1 Cronicas 11 - Samarenyo Meaning-Based Bible (1984)（MBBSAM）

Hi David Nahimo nga Hadi han Israel ug Juda(2 Sam. 5:1-10)

1Ngan kinmadto kan David didto ha Hebron an ngatanan nga mga tawo han Israel ngan nagsiring ha iya, “Imo kami kalugaringon nga unod ug dugo.

2Han naglabay nga panahon, bisan han hadi pa namon ni Saul, nangulo ka na han mga tawo han Israel didto ha pag-awayan, nagsaad ha imo an Ginoo nga imo Dyos nga ikaw an magdudumara han iya mga tawo ngan magigin pangulo ka nira.”

3Sanglit kinmadto kan David didto ha Hebron an ngatanan nga mga pangulo han Israel. Nagsumpa hi David hin pakig-urosa ha ira, gindihogan hiya nira ngan nahimo hiya nga hadi han Israel, sumala han ginsaad han Ginoo pinaagi kan Samuel.

4Ginsulong ni Hadi David ug han ngatanan nga mga Israelita an syudad han Jerusalem. Jebus an ngaran hadto anay han syudad han Jerusalem ug an mga Jebuseohanon, an tunay nga mga umurokoy han tuna, didto pag-ukoy ha Jerusalem.

5Ginsiring hi David han mga Jebuseohanon nga diri gud hiya makakasulod han syudad kundi naagaw ni David an ira balwarte han Sion ngan kinilala na ini nga “Syudad ni David.”

6Nagsiring hi David, “An syahan nga tawo nga makamatay hin taga-Jebus mahihimo nga pangulo hin kasondalohan.” Hi Joab, an anak ni Seruia, amo an nag-una hin pagsulong ngan nahimo hiya nga pangulo hin kasondalohan.

7Tungod kay didto man hi David pag-ukoy ha balwarte, ginngaranan ini nga “Syudad ni David.”

8Gintindog na liwat niya an syudad. Didto hiya pagtikang han dapit nga gintak-opan hin tuna ha sinirangan nga dapit han pungtod ngan hi Joab na an nagtindog liwat han iba nga bahin han syudad.

9Nagtikakusog hi David tungod kay kaupod niya an Dyos nga Labi Kamakagarahum.

An Bantogan nga Sondalo ni David(2 Sam. 23:8-39)

10Amo ini an mga ngaran han bantogan nga mga sondalo ni David. Upod han iba nga mga tawo han Israel, hira an nakabulig nga mahimo hiya nga hadi sumala han saad han Ginoo ngan hira an nakapakusog han ginhadian.

11An syahan amo hi Jesbaam han banay ni Hecamoni ug hiya an pangulo han sinisiring “An Tutulo.” Nakig-away hiya pinaagi han iya bangkaw kontra hin 300 ka tawo ngan pinamatay niya ini ngatanan dida hin usa la nga pakig-away.

12An sunod dida han bantogan nga “Tutulo” amo hi Eleazar, anak ni Dodo nga sakop han banay ni Aho.

13Inmugop hiya kan David ngan nakig-away hiya kontra han mga Filisteohanon didto ha Pasdamim. Nakadto hiya ha uma hin mga sebada han pag-isol han mga Israelita,

14sanglit hiya ug an iya mga tawo ha butnga han iya uma nakig-away han mga Filisteohanon. Ginpadaog hira han Ginoo hito nga adlaw.

15Usa ka adlaw an tulo han mga 30 nga pangulo hin mga sondalo kinmadto han bato diin nakadto hi David harani han lungib han Odolam samtang nagkampo an mga Filisteohanon didto ha kahamub-an han Rafaim.

16Dida hini nga higayon nakadto hi David hin usa nga pinaderan nga pungtod ug may hugpo hin mga Filisteohanon nga nakarikopo han Betlehem.

17Inuhaw hi David ngan nagsiring, “Maupay unta kon may magdara ha akon hin tubig tikang han atabay ha ligid han ganghaan han Betlehem.”

18Nagpirit hin pagtalabok ha butnga han kampo han mga Filisteohanon an bantogan nga tulo nga mga sondalo, inmalog hira didto han atabay, ngan gindara ini ngadto kan David. Kundi waray hi David uminom; igin-ipis lugod ini niya nga iya halad ngadto han Ginoo,

19ngan nagsiring, “Diri ako makakainom hini! Masusugad ini hin pag-inom han dugo hini nga tulo ka tawo nga kon haros maunong an ira kinabuhi!” Sanglit dinmiri hiya hin pag-inom. Amo ini an maisog nga mga ginbuhat han tulo nga bantogan nga sondalo.

20Hi Abisai, an bugto ni Joab, amo an pangulo han “Bantogan nga Traynta.” Nakig-away hiya pinaagi han iya bangkaw kontra hin 300 nga mga tawo ngan pinamatay niya hira ngan nabantogan hiya dida han hugpo han “Bantogan nga Traynta.”

21Hiya an labi ka bantogan hini nga ira hugpo ngan nahimo hiya nga ira pangulo kundi diri hiya sugad ka bantogan han mga kaapi han “Tutulo.”

22Hi Benaias, anak ni Joyada nga taga-Cabseel usa liwat nga bantogan nga sondalo; damo an iya mga magkarit nga binuhatan upod in pagpatay niya hin duha nga mag-isog nga sondalo nga Moabita. Nakausa, dida hin mauran nga panahon, sinmulod hiya hin luong ngan nagpatay hin liyon.

23Nagpatay pa hiya hin higante nga Ehiptohanon nga nakakadara hin bangkaw. Ginbalbag ni Benaias an higante, gin-agaw an iya bangkaw, ngan ginpatay niya an higante pinaagi han iya naagaw nga bangkaw.

24Amo ini an maisog nga mga binuhatan ni Benaias, an usa han hugpo han “Traynta.”

25Bantogan hiya ha sakob han ira hugpo kundi diri hiya sugad ka bantogan han mga kaapi han hugpo han “Tutulo.” Iginbutang hiya ni David nga tinaporan han iya kalugaringon nga mga gwardya.

26-47Amo ini an iba nga mga bantogan nga mga sondalo:

hi Asahel, an bugto ni Joab

hi Elhanan, an anak ni Dodo nga taga-Betlehem

hi Samot nga taga-Aroti

hi Heles nga taga-Falon

hi Ira, an anak ni Asir nga taga-Tecoa

hi Abieser nga taga-Anatot

hi Sobocai nga taga-Husat

hi Ilai nga taga-Aho

hi Maharai nga taga-Netofa

hi Heled, an anak ni Baana nga taga-Netofa

hi Etai, an anak ni Ribai nga taga-Gabaa han Benjamin

hi Banaias nga taga-Faraton

hi Hurai nga taga kahamub-an han Gaas

hi Arbiel nga taga-Arbat

hi Asmot nga taga-Bauram

hi Eliaba nga taga-Salabon

hi Hasam nga taga-Ceson

hi Jonatan, an anak ni Sage nga taga-Arari

hi Ahiam, an anak ni Sacar nga taga-Arari

hi Elifal, an anak ni Ur

hi Hefer nga taga-Mecerat

hi Ahia nga taga-Felon

hi Hesro nga taga-Carmel

hi Naarai nga anak ni Asbai

hi Joel nga bugto ni Natan

hi Mibahar, an anak ni Agarai

hi Selec nga taga-Amon

hi Naarai nga taga-Berot ug amo an paradara han hinganiban ni Joab

hira Ira ug Gareb nga mga taga-Hetre

hi Urias nga taga-Heti

hi Sabad, an anak ni Oholi

hi Adina, an anak ni Sisa (usa nga pangulo nga sakop han banay ni Ruben, upod an iya kalugaringon nga hugpo hin 30 ka sondalo)

hi Hanan, an anak ni Maaca

hi Josafat nga taga-Matan

hi Ozias nga taga-Astarot

hira Sama ug Jehiel, an mga anak ni Jotam nga taga-Aror

hira Jediel ug Joa, an mga anak ni Samri nga taga-Tosa

hi Eliel nga taga-Mahumi

hira Jeribai ug Josaya, an mga anak ni Elnaem

hi Jetma nga taga-Moab

hira Eliel, Obed, ug Jasiel nga mga taga-Masobia