1-2Nasupil ngan nangurutob gihapon ako kontra han Dyos;
Diri ako nakakapugong hin pagharoy han akon kasugoran.
3Maupay unta hibaroan ko kon hain hiya pamimilnga,
ngan kon uunanhon ko hin pagkadto han dapit nga aadto hiya!
4Igsasaysay ko gud an akon kalipongan dida ha iya atubangan,
ngan igpapahamtang ko an ngatanan nga mga pangatadongan para ha akon.
5Karuyag ko hibaroan kon ano an iya igsisiring ngan kon uunanhon niya hin pagbaton ha akon.
6Gagamiton ba han Dyos an ngatanan niya nga kusog kontra ha akon?
Diri, mamamati hiya samtang nagyayakan ako.
7Tangkod ako; makakapadayag ako han akon pangatadongan ha atubangan han Dyos;
paghuhukman ako niya nga waray gud ako sala ha kadayonan.
8Ginbiling ko an Dyos didto ha Sinirangan, kundi waray hiya didto;
waray ako pakaagi ha iya han pagbilnga ko ha iya didto ha Katundan.
9Nagtrabaho an Dyos didto ha Amihanan ngan ha Timogan,
kundi waray ko gihapon hiya hikit-i.
10Kundi maaram an Dyos han tagsa ko nga pagpitad;
kon pagsarihan ako niya, hibabaroan niya nga putli ako.
11Ginsusunod ko hin maupay an dalan nga iya pinipili,
ngan diri gud ako nasimang.
12Dayuday ginbubuhat ko an iginsusugo han Dyos;
ginsusunod ko an iya kaburot-on, diri an akon kalugaringon nga mga ungara.
13Waray gud niya pagkabalhin, waray makakaato ha iya,
o makakagpugong ha iya hin pagbuhat han iya karuyag pagbuhaton.
14Tutumanon niya an iya iginlarang para ha akon;
ito nga larang usa la han damo niya nga mga larang;
15nangungurog ako hin kahadlok ha iya atubangan.
16-17Ginpuypoy an akon kadasig han Dyos nga Labi Kamakagarahum.
An Dyos an akon nahahadlokan, diri an kamasirom—
bisan kon nabuta ako tungod han kasisidman.
Who We AreWhat We EelieveWhat We Do
2025 by iamachristian.org,Inc All rights reserved.
