1Higugmaa niyo an katadongan, kamo nga mga naghahadi han kalibutan. Ibutang hin tinuod dida han Ginoo, an iyo mga hunahuna ngan pangitaa hiya ha bug-os niyo nga pagkatangkod.
2Makakaagi ha iya adton diri nagtitinguha hin pagsari ha iya, magpapadayag hiya ngadto han mga nasarig ha iya.
3An mga tawo nahibubulag han Dyos tungod han diri tangkod nga mga panhunahuna, ngan kon baga agi la hin tinuyaw an aton pagsari ha iya, pagpapakaalohan kita han iya gahom.
4Diri gud igkakalungon an kinaadman hin bisan hin-o nga malimbong o hin usa ka tawo nga oripon hin sala.
5An tawo nga matadong maaram magpahirayo han malimbong nga mga tawo. Mabaya hiya kon iginsasaysay in tinuyaw nga mga panhunahuna; diri hiya nahimumurayaw kon ginbubuhat in diri matadong.
Sayod an Dyos han Aton Iginyayakan6An kinaadman amo in usa nga espiritu nga makisasangkayon han mga tawo, kundi diri hiya mapasaylo hadton nagpapanamastamas han Dyos, kay maaram an Dyos han aton mga balatian ngan mga panhunahuna, ngan nabati hiya han tagsa naton nga mga pulong.
7Tungod kay an espiritu han Ginoo nakakaluob han bug-os nga kalibutan, ngan amo an nahawid han ngatanan nga mga butang ha tuna, maaram hiya han tagsa nga pulong nga ginyayakan han mga tawo.
8Waray tawo nga nagyayakan hin maraot nga diri hisasakban; ha madali o ha maiha makarawat hiya hin igo nga sirot.
9Pag-uusisahon hin tukib an mga panuyo han diri dyosnon nga mga tawo, igsusumat ngadto han Ginoo an ira mga pulong, ngan onina makarawat hira han sirot nga angay han ira pagkamaraot.
10Diri matugot an Dyos hin pangayat, ngan tungod kay an ngatanan hinbabatian man niya, diri matatago nimo ha iya an imo mga pag-uba.
11Sanglit talinguhaa nga diri mo pasagdan an imo pag-uba—diri ito nakakaupay ha imo—ngan ayaw pag-ungay hin mapintas nga yayaknon. Magkakamay-ada mga bunga adton labi ka hilom nga mga butang nga imo ginyayakan, ngan an pagbinuwa makakadaot han imo kalag.
Waray an Dyos Magtuha han Kamatayon12Ayaw pagbuhata an kalugaringon mo nga kamatayon pinaagi hin pagbuhat hin sala.
13Waray an Dyos magtuha han kamatayon, ngan diri niya ikinalilipay an kamatayon han iya buhi nga mga binuhat.
14Gintuha niya an tagsa nga butang basi magpadayon ini hin kabuhi, ngan hingpit ngan maupay an tagsa nga butang nga iya gintuha. Waray makakamatay nga hilo dida ha ira. Diri gud naghahadi hini nga kalibutan an kamatayon,
15kay an katadongan han Dyos diri napatay.
16An diri dyosnon nga mga tawo nagdara han kamatayon ha ira ngahaw pinaagi han mga butang nga ira ginyakan ngan ginbuhat. Ira ginhingyap an kamatayon nga sugad hin usa nga suok nga sangkay. Nakig-usa hira han kamatayon, ngan amo ini an angay para ha ira.
Who We AreWhat We EelieveWhat We Do
2025 by iamachristian.org,Inc All rights reserved.
