Sirac 24 - Samarenyo Meaning-Based Bible (1984)（MBBSAM）

Pagdayeg han Kinaadman

1Pamatii an Kinaadman! Ipinaparayaw niya an pag-awit han iya kalugaringon nga mga padayaw dida han mga Israelita, an iya kalugaringon nga mga tawo,

2dida han katig-oban han Gihahataasi, ha atubangan han iya gahom.

3“Ako an pulong nga ginyakan han Gihahataasi.

Ginluob ko an tuna sugad hin burong.

4Naghimo ako hin urokyan didto han Gihahataasi nga langit,

an akon trono ha bawbaw hin harigi nga dampog.

5Nag-uusaan ako hin paglibot han panganod

ngan pagtalabok ko han kadagatan ha ilarom han tuna.

6Naghadi ako han ngatanan nga tuna ug han mga balod han kadagatan,

han mga kanasuran, ug han ngatanan nga katawhan.

7Nagbiling ako ha bisan diin nga dapit in sadang ko pahuwayan,

usa nga dapit han kalibutan nga akon pag-uokyan.

8Niyan an akon Magburuhat nga naghimo han kalibutan,

nagsiring ha akon kon hain an akon urokyan.

Didto pag-ukoy ha Israel, nagsiring hiya,

‘An mga katulinan ni Jacob amo an imo katawhan.’

9Gintuha ako niya san-o magtikang an panahon,

ngan mabubuhi ako ha kadayonan.

10Nag-alagad ako ha iya didto han baraan nga Tulda

ngan didto ako pag-ukoy ha Bukid Sion.

11Ginpaukoy ako didto han iya hinigugma nga syudad,

ngan tinagan ako hin gahom hin pagdumara han Jerusalem.

12Ginmamot ako dida han akon ginpasidunggan nga mga tawo

nga ginpili han Ginoo nga iya bungto.

13Hinmitaas ako sugad han mga sidro ha Libano,

sugad han mga sipre didto ha bukid Hermon,

14sugad han mga kahoy nga palmera ha Engadi,

sugad han mga rosal ha Jerico,

sugad han matahom nga mga olibo ha kaumhan,

sugad han mga tinanom nga kahoy ha ligid han tubig.

15An akon ginhawa amo an alimyon han kanela,

han mahamot nga agwa ug an labi ka pinili nga mira,

han estatira, onika ug galbano

han mahamot nga insyenso didto han baraan nga Tulda.

16Sugad han tuog nga kahoy magrabong an akon mga sanga,

makatarag-ob ngan makawiwili pagkit-on.

17Sugad hin balagon nga ubas, ginpaturok ko in mag-anyag nga mga tumos,

an akon mga bukad naghatag hin damo ug marasa nga mga bunga.

19Pakadi kamo adton nagkikinahanglan ha akon,

ngan pagpatakas hin pagkaon han akon mga bunga.

20Manunumdom kamo ha akon nga labi kamatam-is kay han dugos,

han dugos nga tikang han balay han putyokan.

21Adton makaon ha akon diri na gugutumon,

adton mainom ha akon diri na uuhawon.

22Adton masugot ha akon diri na maaawod,

adton magtuman han akon sugo matatalwas han ira mga sala.”

An Kinaadman ug An Balaod

23An Kinaadman amo an Balaod, an Balaod nga ginsugo ha aton ni Moises hin pagtipig, an Ginsaaran han Gihahataasi nga Dyos, an malon han mga sinagoga han Israel.

25An Balaod nagsasalwak han Kinaadman sugad han Salog Pison, sugad han Tigris ha panahon hin panguha han mga bunga.

26An Balaod nagsasalwak han sarabotan sugad han Eufrates, sugad han Jordan ha panahon nga kat-ani.

27Masilaw ini han pagturon-an sugad han Nilo, sugad han Gihon ha panahon hin panguha hin mga ubas.

28An syahan nga tawo nga gintuha waray kumilala hin hingpit han Kinaadman ngan an kataposan nga tawo dinhe ha tuna diri man liwat makakahimo hin pakatugkad han Kinaadman,

29kay an Kinaadman labi pa hin kahiluag han kadagatan ug an iya mga sagdon labi ka hin kahilarom kay han kahiladman ha ilarom han tuna.

30Mahitungod ha akon sugad la ako hin kanal nga inaawasan han tubig tikang ha salog ngadto ha tanaman.

31An akon la tuyo amo an pagtubig han akon gintamnan hin mga nabunga nga kahoy ug han akon tanaman hin mga bukad, kundi ini nga kanal nahimo nga salog, ug an salog nahimo nga dagat.

32Sanglit ipinapakita ko an akon hibaro, hinihitaas ko hin pagpakita basi an iya kapawa hikit-an ha bisan diin nga dapit sugad han pagsirang han adlaw.

33Sugad hin gindasig nga manaragna, ginpapagawas ko an akon pagturon-an basi pagpahimulosan han tiarabot nga mga katulinan.

34Kundi hibaroi niyo nga waray ko pagtumana ini ngatanan nga makuri nga buhat para la ha akon kalugaringon kundi basi ako makabulig hadton karuyag makaangkon hin kinaadman.