2 Cronicas 21 - Samarenyo Meaning-Based Bible (1984)（MBBSAM）

1Namatay hi Josafat ngan iginlubong ha hadianon nga mga lubnganan ha Syudad ni David ngan sinmaliwan ha iya hin pagkahadi hi Joram nga iya anak.

Naghadi han Juda hi Joram(2 Hadi 8:17-24)

2May unom nga kabugtoan nga kalalaken-an hi Joram nga anak ni Hadi Josafat: hira Asarias, Jahiel, Zacarias, Asarias, Micael, ug Safatias.

3Gintagan hira han ira amay hin damo nga bulawan, salapi, ngan iba pa nga mahal nga mga hiagi, ngan iginbutang an tagsa ha ira nga tinaporan hin usa han mga pinaderan nga mga syudad han Juda. Kundi tungod nga suhag man hi Joram, ginhimo hiya ni Josafat nga iya sumurunod.

4Han madig-on na an pagdumara ni Joram han ginhadian, iginpapatay niya an ngatanan niya nga kabugtoan nga kalalaken-an lakip in pira nga mga opisyal nga Israelita.

5An panuigon ni Joram 32 han kahimo niya nga hadi ngan naghadi hiya hin walo ka tuig ha Jerusalem.

6Ginsunod niya an maraot nga susbaranan ni Hadi Acab ngan han iba pa nga kahadian han Israel, kay pinangasawa niya in usa han mga anak nga kababayen-an ni Acab. Nakasala hiya han Ginoo,

7kundi diri buot an Ginoo magbungkag han hadianon nga panimalay ni David, kay naghimo hiya hin ginsaaran kan David ngan nagsaad nga maghahadi ha kadayonan an iya mga tulin.

8Han panahon han pagkahadi ni Joram, sinmupil han Juda an Edumea nga binmulag ngan nahimo nga lain nga ginhadian.

9Sanglit ginmawas hi Joram ngan an iya mga opisyal upod an ira mga karuwahe ngan ginsulong nira an Edumea. Didto ginpalibotan hira han kasondalohan nga Edomeanhon, kundi nagpakalusot ngan nagpakapalagiw hira ha gab-i.

10Tikang hadto waray na masakop an Edumea han Juda. Hini manta nga panahon sinmupil liwat an syudad han Libna, kay ginsikway ni Joram an Ginoo nga Dyos han iya kaapoy-apoyan.

11Gintindog pa ngani niya in pagano nga mga dapit hin pagsingba ha sagkahon nga katunaan han Juda ngan gintutdoan niya an mga tawo han Juda ug Jerusalem hin pakasala han Ginoo.

12Ginsuratan hi Joram ni manaragna Elias hinin nasunod: “Naghuhukom ha imo an Ginoo nga Dyos ni David nga imo ginikanan, kay waray ka magsunod han susbaranan ni Hadi Josafat nga imo amay o ni Hadi Asa nga imo apoy.

13Ginsunod mo lugod an mga susbaranan han kahadian han Israel ngan gintutdoan mo an mga tawo han Juda ug Jerusalem hin paglingo han Dyos, sugad nga gintutdoan ni Acab ngan han iya mga sumusunod an Israel hin paglingo han Ginoo. Pinamatay mo pa ngani an imo kabugtoan nga kalalaken-an nga mag-uruopay pa kay ha imo nga mga tawo.

14Tungod hini kakastigohon han Ginoo an imo mga tawo, an imo mga anak, ngan an imo kaasaw-an, ngan bubungkagon an imo mga hiagi.

15Mag-aantos ka hin sakit ha tinai nga adlaw-adlaw magtitikadugang an kasakit nga imo babation.”

16May mga Filisteohanon ngan mga Arabeanhon nga nag-ukoy hirani han gin-ukyan hin mga Sudanhon ha ligid han baybayon. Gin-aghat hira han Ginoo hin pakig-away kan Joram.

17Ginsulong nira an Juda, gintikasan an hadianon nga palasyo, ngan gindara nga mga bihag an ngatanan nga kaasaw-an ngan mga anak nga kalalaken-an han hadi labot kan Ahasias nga puto niya nga lalake.

18Niyan katapos hini ngatanan, pinapag-antos han Ginoo an hadi hin sakit ha tinai.

19Sulod hin mga duha ka tuig nagtikagrabe la ini tubtob nga ha kataposan namatay an hadi ha dako nga pag-antos. Waray magtap-ong nga tigaman han ira pagkamasulob-on para ha iya an iya mga sakop sugad han ginbuhat nira para han iya kaapoy-apoyan.

20Nahimo nga hadi hi Joram ha panuigon nga 32 ngan naghadi hiya hin walo ka tuig ha Jerusalem. Waray gud nabido han iya pagkamatay. Iginlubong hiya didto han Syudad ni David, kundi diri didto han hadianon nga mga lubnganan.