Tobit 7 - Samarenyo Meaning-Based Bible (1984)（MBBSAM）

Kinmadto hi Tobias han Balay ni Raguel

1Han pagsulod ni Tobias ngan han anghel, hi Rafael, han syudad han Ecbatana, nagsiring hi Tobias, “Sangkay Azarias, dad-a ako hin pakigkita kan Raguel ha labi ka madali nga mahihimo nimo.” Gindara dayon hi Tobias ngadto han balay ni Raguel diin ira hin-agian hi Raguel nga nalingkod dida han aragian ngadto han bungsaran han ira balay. Hira Rafael ug Tobias amo an nag-una hin pangumosta ha iya ngan binmaton hiya, “Uswag kamo, mga sangkay ko. Kinakarawat kamo dinhe ha akon balay.”

Gindara hira ni Raguel ngadto ha sakob han iya balay,

2ngan nagsiring hiya kan Edna nga iya asawa, “Diri ba ini nga ulitawo supo kan Tobit nga akon patod?”

3“Mga taga diin kamo?” nagpakiana ha ira hi Edna.

“Mga Israelita kami nga sakop han tribo ni Neftali, kundi nag-uokoy kami nga mga bihag didto han syudad han Ninibe ha Asiria,” binmaton hira Tobias ug Rafael.

4Nagsiring hi Edna, “Nakilala ba kamo kan Tobit nga amon patod?”

“Nakilala kami ha iya,” binmaton hira.

“Komusta man hiya!” pinmakiana hi Edna.

5“Buhi pa hiya ngan maupay an iya lawas,” binmaton hira.

Niyan igindugang ni Tobias pagsiring, “Hi Tobit an akon amay.”

6Sanglit tinmukdaw hi Raguel ngan upod in mga luha hin kalipay ha iya mga mata hinadkan niya hi Tobias.

7Niyan nagsiring hiya, “Bendisyonan ka unta han Dyos, anak ko. Maupay ngan dungganan nga tawo an imo amay. Hin kamakalilisang nga karat-an nga nabuta in sugad ka tangkod ngan ka mahinatagon nga tawo!” Gingakos niya an liog ni Tobias ngan nagtangis ha iya sugbong.

8Nagtangis liwat hira Edna nga iya asawa ug hi Sara nga iya anak tungod kan Tobit.

Ginkarawat ni Raguel hin mapaso nga pag-abiabi hira Tobias ug Rafael ngan ginpaihaw an usa han iya mga lalaki nga karnero. Katapos pangarigos nira Tobias ug Rafael ngan malingkod na unta hira hin pagkaon, nagsiring hi Tobias kan Rafael, “Sangkay Azarias, san-o mo pakikianhi hi Raguel nga tugotan ako niya hin pangasawa kan Sara?”

9Kundi hinbatian ni Raguel an pakiana ngan nagsiring kan Tobias,

10“Kaon ngan inom anay ngan paglipay yana gab-i. May-ada ka katungod hin pangasawa kan Sara ngan waray iba nga makakapangasawa ha iya kay ikaw amo an labi ka suok ko nga uropod. Kundi kinahanglan nga sumatan ta ikaw han kamatuoran, anak ko.

11Iginhatag ko na hiya ngadto hin pito nga kalalaken-an ngan kauropdan hira ngatanan. Namatay an tagsa ha ira hito ngahaw nga gab-i han pagkasal ha iya, ha pagsulod gud la niya han kwarto nga higdaan. Kundi yana, anak ko, kaon ngan inom. An Ginoo an maninimangno ha iyo.”

Binmaton hi Tobias, “Diri ako makaon o mainom tubtob nga pabation mo ako han imo pagtugot.”

12Tinmangdo hi Raguel. Nagsiring hiya, “Matugot ako. Ighahatag ko hiya ha imo sumala han sugo han Balaod ni Moises. An Dyos han langit an nag-andam hini nga pakasal, sanglit karawta hiya nga imo asawa. Tikang yana imo na hiya ngan ikaw iya na. Imo na hi Sara yana ngan ha kadayonan. Panalipdan unta kamo han Ginoo han langit basi waray mahitabo ha iyo nga duha niyan nga gab-i. Magmaloloy-on unta hiya ha iyo.”

Ginkasal hira Tobias ug Sara

13Niyan gintawag ni Raguel an iya anak nga babaye. Han pagsulod niya, kinaptan ni Raguel an kamot ni Sara ngan iginhatag hiya ngadto kan Tobias upod an iya pagbendisyon, “Karawata hiya nga imo asawa sumala han mga pagturon-an dida han Balaod ni Moises. Dad-a hiya hin waray kahadlok ug kabaraka ngadto han balay han imo amay. Tagan unta kamo han Dyos han langit hin malipayon nga kinabuhi han iyo pagkausa.”

14Ginhangyo ni Raguel an iya asawa nga dad-an hiya hin linikid nga susuraton basi igsurat niya an ginsabotan han pagkasal. Gindad-an hiya ni Edna han linikid nga susuratan, ngan iginsurat ni Raguel an ginsabotan, nga nasiring: iginhatag hi Sara ngadto kan Tobias sumala han mga pagturon-an dida han Balaod ni Moises.

15Katapos han seremonyas nangaon hira.

16Gintawag ni Raguel an iya asawa ngan ginsiring, “Andama an linain nga kwarto, mahal ko, ngan dad-a ngadto hi Sara.”

17Gin-andam ni Edna an kwarto sumala han siring ha iya ni Raguel. Niyan gindara niya hi Sara ngadto han kwarto, ngan nagtikang hin pagtangis hi Sara. Kundi ginpahiran ni Edna hi Sara han iya mga luha ngan ginsiring,

18“Ayaw kabaraka, Sara. Maaram ako nga yana paglilipayon ka han Ginoo han langit; diri ka pagbibidoon. Sanglit paglipay, mahal ko.” Katapos ginmawas han kwarto hi Edna.