Judit 8 - Samarenyo Meaning-Based Bible (1984)（MBBSAM）

Matinumanon hi Judit nga Balo

1Hito nga panahon hinbatian ni Judit an ginlarang ni Uzias. Amo hiya an anak ni Merari ngan apo ni Ox nga anak ni Jose. An kaapoy-apoyan ni Jose amo hira Uziel, Elkias, Ananias, Gideon, Rafaim, Ahitob, Elias, Hilcias, Eliab, Selumiel, Zurisadai, ug Israel.

2Namatay hi Manases nga bana ni Judit, nga sakop han amo ngahaw nga tribo ngan banay ha panahon han pag-ani han sebada.

3Hitaas an iya hiranat tungod han maping-it nga sirak han adlaw han nakadto hiya han kaumhan nagbabantay han mga mag-arani san-o hiya namatay ha higdaan didto han iya balay ha Betulia. Iginlubong hiya ha lubnganan han ira banay didto han kaumhan ha butnga han Dotan ug Balamon.

4Sulod hin tulo ka tuig ngan upat ka bulan nag-ukoy hi Judit nga usa nga balo.

5Ha iya kabidoan naghimo hiya hin usa nga gutiay nga sirongan ha atop han iya balay ngan nag-ukoy hiya didto, ngan nagbado hin sako.

6Nagpuasa hiya ha bug-os hito nga panahon gawas la kon igindidiri an pagpuasa: ha adlaw san-o han Adlaw nga Iparahuway ngan ha Adlaw ngahaw nga Iparahuway, ha gab-i han Pyesta han Bag-o nga Subang han Bulan ngan ha Pyesta ngahaw, ngan ha ngatanan nga mga pyesta ngan baraan nga mga adlaw nga gintutuman han mga tawo han Israel.

7Bantogan hin kamahusay ini hi Judit. Ginbilinan hiya han iya bana hin bulawan ug salapi, mga surugoon ngan mga oripon, ngan kahayopan ngan kaumhan. Hiya an nagpadayon hin pagpalakat han hiagi,

8ngan waray gud tawo nga nagyakan hin bisan ano nga maraot hiunong kan Judit. Masingbahon gud hiya nga babaye.

Nakigkita hi Judit han mga Opisyal han Bungto

9Hinbatian ni Judit an damo nga mga ngurutob han mga tawo kontra kan Uzias, yana nga magluya na hira tungod han kakulang hin tubig. Hinbaroan niya nga ha pagtambal han ira mga pagngurutob nagsaad hiya hin pagtubyan han bungto ngadto han mga Asiriahanon katapos hin lima ka adlaw.

10Nagsugo hi Judit hin usa nga oripon, an babaye nga nagpapalakat han iya mga pakabuhi, hin pagdapit ngadto han iya balay kanda Uzias, Cabris, ug Carmis nga mga opisyal han bungto.

11Han pag-abot han mga opisyal, nagsiring ha ira hi Judit, “Alayon pamati kamo ha akon. Amo kamo an mga pangulo han mga tawo han Betulia, kundi nagsayop kamo han iyo iginhimangraw ha ira yana nga adlaw. Diri unta kamo nagsusumpa ha atubangan han Dyos nga iyo igtutubyan an bungto ngadto han aton mga kaaway kon diri kita buligan han Ginoo sakob hin pira ka adlaw.

12Ano an iyo katungod hin pagsari han Dyos sugad han iyo ginbuhat yana nga adlaw? Iyo ba pagsasaliwanan an Dyos ha pagdumara han mga buruhaton han tawo?

13An Ginoo nga Labi Kamakagarahum amo an iyo ginsasarihan! San-o pa gud kamo mahibabaro hini?

14Waray paagi nga makakasabot kamo kon ano an aadto ha sag-od hin usa nga kasingkasing hin tawo o pagsabot han ginhuhunahuna hin usa ka tawo. Kundi nagpasipara kamo hin pagbasa han hunahuna han Dyos ngan paghubad han iya mga ginhunahuna! Uunanhon niyo hin pakasiring nga sayod kamo han Dyos nga magburuhat? Ayaw, kasangkayan ko, kinahanglan hunongon na niyo an pagpukaw han kasina han Ginoo nga aton Dyos!

15Kon maglarang hiya hin diri pagkanhi hin pagbulig ha aton sakob hin lima ka adlaw, bangin talwason pa kita niya ha lain nga panahon nga iya karuyag. O bangin ipapuo kita niya han aton mga kaaway.

16Kinahanglan diri kamo magbutang hin mga kondisyon para han Ginoo nga aton Dyos! Naghuhunahuna ba kamo nga sugad la hiya hin usa ha iyo? Naghuhunahuna ba kamo nga makakahangyo kamo ha iya o makakapirit ha iya hin paglarang?

17Ayaw! Lugod, kinahanglan hangyoon ta hiya hin iya tambulig ngan maghulat kita nga mailobon han iya pagtalwas ha aton. Kon karuyag niya, babatonon niya an aton pagtawag hin pakibulig.

18Diri kita nagsisingba hin kadiyosan nga hinimo hin mga kamot hin tawo. Waray pa usa han aton mga banay, mga tribo, mga bungto, o mga syudad nga nagbuhat hini, bisan kon magbuhat hin sugad an aton kaapoy-apoyan.

19Sanglit gintugotan han Dyos an ira kaaway hin pagpatay ha ira ngan pagkuha han ngatanan nga gintag-iya nira. Dako adto nga kapakyasan!

20Kundi tungod nga diri kita nagsisingba hin iba nga Dyos kundi an Ginoo la, makakalaom kita nga diri kita igsisikway niya o bisan hin-o han aton mga tawo.

21“Kon makuha han kaaway an aton bungto, aagawon an bug-os nga katunaan han Juda, ngan pagtitikasan an aton Templo didto ha Jerusalem. Ngan pababayaron kita han Dyos pinaagi han aton mga kinabuhi tungod nga tinmugot kita nga mahugawan an Templo.

22Pagsasalaon kita niya tungod han pamataya ngan pamihaga han aton mga tawo ngan tungod han pagbungkaga han tuna nga aton ginsunod. Pagtatamayon ngan pagyuyubitan kita han mga tawo didto hito nga mga nasod nga pagdadad-an ha aton nga mga oripon.

23Diri naton mahuhugay an kalooy han aton mga kaaway pinaagi hin pagtubyan ngadto ha ira yana han aton mga tawo. Kon tumubyan kita, pakakaalohan kita han Ginoo nga aton Dyos.

24“Ayaw, kasangkayon ko, kinahanglan magin susbaranan kita para han aton igkasi mga taga nasod. Nasandig ha aton diri la an ira mga kinabuhi, kundi pati an kapalaran han Templo ngan han altar.

25Ginsasarihan kita han Ginoo nga aton Dyos sugad han pagsarihi niya han aton kaapoy-apoyan, ngan kinahanglan pagpasalamatan naton hiya.

26Hinumdomi an pagsarihi niya kanda Abrahan ug Isaac, ngan an nahinabo kan Jacob samtang nagmamangno hiya han kakarnerohan ni Laban nga iya bata didto ha Mesopotamia.

27Diri sugad hin kagrabe an pagsari han Dyos han aton pag-ugop kay han pagsari ha ira. Ginpapadara ha aton han Dyos ini nga sirot diri sugad hin pagbulos, kundi sugad hin usa nga paghimatngon ha aton nga nagsisingba ha iya.”

28Niyan ginbaton ni Uzias hi Judit, “Mag-upay an ngatanan nga imo iginsiring, ngan waray usa nga makakariwa hini.

29Diri ini syahan pa nga pagpakita mo hin kinaadman. Tikang han bata ka pa, kinilala na namon ngatanan an kamaupay ngan kahamtong han imo panhunahuna.

30Kundi nagkakamatay na hin uhaw an aton mga tawo. Ginpirit kami nira hin pagyakan han amon ginbuhat ngan hin pagsumpa ngan diri na kami makakabaribad.

31Sanglit yana, tungod nga usa ka nga masingbahon gud nga babaye, pag-ampo para han aton mga tawo; hangyoa an Ginoo nga ipadara niya nganhi an uran basi mapuno an aton mga biriawan hin tubig ngan mahibalik an aton kusog.”

32“Oo,” binmaton hi Judit, “pagbubuhaton ko in usa nga butang nga diri gud hingangalimtan han aton Judiyo nga mga tawo.

33Niyan nga gab-i, kinahanglan tumindog kamo nga tulo didto han ganghaan hin paggwardya, basi makagawas han bungto ako ngan an akon oripon nga babaye. Ngan san-o umabot an adlaw nga iyo iginsaad hin pagtubyan han bungto, gagamiton ako han Ginoo hin pagtalwas han mga tawo han Israel.

34Kundi kinahanglan diri ako niyo pagpakianhan kon ano an akon pagbubuhaton; igsasaysay ko ini ha iyo kon mahuman na an ngatanan.”

35Hi Uzias ngan an iba nga mga opisyal nagsiring ha iya, “Nauyon kami han imo nahuhunahunaan. Hinaot unta nga an Ginoo nga aton Dyos mag-upod ha imo ha imo pagbulos han aton mga kaaway.”

36Niyan binayaan nira an sirongan ni Judit didto han atop ngan binmalik hira ngadto han ira mga barantayan.