2 Cronicas 12 - Samarenyo Meaning-Based Bible (1984)（MBBSAM）

Ginsulong han Ehipto an Juda(1 Hadi 14:25-28)

1Han pakagparig-on na ni Roboam han iya kagamhanan hin pagkahadi, ginsikway niya ngan han ngatanan niya nga mga tawo an Balaod han Ginoo.

2Dida han ikalima ka tuig nga pagkahadi ni Roboam ginkastigo hira tungod han ira paglingo han Ginoo. Ginsulong ni Hadi Sisac han Ehipto an Jerusalem

3hin kasondalohan nga may 1,200 nga mga karuwahe, 60,000 nga dikabayo nga mga sondalo, ngan hin mga sondalo nga diri maiihap, lakip in Libianhon, Sukitanhon, ug Sudanhon nga mga sondalo.

4Ginbihag ni Hadi Sisac an pinaderan nga mga syudad han Juda ngan inmabot tubtob ha Jerusalem.

5Kinmadto hi Semias nga manaragna kan Hadi Roboam ngan han mga pangulo han Juda nga nagtitirok didto ha Jerusalem hin paglikay kan Sisac. Ginsiring hira ni Semias, “Amo ini an mensahe ha iyo han Ginoo: ‘Iginsikway ako niyo, sanglit yana igintubyan ko man kamo ngadto kan Sisac.’”

6Nagmatuod an hadi ngan an mga pangulo nga nakasala hira ngan nagsiring hira, “Matadong an ginbubuhat han Ginoo.”

7Han pakakita hini han Ginoo, naghimangraw liwat hiya kan Semias ngan nagsiring ha iya, “Tungod nga nagtug-an hira han ira sala, diri ko hira pupuohon. Kundi kon sumulong hi Sisac, magkukuri hira hin pakalikay. Diri maabat an Jerusalem han bug-os nga kusog han akon kasina,

8kundi sasakopon hira ni Sisac, ngan mahibabaro hira han kalainan han pag-alagad ha akon ngan han pag-alagad hin mga punoan nga tunan-on.”

9Inmabot ha Jerusalem hi Hadi Sisac ngan ginkuha an mga manggad han templo ngan han palasyo. Ginkuha niya an ngatanan, lakip an mga taming nga bulawan nga ginhimo ni Solomon.

10Ginliwanan ini ni Roboam hin mga taming nga bronse ngan igintapod ini ha mga opisyal nga nagbabantay han mga ganghaan han palasyo.

11Kada pagkakadto han hadi ha Templo, ginagawas han mga gwardya an mga taming, ngan kahuman, ibinabalik ini ngadto han kwarto han mga gwardya.

12Tungod nga nagpaubos hiya ha Ginoo, waray gud hiya pagpuoha han kasina han Ginoo, ngan naghingaupay an Juda.

Iginsumat an Paghadi ni Roboam

13Naghadi hi Roboam ha Jerusalem ngan nagmakusog ngan gamhanan hiya nga hadi. An iya panuigon 41 han pagtikang niya hin paghadi ngan naghadi hiya hin 17 ka tuig ha Jerusalem nga amo an syudad nga ginpili han Ginoo tikang han ngatanan nga katunaan han Israel, nga dapit nga pagsisingbahan ha iya. Hi Naama nga taga-Amon amo an iroy ni Roboam.

14Ginbuhat ni Roboam an maraot kay waray hiya magtinguha hin paghibaro han kaburot-on han Ginoo.

15Hiaagian an mga buhat ni Roboam tikang ha tinikangan ngadto ha kataposan ngan an mga sinurat han iya panimalay dida han Kasaysayan ni Semias nga Manaragna ngan dida han Kasaysayan ni Ido nga Manaragna. Waray hunong an pag-inaway nira Roboam ug Jeroboam.

16Namatay hi Roboam ngan iginlubong didto han hadianon nga mga lubnganan ha Syudad ni David ngan sinmaliwan ha iya hin pagkahadi hi Abias nga iya anak.