1In usa ka tawo nahimo nga sawayon mo hin sayop nga paagi; sanglit bangin maupay ada an paghilom kay han pagyakan.
2Kundi mauruupay pa nga sawayon mo an tawo basi makapahungaw ka han imo kasina.
3Angkona an imo sayop ngan malilikyan mo an kaarawdan.
4An paggamit hin kusog basi mahibaroan in usa nga butang, sugad ini hin kinaponan nga lalake nga karuyag maglugos hin usa nga babaye.
5May mga tawo nga ginhuhunahuna nga maaram kay diri damo an ira pulong.
6May mga tawo nga mahilomon kay waray man nira sadang igyakan; mahilomon an iba kay maaram hira kon san-o an igo nga panahon hin pagyakan.
7Diri magyayakan an maaram nga tawo tubtob han pag-abot han igo nga takna hin pagyakan, kundi diri maaram an hambogero nga lurong kon san-o maabot ito nga takna.
8Waray makakaantos hin usa ka tawo nga maiha magyinakan ngan diri nahatag hin higayon han iba hin pagyakan.
May Tigda la nga mga Pagkabalhin hin Kapalaran9An maraot nga palad makakadara usahay ngadto hin kauswagan, ngan an maupay nga palad ngadto hin kapirdehan.
10Usahay diri nakakaupay ha imo an kamahinatagon, kundi usahay liwat binabaydan ini hin duha ka pilo.
11An dungog mahihimo sundan hin kaarawdan, kundi may-ada mga tawo nga diri kinikilala han iba nga nakakab-ot hin dungganan nga kahimtang.
12Usahay an imo na gintawaran nga butang nahihimo nga mahal hin duro nga sayop.
13Kon magyakan in tawo nga maupay maghukom, makakaagi hiya hin kasangkayan. Kundi waray la kapulsanan para hin usa nga lurong an iya mga pagpakaupay.
14Kon in usa nga lurong maghatag ha imo hin regalo waray la ini kaupayan, diri ini sugad ka mapulsanon han iya nahuhunahunaan.
15Diri hiya mahinatagon labot la hin pagsuson nga iya igogoliat basi makabati an bug-os nga kalibutan. Kon pautangon ka niya yana nga adlaw, masukot manta hiya pagkabuwas. (Diri ka ba mapupungot hin sugad nga mga tawo?)
16Niyan masiring ito nga lurong, “Waray gud naruruyag ha akon. Waray gud nagmamahal han akon ginbubuhat para ha ira. Kinakarawat nira an akon ihinahatag, kundi ginlilibak ako nira ha akon talikoran.”
17Ngan tama hiya—hiya an dayuday la pagtinawaan.
An Diri Asya nga Pamulong18Mauruupay pa an matalindas an imo tiil kay han paghilisa han dila. Mabubungkag hin kadagmitan an mga magraot sugad hin paghitalindas ngan hin paghitumba hin usa ka tawo.
19An waray batasan nga tawo sugad hin usa nga mangil-ad nga susumaton nga dayuday iginsusumat han tapang nga mga tawo.
20Waray namamati hin darahonon kon ighimangraw ini hin usa nga lurong ha diri igo nga panahon.
21An tawo nga diri nakakasala tungod han iya kakablas, nakakapahuway nga murayaw an konsyensya.
22Mahihimo nga mawad-an ka han imo pagtahod han kalugaringon pinaagi hin pag-alang hin pagyakan ha atubangan han mga lurong.
23Kon magsaad ka hin sangkay tungod la nga naaawod ka hin pagdumiri, naghihimo ka la hin kaaway.
24An pagbuwa amo in usa nga maraksot nga buring dida han ginawian hin tawo, kundi dayuday ginbubuhat ini han mga tapang.
25Mauruupay pa in usa nga kawatan kay hin usa nga sabid nga buwaon, kundi hira nga duha mahingangadto ha karat-an.
26Waray dungog an usa nga buwaon. Nag-uokoy hiya ha dayuday nga kaarawdan.
Tinaporan Kita han Kinaadman27Pagyakan hin maupay ngan magmamainuswagon ka dinhe ha kalibutan. An dumagko nga mga tawo nagmamahal hin tawo nga maupay in buot.
28Pasasayloon ka nira han imo mga sayop kon naruruyagan ka nira, sanglit upaya an pag-uma han tuna ngan mag-aani ka hin damo!
29Nabubuta han kamatuoran an mga makinaadmananon tungod han mga regalo ngan mga hukip ngan napupudngan hira han ira pagkatangkod dida han ira pagsuson.
30An kinaadman nga diri nahipapagawas ha pulong sugad hin manggad nga tinago—ini nga duha waray gamit.
31Mauruupay pa in usa ka tawo nga nagtatahob han iya kalurongan kay han usa nga diri nagamit han iya kinaadman.
Who We AreWhat We EelieveWhat We Do
2025 by iamachristian.org,Inc All rights reserved.
