Ester (Griego) 2 - Samarenyo Meaning-Based Bible (1984)（MBBSAM）

Nahimo nga Rayna hi Ester

1Niyan hinmagkot na an kasina han hadi. Bisan kon diri na hiya naghihinabi hiunong kan Vasti, nagpinanhunahuna hiya gihapon mahitungod han pagsiroti niya ha iya.

2Sanglit may-ada mga parasagdon han hadi nga nagsagdon ha iya, “Kay ano nga diri ka magpabiling hin mahusay nga mga daraga nga maupay an ira pamatasan?

3Makakagtudlok ka hin mga opisyal didto han tagsa nga lalawigan han imo ginhadian, ngan dad-on nira an ngatanan nga maghusay nga kadaragan-an ngadto han urokyan han imo kababayen-an dinhe ha Susa. Papagmangnoi hira kan Hegai, an yunuko nga tinaporan han imo kababayen-an, ngan tagan hira hin mga pagpahusay ha ira.

4Niyan kuhaa an imo kinaruruyag ha ira ngan himoa nga rayna nga liwan kan Vasti.”

Nakahunahuna an hadi nga maupay ini nga sagdon, sanglit gintuman niya ini.

5Didto ha Susa may nag-ukoy nga usa nga Judiyo nga ginngaranan kan Mardoqueo nga anak ni Jair; sakop hiya han tribo ni Benjamin ngan tulin nira Cis ug Simei.

6Upod hiya han mga bihag nga ginhalin ni Nabucodonosor han Babilonia tikang ha Jerusalem.

7Hi Mardoqueo amo an gintaporan kan Ester, anak han iya bata, hi Aminadab; mahusay hi Ester nga daraga. Han kamatay han iya mga kag-anak, ginmangnoan hiya ni Mardoqueo tubtob han iya pagkadaraga.

8Han pagpagawas na han hadi han iya bag-o nga sugo, damo nga kadaragan-an an gindara ngadto ha Susa, ngan nahiupod ha ira hi Ester. Iginbutang hiya liwat didto han hadianon nga palasyo ha ubos han pagmangno ni Hegai nga tinaporan han urokyan han kababayen-an.

9Naruyagan ni Hegai hi Ester ngan iya ini ginpaura. Gintikangan niya dayon an pagpahusay ha iya pinaagi hin masahe ngan linain nga pagkaon. Nagtudlok hiya hin pito nga kadaragan-an nga pinili gud tikang han hadianon nga palasyo hin pagserbi ha iya. Maupay an iya pagdumara ha iya ug han iya mga surugoon.

10Niyan, tungod han sagdon ni Mardoqueo, ginhilom la ni Ester nga Judiyo hiya.

11Kada adlaw agsob umagi hi Mardoqueo ha atubangan han bungsaran han urokyan han kababayen-an, basi hibaroan an kahimtang ni Ester ngan kon ano an iya dadangatan.

12Naabot hin usa ka tuig an hinaraan nga kaiha para hin pagpahusay han kababayen-an—mga masahe hin lana nga may-ada mirra sulod hin unom ka bulan ngan hin lana nga sinaktan hin balsamo sulod hin unom liwat ka bulan.

13Kahuman ihinahatag an babaye ngadto han tawo nga gintudlok hin pagdara ha iya tikang han harem ngadto ha palasyo ngan pinapaatubang hiya han hadi.

14Napakadto an babaye ha gab-i, ngan ha pagkaaga dinadara liwat hiya ngadto hin lain nga urokyan hin kababayen-an ngan pinapamangnoan hiya kan Hegai nga yunuko nga tinaporan. Diri na mabalik ngadto han hadi an babaye labot kon ipatawag hiya ngan gamiton an iya ngaran.

15Inmabot an panahon ni Ester hin pagkadto han hadi. Hi Ester amo an anak ni Abinadab nga bata ni Mardoqueo. Gintuman ni Ester an ginsagdon ha iya ni Hegai ngan gindayaw hiya han ngatanan nga nakita ha iya.

16Sanglit dida han ikapito ka tuig nga pagkahadi ni Asuero, dida han ika-12 nga bulan, an bulan han Adar, gindara hi Ester ngadto han hadi.

17Hinmigugma kan Ester an hadi kay nakalipay ha iya labaw han bisan hin-o han iba nga kadaragan-an. Iginbutang han hadi dida han ulo ni Ester an hadianon nga korona.

18Niyan naghatag an hadi hin usa ka semana nga bangkite para han ngatanan niya nga mga opisyal ngan mga punoan hin pagsaurog han iya pagkaasawa kan Ester. Ngan nagbuot liwat hiya nga paubsan an mga buhis han tawo ha bug-os nga ginhadian.

Gintalwas ni Mardoqueo an Kinabuhi han Hadi

19Hito nga panahon gintagan han hadi hi Mardoqueo hin hitaas nga katungdanan.

20Bahin kan Ester, waray pa gud hiya magpahibaro nga Judiyo hiya. Gintugon hiya ni Mardoqueo nga diri hiya magsumat bisan kan kanay, ngan iya ginsugot hiya sugad han pagsugot niya ha iya han gutiay pa hiya ha ubos han iya pagmangno. Nagpadayon hiya pagsingba han Dyos ngan hin pagtuman han mga sugo han Dyos, hin waray hiya magsalikway han iya Judiyo nga ginawian.

21Han pagtagi kan Mardoqueo hin hitaas nga katungdanan, nasina an duha nga mga yunuko nga tinaporan han mga magbarantay han hadi, ngan naghunahuna hira hin pagpatay han hadi.

22Hinbaroan ini ni Mardoqueo ngan ginsumatan niya hi Rayna Ester nga nagsumat liwat han hadi.

23Ginpausisa an duha nga mga yunuko, ngan ginbitay hira nga duha. Ha pagpasidungog kan Mardoqueo nagsugo an hadi nga igsurat an nahinabo dida han mantalaan han hadi basi an iya mapulsanon nga buhat diri hingalimtan.