Oseas 7 - Samarenyo Meaning-Based Bible (1984)（MBBSAM）

1“Ha akon karuyag hin pagtambal han akon katawhan nga Israel ngan pagtalinguha nga magmainuswagon na liwat hira, an akon la hinkikit-an amo an ira kamaraogdaog ngan an karat-an nga ira binubuhat. Nagpapalirulimbong hira, nasulod hira hin mga balay ngan nangangawat, naninikas hira hin mga tawo dida han kadalanan.

2Waray gud hira maghunahuna nga mahinunumdom ako hini ngatanan nga karat-an; kundi naluluob hira han ira mga sala ngan diri mahihimo nga diri ko ini ngatanan hikit-an.”

Nagsarabot hin Paglingo didto han Palasyo

3Nasiring an Ginoo, “Ginlilimbongan han mga tawo an hadi ngan an iya mga opisyal pinaagi han ira magraot nga mga larang.

4Maglingo ngan diri maunongon hira ngatanan. Naglalarab an ira kapungot sugad hin kalayo dida hin hudno, nga diri na kinahanglan nga dugangan pa an kapaso tubtob nga isulod an minasa hin pagluto.

5Dida han adlaw han kanan hadi pagsaurog, ginhubog nira hin bino an hadi ngan an iya mga opisyal ngan baga nalurong ini hira.

6Tinuod, nagbangga hin kapaso hira sugad hin hudno tungod han ira malingo nga mga larang. Ha bug-os nga gab-i nagbangga an ira kasina, ngan ha pagkaaga naglarab ini.

7“Dida han kapaso han ira kapungot, pinanmatay nira an ira mga punoan. Ginsunodsunod nira hin pamatay an ira kahadian, kundi waray gud ha ira may nag-ampo hin pakibulig ha akon.”

Nasarig han mga Nasod an Israel

8Nasiring an Ginoo, “An Israel sugad la hin hilaw nga tinapay. Natapod hira han mga nasod ha palibot nira,

9ngan diri hira nasabot nga ini nga ira pagtapod hin mga lumalangyaw, nakapaluya han ira kusog. Inihap na an ira mga adlaw, kundi diri ngani hira maaram hini.

10An kamapahitas-on han katawhan han Israel nasisinggit kontra ha ira. Kundi bisan pa nahinabo ini ngatanan, waray gihapon hira bumalik ha akon nga Ginoo nga ira Dyos.

11Naglulupadlupad an Israel sugad hin lurong nga tukmo; syahan an ira katawhan nangaro hin bulig han Ehipto, ngan katapos nagdadalagan hira ngadto ha Asiria!

12Kundi bibitaron ko in pukot ngan dadakpon ko hira sugad hin mga tamsi samtang malabay hira. Kakastigohon ko hira tungod han mga magraot nga ira ginbuhat.

13“Maghihingaraot hira! Binayaan ako nira ngan inmato hira ha akon. Mapupuo hira. Naruyag ako hin pagtalwas ha ira, kundi diri tinuod an ira pagsingba ha akon.

14Waray hira mag-ampo ha akon hin kinasingkasing, kundi kinmulob lugod hira ngan magtangis sugad han binubuhat han mga pagano. Kon mag-ampo hira hin pagkaon ug irimnon, nagsasamad hira ha ira ngahaw sugad hin mga pagano. Hin kamagsinupilon nira!

15Bisan kon ako an nagpatubo ngan nagpakusog ha ira, naglarang hira gihapon hin paglingo ha akon.

16Nagpadayon hira pagbaya ha akon ngan ginmapil hira hin diyos nga waray gahom. Sugad hira hin baliko nga pana nga diri gud kasasarigan. Tungod kay mapahitas-on an mga pulong han ira mga pangulo, magkakamatay hira hin tigda, ngan pagtitinawaan hira han mga Ehiptohanon.”