2 Cronicas 31 - Samarenyo Meaning-Based Bible (1984)（MBBSAM）

Ginbag-o ni Ezequias an mga Buruhaton han Tuluohan

1Kahuman han pyesta, kinmadto an ngatanan nga mga tawo han Israel ha tagsa nga syudad han Juda ngan ginbungkag an mga harigi nga bato, ginruba an mga ladawan han diyosa nga hi Asera, an mga altar, ngan an pagano nga mga dapit hin pagsingba. Amo gihapon an ira ginbuhat didto ha bug-os nga Juda ngan ha katunaan han Benjamin, Efraim, ug Manases; katapos, nanguli hira ngatanan.

2Gintukod hin otro ni Hadi Ezequias an hugpo han kapadian ngan mga Levita, ngan tinagan hin buruhaton an tagsa nga hugpo. Lakip hini an paghalad han mga hayop nga tutuboron ngan han mga halad hin pakigdait, hin pag-api han pagsingba ha Templo, ngan pagdayaw ngan pagpasalamat didto han magkalainlain nga mga bahin han Templo.

3Tikang han iya kalugaringon nga mga panon ngan mga hayop naghatag hi Ezequias hin mga hayop para han mga halad nga tutuboron ha kada aga ug gab-i, ngan para hadton mga ighahalad ha Adlaw nga Iparahuway, ha Pyesta han Bag-o nga Subang han Bulan, ngan ha iba pa nga mga pyesta nga ginkikinahanglan han Balaod han Ginoo.

4Labot hini, ginsugo han hadi an mga tawo han Jerusalem nga dad-on nira an mga halad nga bahin han kapadian ngan han mga Levita, basi makaghatag hira han ngatanan nira nga panahon ha mga kinahanglanon han Balaod han Ginoo.

5Han paghatagan han sugo, gindara dayon han mga tawo han Israel in mga regalo han ira gimamag-upayi nga mga pagkaon, bino, lana hin olibo, dugos, ngan iba pa nga mga abot han uma, ngan gindara liwat nira an mga ikanapulo ka bahin han ngatanan nga ira gintatag-iya.

6Gindara han ngatanan nga mga tawo nga nag-uokoy ha mga syudad han Juda an mga ikanapulo ka bahin han ira mga baka ngan mga karnero, ngan gindara liwat nira in damo gud nga mga regalo nga iginhalad nira ngadto han Ginoo nga ira Dyos.

7Nagtikang hin pagkaabot an mga regalo dida han ikatulo nga bulan ngan nagtikadamo ini ngan natapos dida han ikapito nga bulan.

8Han pakakita ni Hadi Ezequias ngan han iya mga opisyal han kadamo han iginhatag, gindayaw nira an Ginoo ngan gindayaw an iya mga tawo nga Israel.

9Ginhimangrawan han hadi an kapadian ngan an mga Levita mahitungod hini nga mga regalo,

10ngan nagsiring ha iya hi Asarias nga Labaw nga Padi, nga tulin ni Sadoc, “Tikang han pagtikang han mga tawo hin pagdara han ira mga regalo ngadto ha Templo, may-ada na igo nga pagkaon ngan damo pa an sobra. Naangkon naton ini ngatanan kay ginbendisyonan han Dyos an iya mga tawo.”

11Ginsugo hira han hadi hin pag-andam hin mga kwarto ha Templo nga hirimosan han mga regalo,

12ngan iginbutang nira dida hini an ngatanan nga mga regalo ngan mga ikanapulo nga bahin han ira mga abot ug ginkabudlayan. Ginbutang nira nga tinaporan in usa nga Levita nga ginngaranan kan Conenias ngan ginhimo nga iya supli hi Simei nga iya bugto.

13Gintudlok in napulo nga mga Levita nga mabulig liwat ha ira: hira Jeheil, Asarias, Nahat, Asahel, Jerimot, Josabad, Eliel, Ismaquias, Mahat, ug Benaias. Ginbuhat ini ngatanan ha ubos han pagburot-an nira Hadi Ezequias ug Asarias, an Labaw nga Padi.

14Hi Core nga anak ni Imna, usa nga Levita nga puno nga gwardya han Sinirangan Ganghaan han Templo amo an tinaporan han pagkarawat han mga regalo nga iginhahalad ngadto han Ginoo ngan han paghatag hini nga mga regalo.

15Ha iba nga mga syudad nga gin-ukyan hin kapadian, ginbuligan hiya hini nga buruhaton han iba nga mga Levita: hira Eden, Miniamin, Jesua, Semias, Amarias, ug Secanias. Parapreho an paghatag nira han pagkaon ha ira igkasi mga Levita sumala han ira mga buruhaton,

16ngan diri pinaagi hin banay. Gintagan nira hin bahin an ngatanan nga kalalaken-an nga traynta an panuigon ngadto ha igbaw, nga may-ada mga katungdanan ha Templo adlaw-adlaw sumala han ira mga kahimtang.

17Gintagan an kapadian han ira mga buruhaton pinaagi hin banay, ngan gintagan an mga Levita nga 20 an panuigon ngadto ha igbaw han ira mga buruhaton pinaagi hin mga hugpo hin magtratrabaho.

18Iginlista hira ngatanan upod an ira kaasaw-an, mga anak, ngan iba pa nga mga sakop, kay matinumanon man ini hira hin paglinis han ira kalugaringon basi maandam hin pagtuman han mga buruhaton.

19Dida han kapadian nga nag-ukoy ha mga syudad nga iginhatag ngadto han mga tulin ni Aaron o ha mga tuna nga panabsaban nga sakop hini nga syudad, may-ada katataporan nga mga tawo nga nanhatag han pagkaon ha ngatanan nga kalalaken-an ha mga panimalay hin kapadian, ngan ha ngatanan nga nakada ha mga lista han Levita nga mga banay.

20Ha bug-os nga Juda ginbuhat ni Hadi Ezequias an matadong ngan an nakakalipay ha Ginoo nga iya Dyos.

21Nagmainuswagon hiya kay an ngatanan nga ginbuhat niya para han Templo o ha pagtuman han Balaod, ginbuhat niya ha espiritu hin hingpit nga kamaunongon ngan pag-alagad han iya Dyos.