2 Cronicas 5 - Samarenyo Meaning-Based Bible (1984)（MBBSAM）

1Han kahuman na ni Hadi Solomon han ngatanan nga buruhaton ha Templo, iginsulod niya ha hirimosan nga mga kwarto han Templo an ngatanan nga mga butang nga iginhalad ha Ginoo ni David nga iya amay—an salapi, bulawan, ngan iba pa nga mga butang.

Gindara ha Templo an Kahon han Ginsaaran(1 Hadi 8:1-9)

2Niyan ginpatawag ni Hadi Solomon an ngatanan nga mga pangulo han mga tribo ngan mga banay han Israel, nga magtitirok hira ha Jerusalem, basi dad-on ngadto ha Templo an Kahon han Ginsaaran han Ginoo tikang ha Sion, an Syudad ni David.

3Nagtitirok hira ngatanan ha panahon han Pyesta han mga Sirongan.

4Han katirok na han mga pangulo, ginpas-an han mga Levita an Kahon han Ginsaaran,

5ngan gindara ini ngadto han Templo. Ginbalhin liwat han kapadian ngan han mga Levita ngadto han Templo an Tulda nga inuokyan han Ginoo ngan an ngatanan nga mga kasangkapan.

6Nagtitirok ha atubangan han Kahon han Ginsaaran hi Hadi Solomon ngan an ngatanan nga mga tawo han Israel, ngan naghalad hira hin damo kaupay nga mga karnero ngan mga baka.

7Onina gindara han kapadian ngadto han Templo an Kahon han Ginsaaran han Ginoo ngan iginbutang ini didto han Labi ka Baraan nga Dapit, ha ubos han mga kerubin.

8An binuklad nira nga mga pako nakatahob han Kahon ngan han mga parasgan.

9An kataposan han mga parasgan hikikit-an hin bisan hin-o nga matukdaw ha atubangan han Labi ka Baraan nga Dapit, ngan diri gud ha iba nga dapit. (Aadto pa ngada yana an mga parasgan.)

10Waray gud sulod an Kahon han Ginsaaran labot han duha nga mga tabla nga bato nga iginsulod ni Moises didto ha Bukid Sinai diin naghimo an Ginoo hin ginsaaran ha mga tawo han Israel han paggawas nira ha Ehipto.

An Kapawa han Ginoo

11-14Naghalad ha ira ngahaw an kapadian nga nagtambong tikang han magkalainlain nga mga hugpo. Nakakasul-ot hin lino nga mga panapton an ngatanan nga mga musikero nga Levita—hira Asaf, Heman, ug Jedutun, ngan an mga sakop han ira mga banay. Tinmukdaw an mga Levita ha sinirangan han altar dara in mga gimbal ug mga arpa, ngan kaupod nira in 120 nga kapadian nga nagtrotrompeta. An mga magkaranta dinuyogan hin maupay han mga trompeta, mga gimbal, ngan iba pa nga mga turonggon samtang nagdadayaw hira han Ginoo, nga nagkakanta:

“Dayawa an Ginoo kay maupay hiya,

ngan ha kadayonan an iya paghigugma!”

Han nagkakagawas na an kapadian han Templo, naluob dayon an templo hin dampog nga nasilaw han malamrag nga kapawa han Ginoo, ngan waray na hira makagpadayon han pagsingba.