Mga Maghurukom 1 - Samarenyo Meaning-Based Bible (1984)（MBBSAM）

Ginbihag han mga Tribo ni Juda ug Simeon hi Adonisedec

1Kahuman kamatay ni Josue, nagpakiana han Ginoo an mga tawo han Israel, “Hain han amon mga tribo an mauna hin pagsulong han mga Canaanhon?”

2Binmaton an Ginoo, “An tribo ni Juda an mauna, kay igintubyan ko na ha ira ini nga tuna.”

3Ginsiring han mga tawo ni Juda an mga tawo ni Simeon, “Upod kamo ha amon ngadto han amon malon nga tuna, ngan pagbulig kita hin pakig-away han mga Canaanhon. Katapos, maupod kami ha iyo ngadto han iyo malon nga tuna.” Sanglit nagbulig an duha nga mga tribo nira Simeon

4ug Juda hin pakig-away. Ginpadaog hira han Ginoo kontra han mga Canaanhon ngan han mga Periseohanon, ngan ginpirde nira in 10,000 nga mga tawo didto ha Bezec.

5Hin-agian nira didto hi Adonisedec ngan pinakiawayan hiya.

6Kinmalagiw ini hiya, kundi ira ginbukod. Hindakpan hiya nira, ngan gin-utod an mga tamuragko han iya mga kamot ngan mga tiil.

7Nagsiring hi Adonisedec, “Setenta nga kahadian nga pinangutdan han mga tamuragko han ira mga tiil ngan mga kamot in nakahimo hin pagtimod han mga salin ha ilarom han akon lamesa. Ginbuhat na yana ha akon han Dyos an akon ginbuhat ha ira.” Gindara hiya ngadto ha Jerusalem diin didto hiya namatay.

Ginsakop han Tribo ni Juda an Jerusalem ug Hebron

8Ginsulong han mga tawo ni Juda an Jerusalem ngan ira ini narikopo. Pinamatay nira an mga tawo ngan ginsunog an syudad.

9Katapos hini nagpadayon hira hin pakig-away han mga Canaanhon nga nag-ukoy didto han sagkahon nga katunaan, ha ubos han mga bukid, ngan didto han mamara nga tuna tipakadto ha timogan.

10Ginsulong nira an mga Canaanhon nga nag-ukoy didto han syudad han Hebron nga ginngaranan anay nga Quiriat-arba. Didto ira ginpirde an mga banay nira Sesai, Ahiman, ug Talmai.

Ginsakop ni Otoniel an Syudad han Debir(Jos. 15:13-19)

11Tikang didto ginsulong han mga tawo han Juda an syudad han Dabir nga hadto nga panahon ginngaranan nga Quiriat-sefer.

12Nagsiring in usa ha ira nga ginngaranan kan Caleb, “Ipapaasawa ko hi Acsa nga akon anak nga babaye han tawo nga makarikopo han Quiriat-sefer.”

13Hi Otoniel nga anak ni Cenaz nga manghod nga lalake ni Caleb, amo an nakarikopo han syudad, sanglit iginpaasawa ha iya ni Caleb hi Acsa nga iya anak.

14Dida han adlaw han pagkasal gin-aghat ni Otoniel hi Acsa nga mangaro hiya kan iya tatay hin uma. Hinmaw-as hi Acsa han iya asno, ngan ginpakianhan hiya ni Caleb kon ano an iya karuyag.

15Binmaton hiya, “Karuyag ko in mga burabod hin tubig, kay aadto man han mamara nga nasod an tuna nga iginhatag mo ha akon.” Sanglit iginhatag kan Acsa ni Caleb an ha iraya ug ha ilawod nga mga burabod.

Nagmadaogon an mga Tribo nira Juda ug Benjamin

16Binmunyog han mga tawo ni Juda an mga tulin han Kenitanhon nga ugangan nga lalake ni Moises tikang ha Jerico nga syudad hin mga palmera ngadto han bangkil nga tuna ha timogan han Arad didto ha Juda. Tinmampo hira han mga Amalekanhon.

17Binmunyog an mga tawo ni Juda han mga tawo ni Simeon ngan ginpirde nira an mga Canaanhon nga nag-ukoy didto han syudad han Sefaat. Gintunglo nira an syudad, ginbungkag ini, ngan ginngaranan ini nga Horma.

18-19Ginbuligan han Ginoo an mga tawo ni Juda ngan ira gintag-iya an sagkahon nga tuna. Kundi waray nira agawa an Gaza, Ascalon, ug Ecron, ngan an higrani nga mga katunaan han mga syudad. May puthaw nga mga karuwahe an mga tawo nga nag-uokoy ha ligid han dagat, sanglit waray makapaiwas ha ira an mga tawo ni Juda.

20Sumala han sugo ni Moises, iginhatag an Hebron kan Caleb nga nagpaiwas ha syudad han tulo nga mga banay nga mga tulin ni Anac.

21Kundi waray pagpaiwasa han mga tawo han tribo ni Benjamin an mga Jebuseohanon nga nag-uokoy didto ha Jerusalem, ngan tikang pa hadto nagpadayon an mga Jebuseohanon hin pag-ukoy didto tampo han mga tawo ni Benjamin.

Ginsakop an Betel han mga Tribo nira Efraim ug Manases

22-23Ginsulong han mga tribo nira Efraim ug Manases an syudad han Betel nga ginngaranan nga Luz hadto nga panahon. Ginbuligan hira han Ginoo. Ginsugo nira hin pagkadto han syudad in mga mag-irinaw.

24Iginkakita ini hira hin tawo nga nagawas han syudad, ngan ira ginsiring, “Igtutdo ha amon an pagsulod ngadto han syudad ngan diri ka namon paglalabtan.”

25Sanglit iya igintutdo ha ira, ngan pinamatay han mga tawo nira Efraim ug Manases an ngatanan nga mga tawo han syudad, labot hini nga tawo ngan han iya panimalay.

26Waray kaiha kinmadto ini nga tawo ha tuna han mga Hiteohanon, nagtindog didto hin usa nga syudad, ngan ginngaranan ini nga Luz nga amo la gihapon an ngaran hini ngada yana.

May mga Tawo nga Waray Pagpaiwasa han mga Israelita

27Waray paiwasa han tribo ni Manases an mga tawo nga nag-uokoy didto han mga syudad han Betsan, Tanac, Dor, Heblaam, Megido, ngan an higrani nga mga bungto; nagpadayon an mga Canaanhon hin pag-ukoy didto.

28Han gamhanan na an mga Israelita, gin-oripon nira an mga Canaanhon, kundi waray nira paiwasa.

29Waray paiwasa han tribo ni Efraim an mga Canaanhon nga nag-uokoy didto han syudad han Gazer, sanglit nagpadayon an mga Canaanhon hin pag-ukoy didto tampo ha ira.

30Waray paiwasa han tribo ni Zabulon an mga tawo nga nag-uokoy didto han mga syudad han Cetron ug Naalo, sanglit nagpadayon an mga Canaanhon hin pag-ukoy didto tampo ha ira, kundi gin-oripon hira.

31Waray paiwasa han tribo ni Aser an mga tawo nga nag-uokoy didto han mga syudad han Acco, Sidon, Ahalab, Acazuz, Helba, Afic, ug Rehob.

32Nag-ukoy an mga tawo han Aser tampo han mga Canaanhon nga mga umurukoy han tuna, kay waray man hira paiwasa.

33Waray paiwasa han tribo ni Neftali an mga tawo nga nag-uokoy didto han mga syudad han Betsemes ug Betanat. Nag-ukoy an mga tawo han Neftali tampo han mga Canaanhon nga mga umurukoy han tuna, kundi gin-oripon hira.

34Gintabog han mga Amoreohanon an mga tawo han tribo ni Dan ngadto han sagkahon nga katunaan ngan waray hira palugsonga ngadto han kapatagan.

35Nagpadayon an mga Amoreohanon hin pag-ukoy didto ha Ayalon, Salabim, ngan ha Bukid Hares, kundi ginsakop hira han mga tribo ni Efraim ug Manases, ngan gin-oripon hira.

36An pag-ultan han mga Edomitanhon natikang ha amihanan nga dapit han Sela tipakadto han Aragian han Akrabim.