Judit 15 - Samarenyo Meaning-Based Bible (1984)（MBBSAM）

Nagdaog an Israel

1Han pakabati han mga sondalo han nahinabo, duro an ira paghipausa,

2ngan nagtikang hira hin pangurog tungod hin kahadlok. Nagsarang hira ngatanan tikang han kampo, nga may hin lugaring na la samtang nangangalagiw hira ha mga dalan didto han kabukiran ngan mga kahamub-an.

3Nagtikang liwat hin pag-isol an mga sondalo nga nagkampo didto ha kabukiran palibot han Betulia. Ngan nagkaabot an ngatanan nga mga Israelita nga mga sondalo ngan ginbukod hira.

4Nagsugo hi Uzias hin mga magsarangyaw ngadto han mga bungto han Betomestaim, Bebai, Koba, Kola, ngan han bug-os nga tuna han Israel hin pagsumat han ngatanan han nahinabo ngan pag-aghat ha ira hin pagbulig hin paglanat ngan pagpatay han kaaway.

5Ha pakakarawat nira han mensahe, ginsulong nira ngatanan an mga Asiriahanon ngan ginbukod nira tubtob gud ha Koba, ngan pinamamatay nira dida ha dalan. Bisan an mga tawo han Jerusalem ngan an iba nga mga nag-uokoy didto han kabukiran binmulig han pagsulong han pagsumati ha ira han mga magsarangyaw mahitungod han nahinabo didto han kampo nga Asiriahanon. Gin-ulang han mga tawo han katunaan han Galaad ug Galilea an aragian han mga nanmamalagiw nga mga Asiriahanon ngan makalilisang an ira kapirdehan. Ira ginbukod hira tubtob han katunaan palibot han Damasco.

6Linmugsong an iba nga mga tawo ha Betulia ngadto han Asiriahanon nga kampo, pinanikasan ini ngan gindara nira in damo nga mga tinikas nga nakapariko ha ira.

7Han pagbalik han mga Israelita nga mga sondalo tikang han panmatay, nagpahimulos hira han mga nanhisalin. Duro hin kadamo han nahisalin ngan ginbahinbahin ini han mga tawo han mga bungto ngan mga baryo.

Nagsaurog an Israel han Pagdarag-an

8Hi Joakim, nga Labaw nga Padi ngan an Labaw nga Hukmanan han Israel inmabot tikang ha Jerusalem hin pagkita han dagko nga mga butang nga ginbuhat han Ginoo para han iya mga tawo ngan pakigkita kan Judit ngan pagpahalipay ha iya.

9Han pag-abot nira, gindayaw hi Judit nira ngatanan hin pagsiring, “Amo ikaw an kadungganan han Jerusalem, an babaye nga bayani han Israel, an parayaw ngan kalipay han aton mga tawo!

10Naangkon mo ini nga dako nga pagdarag-an para han Israel pinaagi han imo kalugaringon nga panlimbasog. Nalilipay an Dyos nga Labi Kamakagarahum tungod han imo ginbuhat. Bendisyonan ka unta niya samtang nga buhi ka pa.”

Binmaton an ngatanan nga mga tawo, “Amen.”

11Inabutan hin 30 ka adlaw ngada han kahuman han panikas han kampo han mga Asiriahanon. Iginhatag kan Judit an kan Holofernes tulda, an ngatanan niya nga salapi, an iya mga makaong, an iya mga hundarayan, ngan an ngatanan niya nga mga kasangkapan. Kinarawat niya ini ngan iginkarga tubtob han iya madara dida han iya mula nga kabayo; niyan gindara niya an iya mga karuwahe ngan ginpuno liwat ini ngatanan.

12Nagkaabot an ngatanan nga Israelita nga kababayen-an hin pagkita ha iya; ira ginkantahan hiya hin mga pagdayaw ngan nagsarayaw hira hin pagpasidungog ha iya. Dida hini nga malipayon nga higayon hi Judit ngan an iba nga kababayen-an nagsarabad hin dahonon nga mga sanga hin kahoy

13ngan nagbutang hin mga korona nga mga dahon hin olibo ha ira mga ulo. Nag-una hi Judit han kadam-an hin pagpasunod han kababayen-an samtang nagsasarayaw hira. Sinmunod an ngatanan nga kalalaken-an han Israel, may mga korona hin bukad ha ira ulo, dara an ira mga hinganiban, ngan nagkakaranta hin pagdayaw.