Hentil tungod han ira ginbuhat ngan dayuday pagsugot kamo han Balaod ngan han iya mga sugo.”
69Niyan ginbendisyonan hira ni Matatias ngan namatay hiya.
70Iginlubong hiya ha lubnganan han panimalay didto ha Modin, ngan an ngatanan nga mga tawo han Israel nagmabidoon hin duro tungod ha iya. Nahinabo ini han tuig 146.
Who We AreWhat We EelieveWhat We Do
2025 by iamachristian.org,Inc All rights reserved.
