Sirac 11 - Samarenyo Meaning-Based Bible (1984)（MBBSAM）

1Kon in usa nga kablas may-ada aram, may-ada niya katadongan hin pagparayaw ngan huhunahunaon hiya nga dako nga pagkatawo.

Ayaw Paghukom Pinaagi la han mga Kinikita

2Ayaw pagdayawa in usa ka tawo tungod kay maupay hiya pagkit-on, ngan ayaw pagtamaya in usa ka tawo tungod kay diri hiya maupay pagkit-on.

3Gutiay hin duro an putyokan kon itanding han damo nga mga pakoan nga mananap kundi an iya dugos amo an gimamatam-isi han ngatanan nga mga karaonon.

4Ayaw pagyubit hin usa ka tawo nga naghimakuri ngan gisigisi an iya bado. Nagbubuhat an Ginoo hin urosahon nga mga butang nga natatago ha mga mata han mga tawo.

5Damo an mga hadi nga natapos an ira pagkahadi dida nga lumpagi hira ha tuna, samtang an ira mga korona ginsusul-ot hin mga tawo nga diri nira kinikilala.

6Damo an mga punoan nga ginpakaalohan. Damo an bantogan nga mga tawo nga nahulog ngadto ha gahom hin iba nga mga tawo.

Paghirot

7Usisaha anay hin maupay san-o ka magsaway, panginsayod, ngan paghunahunaa anay ini nga mga butang.

8Ayaw pagyakan dayon kon may tawo nga naghihimangraw; pamatii an iya igsisiring san-o ka magbaton.

9Ayaw pakiglantugi bahin hin mga butang nga waray nimo labot. Ayaw pag-api han ginbubuhat hin mga makasasala.

10Anak ko, ayaw panginlabot hin damo nga mga butang. Kay kon magtinguha ka hin pagbuhat hin diri mo na maarakos, ikaw la ngahaw an mag-aantos. Diri ka makakatapos han imo trabaho, ngan diri ka gud makakabaya hini.

11Pananglit, iini in tawo nga nagtritrinabaho sugad hin usa nga oripon, kundi dayuday gud la nga kinakablas hin panahon.

12Ha luyo nga bahin, may lain nga tawo nga kablas ngan mahinayon. Bangin mahinay hiya ngan nagkikinahanglan hin tambulig, kundi nalilipay ha iya an Ginoo ngan iginagawas hiya tikang han iya maraot nga kamutangan.

13Kon nakakabangon na liwat hiya, nahipapausa an ngatanan.

14Natikang han Ginoo an ngatanan: an pagkamainuswagon ngan pagkapakyas, kakablasan o karikohan, kinabuhi ug kamatayon.

15Kinaadman, pagsabot, paghibaro han Balaod, paghigugma, ngan an pagbuhat hin maupay nga mga buruhaton—ini ngatanan natikang han Ginoo.

16Kaupod han mga makasasala an kasaypanan ngan kasisidman tikang pa ha tinikangan ngan an karat-an kaupod hadton mga nalilipay hin magraot nga mga buhat ngadto han ira pagkalagas.

17Nagpapadayon an mga hatag han Ginoo ngadto han mainampoon nga mga tawo. Kon karuyagon ka niya, dayuday magmamainuswagon ka.

18Mahihimo nga magriko in usa ka tawo pinaagi hin pagpinangusog hin pagtrabaho ngan waray niya kaliawan ug kalingawan, kundi anoman an iya makukuha hini?

19Nasiring hiya ha iya kalugaringon: “Yana makakapahuway na ako ngan makakagpahimulos han akon ginkabudlayan.” Kundi diri hiya maaram kon san-o hiya mapatay ngan iba an magpupulos han iya mga bahandi.

20Tindogi an imo katungdanan ngan ayaw ini bayai; pag-iha dida han imo trabaho.

21Ayaw kaawa han pag-uswag han mga makasasala, tumana la an imo kalugaringon nga buruhaton ngan sarig ha Ginoo. Masayon hin duro para han Ginoo nga himoon dayon nga riko in kablas nga tawo.

22An balos han mainampoon nga mga tawo amo an bendisyon han Ginoo, ngan ihinahatag ito nga bendisyon ha usa la kadali.

23Ayaw kabaraka mahitungod han imo ginkikinahanglan, o ano nga kauswagan an imo pamumulaton.

24Ngan ayaw liwat paghunahuna nga may-ada na nimo han ngatanan nga imo ginkikinahanglan, o nga waray na kapakyasan nga mahinanabo ha imo ha panahon nga umarabot.

25Kon maupay an kamutangan nahingangalimtan an kakurian; ngan kon baga makuri an kamutangan nahingangalimtan an paghingaupay ha kinabuhi.

26Masayonay para han Ginoo an paghulat tubtob han adlaw han pagkamatay hin usa ka tawo basi ihatag ha iya an balos o kastigo ha iya.

27Hito nga takna madadayag an iya mga binuhatan basi hikit-an han ngatanan; mapapara an ngatanan nga iya kalipayan hito nga takna hin kakurian.

28Sanglit, ayaw paghunahuna nga malipayon an kinabuhi hin usa ka tawo san-o hiya mamatay, kay mahibabaroan la an kamatuoran hin usa ka tawo kon patay na hiya.Paghirot hin Pagpili han imo Kasangkayan

29Pilia an imo dadapiton ngadto ha imo balay, kay damo an mga paagi han mga maglimbong.

30An parayawan nga tawo usa nga paon nga magdadara ha imo ngadto ha kataragman; sugad hin usa nga espiya nga mag-iinaw han imo mga pagkamaluya.

31Binabalikad niya an maupay basi kitaon nga maraot ngan namimiling hin sayop dida han gimamaupayi nga mga binuhatan.

32In usa nga sispas makakapalaga hin tinambak nga mga oring, ngan naghuhulat la hin higayon in usa nga makasasala hin paggamit han iya kusog.

33Bantayi an sugad nga mga tawo ngan an ira magraot nga mga larang; pagdadaoton ka nira ha kadayonan.

34Kon magdara ka ha imo balay hin tawo nga diri nimo kinikilala, makakasamok la ini ha imo, bangin ngani ha imo ngan han imo kalugaringon nga panimalay.