Judit 5 - Samarenyo Meaning-Based Bible (1984)（MBBSAM）

Nanginsayod hiunong han mga Israelita

1Han paghibaro ni Holofernes nga taga-Asiria nga heneral nga nag-andam para hin away an mga Israelita, nga ginsagpo an mga aragian ha bukid, ginparig-on an mga pungkay han kabukiran, ngan ginbutangan hin mga ulang ha dalan didto han kapatagan,

2sinmukob an iya kasina. Gintirok niya an ngatanan nga Moabitanhon nga mga punoan, an ngatanan nga Amonitanhon nga mga heneral, ngan an ngatanan nga mga gobernador han katunaan ha ligid han baybayon han Mediteraneo

3ngan ginsiring hira, “Nag-uokoy kamo dinhe ha Canaan, sanglit sumati ako hiunong han mga tawo nga nag-uokoy dinhe hini nga kabukiran. Ano nga mga syudad an ira hinkakaptan? Ano kadamo an ira kasondalohan? Hain hira kukuha han ira gahom ug kusog? Hin-o nga hadi an mamangulo han ira kasondalohan?

4Kay ano nga hira, han ngatanan nga mga tawo ha katundan, an dinmiri hin paggawas ngan pagtubyan ha akon?”

Namulong hi Aquior

5Niyan ginbaton ni Aquior nga pangulo han ngatanan nga mga Amonitanhon hi Holofernes, “Sir, kon malolooy ka la hin pamati ha akon, susumatan ko ikaw han kamatuoran hiunong hini nga mga tawo nga nag-uokoy didto han kabukiran hirani han iyo kampo. Diri ako magbubuwa ha imo.

6Ini nga mga tawo amo an mga tulin hin pipira nga mga Babilonianhon,

7-8nga binmaya han mga paagi han ira kaapoy-apoyan basi magsingba han Dyos han langit. Ha kataposan ginpaiwas hira tikang han ira tuna kay dinmiri hira hin pagsingba han kadiyosan han ira kaapoy-apoyan. Niyan kinmalagiw hira ngadto ha Mesopotamia diin nag-ukoy hira hin maiha nga panahon.

9“Katapos ginsiring hira han ira diyos nga umiwas hira ha Mesopotamia ngan makadto hira ha tuna han Canaan, diin nag-ukoy hira ngan nagriko hira hin bulawan, salapi, ngan kahayopan.

10Kahuman han paghiaboti hin usa nga katgutom ha bug-os nga tuna han Canaan, linmugsong ngadto ha Ehipto ini nga mga Israelita—amo ini an pagtawag ha ira, ngan nagpabilin hira didto, nahimo hira nga usa nga dako nga nasod nga nagdamo an ira mga tawo nga makuri na hira maihap.

11Sanglit ginkontra hira han hadi han Ehipto. Iya ginpahimulosan hira ngan ginpatrabaho hira hin paghimo hin mga baldosa. Iya ginraogdaog ngan gin-oripon hira.

12Kundi nag-ampo hira ngadto han ira diyos, ngan nagpadara an ira diyos hin mga karat-an ngan waray gud nahimo han mga Ehiptohanon hin pagpugong hini nga karat-an. Han pagpaiwasa ha ira han mga Ehiptohanon tikang han ira nasod,

13ginpamara han ira diyos an Dagat Pula ha ira atubangan,

14ngan gin-unhan hira tubtob ha Sinai ug Cades Barnea.

“Ginpaiwas han mga Israelita an ngatanan nga mga tawo nga nag-ukoy ha salatan nga dapit han Canaan,

15ginsulong nira an tuna han mga Amoreohanon, ginpuo an mga tawo han Hesebon, gintabok an Salog Jordan, ngan gintag-iya an bug-os nga sagkahon nga katunaan.

16Ginpaiwas nira an mga Canaanhon, an mga Pereseohanon, an mga Jebuseohanon, an mga Sigusmanhon, ngan an ngatanan nga mga Gergesohanon. Nag-ukoy na hin maiha nga panahon an mga Israelita dinhe hini nga kabukiran.

17“An ira diyos nagdudumot han kamaraogdaog, ngan samtang diri hira makasala kontra ha iya, nagmainuswagon hira.

18Kundi han pagsupak nira ha iya, nag-antos hira hin magbug-at nga kapakyasan ha mga pag-awayan, ngan ha kataposan gindara hira nga mga bihag ngadto hin usa nga langyaw nga nasod. Ginbungkag an templo han ira diyos ngan gin-angkon han ira mga kaaway an ira mga syudad.

19Kundi yana binmalik na hira ngadto han ira diyos, inmoli na hira tikang han mga nasod diin nagsarang hira. Gintag-iya na liwat nira an syudad han Jerusalem, diin nakadto an ira templo, ngan nag-ukoy na liwat hira didto han kabukiran nga waray may naukoy.

20“Sir, kon nagpipinakasala ini nga mga tawo kontra han ira diyos, bisan diri tinuyo, ngan kon nakakasiguro kita nga salaan hira hin mga pagtalapas, magmamainuswagon an aton pagsulong ha ira.

21Kundi kon waray hira magtalapas han balaod han ira diyos, kinahanglan pabay-an na la hira, kay kon diri, pananalipdan hira han ira diyos, ngan maaalohan kita ha atubangan han bug-os nga kalibutan.”

Rinmiwa an Kadam-an

22Han kahuman han pamulong ni Aquior, nagtikang hin pagriwa an ngatanan nga mga tawo nga natukdaw palibot han tulda. An mga labaw nga mga opisyal ni Holofernes, sugad man an mga Moabitanhon ngan an mga tawo ha baybayon han Mediteraneo naghangyo nga patayon hi Aquior.

23Nagsiring hira, “Kay ano nga mahadlok kita hini nga mga Israelita? Mga magluya hira; diri hira makakahimo hin usa nga marig-on nga pagpanalipod.

24Pagpadayon kita! Heneral Holofernes, para han imo hugpo hin kasondalohan masayon la ini nga pamatay ha ira.”