1-3Hi Mardoqueo, usa nga Judiyo nga sakop han tribo ni Benjamin, nabihag upod ni Hadi Joaquin han Juda, dida han kakuha han Jerusalem ni Hadi Nabucodonosor han Babilonia. Hi Mardoqueo amo an anak ni Jair nga usa nga tulin ni Simei nga anak ni Cis. Nag-ukoy hiya didto han syudad han Susa ha Persia, diin usa hiya nga importante nga opisyal didto han palasyo ni Asuero an gamhanan nga hadi.
Dida han ikaduha ka tuig nga pagkahadi ni Asuero, dida han syahan nga adlaw han bulan han Nisan, nag-inop hi Mardoqueo.
4Nag-inop hiya nga may-ada daw dako nga aringasa ngan kasamok, dako nga dalugdog, ngan usa nga linog, upod in makalilisang nga karigumok ha bawbaw han tuna.
5Niyan pinmakita in duha nga dagko nga mga dragon nga andam hin pakig-away ha ira la ngahaw.
6Makaharadlok an aringasa nga ira nahimo, ngan nag-andam an ngatanan nga kanasoran hin pakig-away kontra han kanan Dyos nasod hin magtadong nga mga tawo.
7Para han kalibutan usa ini ka adlaw nga kasisidman ngan kabidoan, kasamokan ngan kasakitan, kabungkagan nga pagkaruba.
8An ngatanan nga magtadong nga mga tawo han Dyos nagmasulob-on ha dako nga kahadlok kon ano gud an mapaabot ha ira. Nag-andam na hira para hin kamatay,
9kundi nangaraba hira han Dyos pangaro hin bulig. Dida han inop pinamatian an ira pag-ampo pinaagi hin usa nga dako nga salog nga nag-awas tikang hin usa nga gutiay nga burabod.
10Nagmalasibas na an kaagahon, sinmirang na an adlaw, ngan ginpakusog an magpinaubsanon nga mga tawo ngan ginpuo an ira magpinahitas-on nga mga kaaway.
11Nagmata hi Mardoqueo tikang hini nga inop diin iya hinkit-an an ginhunahuna han Dyos nga pagbubuhaton. Iya ini ginpainoino ha bug-os nga adlaw ngan iya gintalinguha nga makasabot hiya han kahulogan hini.
Gintalwas ni Mardoqueo an Hadi12Samtang napahuway hi Mardoqueo didto han bungsaran han palasyo, diin nagbantay hira Gabata ug Tara nga duha han mga yunuko han hadi,
13iya hinbatian an ira nahunahunaan nga maraot nga buhat. Iya pinamatian hin maupay an ira himangraw ngan iya hinbaroan nga nakahunahuna hira hin pagpatay han hadi. Sanglit kinmadto hi Mardoqueo kan Hadi Asuero ngan ginsumatan hiya hiunong han mabudhion nga nahunahunaan han duha nga mga yunuko.
14Iginpausisa hira han hadi, ngan han pagtug-an nira, gindara hira ngan ginpatay.
15Iginpasurat han hadi ini nga hinabo didto han opisyal nga mga surat, ngan nagsurat liwat hi Mardoqueo mahitungod hini nga hinabo.
16Niyan gintudlok han hadi hi Mardoqueo nga iginhatag ha iya in usa nga katungdanan ha palasyo ngan gintagan liwat hiya hin damo nga mga regalo nga usa nga balos han iya ginbuhat.
17Kundi gintalinguha ni Aman nga anak ni Hamedata nga usa nga taga-Bougia nga tinahod han hadi, hin pagsamok kan Mardoqueo ngan han iya mga tawo nga mga Judiyo, kay gin-angkon man ni Mardoqueo an kamatay han duha nga mga yunuko.
Who We AreWhat We EelieveWhat We Do
2025 by iamachristian.org,Inc All rights reserved.
