1Han pakasabot ni Jonatan nga nakakaupay ha iya an mga nahinabo, nagpili hiya hin mga embahador ngan ginsugo hira ngadto ha Roma hin pagparig-on ngan pagbag-o hin pakisangkay han mga Romano.
2Nagpadara liwat hiya hin mga surat nga amo gihapon an mensahe ngadto ha Esparta ngan iba nga mga dapit.
3Kinmadto ha Roma an mga embahador, diin gintugotan hira hin pagsakob ngadto han ruwang han senado, ngan nagsumat hira nga ginsugo hira ni Jonatan, an Labaw nga Padi ngan han Judiyo nga nasod hin pagbag-o han una nga pakigsabot hin kalinaw ngan pakig-urosa han Roma.
4Gitagan hira han mga Romano hin mga surat ngadto han mga punoan didto han kada nasod nga ira aagian. Nakapatapod ini ha ira nga waray maglalabot ha ira pagbalik ngadto ha tuna han Judea.
5Iini in usa nga kopya han surat nga ginhatag ni Jonatan han mga taga-Esparta.
6“Tikang kan Jonatan, an Labaw nga Padi, han nasodnon nga konseho hin mga pangulo, han kapadian, ngan han iba pa nga mga tawo han Judea, ngadto han amon kabugtoan didto ha Esparta, damo nga mga pangumosta.
7Han una pa nga panahon nagpadara an iyo Hadi Arios hin usa nga surat ngadto han amon Labaw nga Padi nga hi Onias, diin igin-asoy nga magkauropod an aton duha nga mga nasod, sumala han iginpakita hini nga kopya.
8Ginkarawat ni Onias an iyo embahador upod in bug-os nga mga pagpasidungog ngan ginpasabot niya nga nakarawat an iyo surat, nga nagsumat han aton pagkaurosa ngan pagkasangkay.
9Ngan yana, bisan kon diri kami nagkikinahanglan hin sugad nga pagkaurosa, kay amon hin-agian an burabod han amon kusog dida han baraan nga mga basahan nga amon gintatag-iya,
10nagsurat kami hin pagbag-o han aton mga ginsabotan hin pakigburugto ngan pakigsarangkay ha iyo. Diri namon karuyag nga diri kamo kumilala ha amon, sugad man kami ha iyo, ngan damo na adto nga katuigan an linmabay tikang han kataposan niyo nga pagsurat ha amon.
11Ha ngatanan hini nga katuigan amon dayuday ginpahimulosan an tagsa nga higayon hin panumdom ha iyo kon naghahalad ngan nag-aampo kami ha pyesta nga mga adlaw ngan iba pa nga iglilihi nga mga adlaw, sugad nga angay ngan maupay ini nga buruhaton para hin magburugto.
12Nalilipay liwat kami nga nabantogan kamo.
13Kundi nagkamay-ada kami sunodsunod nga kasamokan ngan nakig-asdang kami hin damo nga mga araway, kay dayuday an pagsulonga ha amon han higrani nga kanasoran.
14Dida hini nga panahon hin araway, diri namon karuyag magsamok ha iyo o han amon iba nga mga kaurosa ngan kasangkayan,
15kay nabulig ha amon an Ginoo nga nagpirde han amon mga kaaway ngan nagtalwas ha amon.
16Sanglit amon ginpili hira Numenio nga anak ni Antioco, ug Antipater nga anak ni Jason, ngan ginsugo hira nga mga embahador ngadto ha Roma, hin pagbag-o han mga ginsabotan hin pakigsarangkay ngan pakig-urosa han mga Romano.
17Amon liwat hira ginsugo hin pagkadto ha iyo upod an amon damo nga mga pangumosta ngan pagduhol hini nga surat hiunong han pagbag-o han aton ginsabotan hin pagkamagburugto.
18Ngan yana naghahangyo kami nga baloson ini nga surat.
19“An masunod amo an kopya han nauna nga surat:
20“Tikang kan Hadi Arios han Esparta ngadto kan Onias, an Labaw nga Padi, damo nga mga pangumosta.
21Amon hin-agian in usa nga dokumento hiunong han mga taga-Esparta ngan han mga Judiyo. Nagpapahayag ini nga mag-uropod kita ngan tikang kan Abraham an aton duha nga nasod.
22Yana nga aton ini hintad-an, alayon pagsumat ha amon hiunong han iyo kahimtang.
23Ha pagbalos, amon kamo padadad-an hin usa nga surat nga nagpapahayag nga andam kami hin pagpaangbit ha iyo han amon mga katigayonan, lakip an kabakahan ngan mga hiagi, kon magbuhat liwat kamo hin sugad. Amon gintugon an amon mga embahador nga tagan kamo hin tukib nga sumat hiunong hini nga mga butang.’”
Nagmadaogon hira Jonatan ug Simon24Nahibaro hi Jonatan nga binmalik an mga opisyal ni Demetrio hin pagsulong ha iya upod in darudamo nga kasondalohan kay han una.
25Waray maruyag hi Jonatan hin paghatag ha ira hin higayon hin pagsulod han kalugaringon niya nga katunaan, sanglit binmaya hiya han Jerusalem ngan kinmadto hin pag-asdang ha ira didto han katunaan han Hamat.
26Nagsugo hi Jonatan hin mga espiya ngadto han kampo han kaaway, nga nagsumat ha iya nga gab-i an pagsulong han mga kaaway nga kasondalohan kontra han mga Judiyo.
27Han katunod han adlaw ginsugo ni Jonatan an ngatanan niya nga mga sondalo nga mag-ikmat hira ngan maandam an ira mga hinganiban para hin pakalas nga pagsulong ha bisan ano nga takna han kagab-ihon. Ginbutangan liwat niya hin mga gwardya palibot han kampo.
28Han paghibaro han kaaway nga mga sondalo nga andam na para ha pag-awayan hira Jonatan ngan han iya mga tawo, inalpan hira hin kalisang ngan nanmalagiw hira, ngan ginbayaan an ira mga tap-ong didto han kampo.
29Hinkit-an nira Jonatan ngan han iya mga tawo an mga tap-ong, kundi waray hira makasabot kon ano an nahinabo ngada han pagkaaga.
30Sanglit ginlanat hira ni Jonatan, kundi waray hira makaabot ha ira kay nakatabok na hira han Salog Eleutero.
31Niyan inmisol hi Jonatan ngan ginsulong niya in usa ka tribo hin mga Arabe nga gintawag nga mga Zabadeanhon. Iya ginpirde hira ngan gintikas an ira mga katigayonan.
32Niyan binmaya hira han kampo ngan kinmadto hira ha Damasco, ngan pinanginano niya an bug-os nga dapit nga ira gin-agian.
33Hito ngahaw nga panahon, ginmawas liwat hi Simon hin pagsulong ngan nakaabot hiya han Ascalon ngan han higrani nga mga salipdanan. Niyan linmiko hiya ngadto ha Jopa
34ngan nagbutang didto hin usa nga hugpo hin kasondalohan, kay hinbatian niya nga an mga tawo nakahunahuna hin paghatag han kota han Jopa ngadto han mga sondalo ni Demetrio.
35Han pagbalik ni Jonatan iya gintirok an konseho hin mga pangulo ngan nakahunahuna hiya upod ha ira hin pagtindog hin mga kota didto ha Judea,
36pagpahitaas han mga pader han Jerusalem, ngan pagtindog hin usa nga hitaas nga pader nga magbubulag han kota ngan han syudad. Tungod hini, mahibubulag an kota, nga diri gud an kaaway makakapalit ngan makakagbaligya hin bisan ano.
37Nagburublig an mga tawo hin pagtrabaho ha pagparig-on han mga kota han syudad kay narumpag an usa ka bahin han pader didto ha sinirangan ha ligid han Kahamub-an han Kidron ngan kinahanglan nga pag-aydon an didto ha Kafenata nga bahin han pader.
38Gintindog liwat ni Simon an bungto han Adida didto ha ubos han kapungtoran. Iya ginparig-on ini ngan ginhimoan an mga ganghaan nga may-ada trangka.
Ginbihag ni Trifo hi Jonatan39Niyan nakahunahuna hi Trifo hin pagsupil kan Hadi Antioco basi mahimo hiya nga hadi han Siria.
40Kundi nahadlok hiya nga bangin diri hi Jonatan umuyon hini nga iya nahunahunaan ngan makig-away lugod hiya kan Jonatan basi diri ini mahinayon. Sanglit gin-andam ni Trifo an iya kasondalohan ngan kinmadto hiya ha Betsar ha paglaom nga iya bibihagon ngan papatayon hi Jonatan.
41Kundi kinmadto liwat ha Betsar hi Jonatan upod in 40,000 nga hag-id ha pag-awayan nga mga sondalo.
42Han paghikit-i ni Trifo han kadamo han mga sondalo nga dara ni Jonatan, nahadlok hiya hin paggios.
43Sanglit ginkarawat lugod niya hi Jonatan upod an ngatanan nga mga pagpasidungog, nga ginpakilala hiya han ngatanan niya nga mga magsaragdon, gintagan hiya hin mga regalo, ngan ginsugo niya an iya mga magsaragdon ngan mga sondalo hin pagsugot kan Jonatan sugad han ira pagsugot ha iya.
44Ginpakianhan niya hi Jonatan, “Kay ano pa hin pagsinamoka nimo hini nga mga sondalo nga diri man naton biling in araway?
45Kay ano nga diri mo hira papangulion? Pagpili la hin pira nga mga tawo nga magpapabilin ha imo, ngan kahuman upod ha akon ngadto ha Tolemaida. Igtutubyan ko ha imo an syudad, pati an iba nga mga kota, mga kasondalohan, ngan an ngatanan nga mga opisyal. Katapos mabalik ako ngan mabaya. Ngani amo ini an hinungdan kay ano nga aanhi ako.”
46Tinmoo ha iya hi Jonatan, ngan ha pagsunod han iya iginsagdon iya ginpabalik an mga sondalo ngadto ha Judea.
47Nagdara la hiya hin 3,000 ka tawo, kundi iginbilin pa niya in 2,000 ha ira didto ha Galilea, sanglit 1,000 na la an inmupod ha iya ha paglakaton.
48Kundi han pagsulod ni Jonatan ha Tolemaida, gintrangkahan dayon han mga tawo han syudad an mga ganghaan, gindakop hiya, ngan pinamatay an ngatanan nga inmupod ha iya.
49Ginsugo ni Trifo an iya baktas nga kasondalohan ngan mga dikabayo nga mga sondalo ngadto ha Galilea ngan ha kahamub-an han Jezrael hin pamatay han iba nga mga sondalo ni Jonatan.
50Naghunahuna an Judiyo nga kasondalohan nga nabihag ngan ginpatay na hi Jonatan upod han mga inmupod ha iya, sanglit naggipadasigdasig hira ngan nagkagawas hin pakig-away.
51Han pakakita han tiabot nga kaaway nga kasondalohan nga andam hin pakig-away an mga Judiyo para han ira mga kinabuhi, inmisol hira.
52Niyan binmalik an Judiyo nga mga sondalo ngadto ha Judea hin waray may naglabot ha ira kundi nahadlok hira hin duro. Nagmabidoon gud an bug-os nga nasod, kay an ira hunahuna nga pinamatay na hira Jonatan ngan han ngatanan nga kaupod niya.
53Nagtinguha na hin pagbungkag ha ira an ngatanan nga higrani nga kanasoran. An ira hunahuna nga waray na mga pangulo o mga kaurosa an mga Judiyo, ngan inmabot na an igo nga panahon hin pagpuo ha ira ngan pagtapos han kasaysayan han ira nasod.
Who We AreWhat We EelieveWhat We Do
2025 by iamachristian.org,Inc All rights reserved.
