1Nag-ampo hi Ester sulod hin tulo ka adlaw. Niyan ginhukas niya an mga panapton nga iya ginbado ngan nagsul-ot na liwat hiya han iya mag-anyag nga higlawig nga mga bado.
2-3Dida han bug-os niya nga hadianon nga pagkaanyag, nag-ampo na liwat hiya ngadto han iya Dyos nga magtaralwas nga nakita han ngatanan. Binmaya hiya han iya kwarto nga naglalakat sugad hin usa nga rayna, inupdan hin duha nga kababayen-an nga mga surugoon; an usa ha ira natugway ha iya nga iya kinakaptan ha butkon ngan
4an ikaduha nakapot han kataposan han iya hilawig nga kapa.
5Nasilaw hin kahusay an nawong ni Rayna Ester. Malipayon hiya sugad nga hiya mahusay, kundi ha iya kasingkasing inalpan hiya hin duro nga kahadlok.
6Inagian niya an ngatanan nga mga porta ngan sinmulod hiya han kwarto han trono, diin tinmindog hiya ha atubangan han hadi. Nalingkod an hadi dida han iya hadianon nga trono, nga nakakabado han iya maanyag ngan hilawig nga panapton nga luob hin bulawan ngan marahalon nga mga alahas. Usa adto nga makasirindak nga taran-awon.
7Masilaw an kalamrag han iya bayhon, kundi han pagkita niya kan Ester, tinmutok hiya upod in mapintas nga kasina. Nanluya ngan ginduas hi Ester; haros na hiya mahiraptay ngan iya isinandig an iya ulo ha sugbong han iya abay nga surugoon.
8Kundi ginliwat han Dyos nga an kasina han hadi mahimo nga malomo nga pagpaid. Tinmukdaw hiya dayon tikang han iya trono ngan kinaptan niya an mga butkon ni Ester tubtob nga nakahimo hiya hin pagtindog. Ginlipay hiya hi Ester hin makaliliaw nga mga pulong.
9“Ano ngani, Ester,” nagsiring hiya, “Diri ka kinahanglan mahadlok kay imo ako bana.
10Para la hin yano nga mga tawo an aton balaod; diri ka mapatay.
11Pakadi ha akon.”
12Inalsa han hadi an iya bulawan nga baston ngan iya ini pinadapat ha liog ni Ester. Katapos iya hinadkan hiya ngan ginsiring, “Sumati ako kon ano an imo karuyag.”
13Binmaton an rayna, “Han pakakita ko ha imo, daw sugad hin nakakita ako hin usa nga anghel han Dyos, ngan nadaog ako han imo makasirindak nga hadianon nga pagkaharangdon.
14Uraura ka hin kamaaramdok ngan puno hin pagkalooy an imo bayhon.”
15Kundi samtang nagyayakan pa hiya, nadismayo na liwat hiya.
16Nabaraka ha iya an hadi, ngan gintalinguha han ngatanan niya nga mga surugoon nga makaginhawa hiya.
Who We AreWhat We EelieveWhat We Do
2025 by iamachristian.org,Inc All rights reserved.
