1Hi David nga anak ni Isai amo an tawo nga ginhimo han Dyos nga gamhanan, nga ginpili nga hadi han Dyos ni Jacob, ngan amo an tagsurat hin makawiwili nga mga karantahon para han Israel. Amo ini an kataposan nga mga pulong ni David:
2Naghihimangraw pinaagi ha akon an Espiritu han Ginoo;
aanhi han akon mga im-im an iya mensahe.
3Naghimangraw an Dyos han Israel;
nagsiring ha akon an mananalipod han Israel:
“An hadi nga naghahadi hin matadong,
nga naghahadi hin matinahoron han Dyos,
4sugad han adlaw nga nasirang dida hin waray dampog nga kaagahon,
han adlaw nga nagpaturok han kabanwaan katapos hin uran.”
5Ngan amo ini an pagpakaupay han Dyos han akon katulinan,
kay ginhimo niya ha akon in dayon nga ginsabotan,
ginsabotan nga diri mabubungkag,
saad nga diri gud maliliwat.
Amo gud la ini an akon gin-uungara,
amo ini an akon pagdarag-an,
ngan tutumanon manta ini han Dyos.
6Kundi sugad la hin mga tunok nga waray gamit
an diri nakilala hin Dyos nga mga tawo.
Kinahanglan nga hinapinan an kamot kon makapot ha ira.
7Kinahanglan puthaw an imo garamiton o bangkaw,
tinuod gud an ira kaugtang ha kalayo.An Bantogan nga mga Sondalo ni David(1 Cron. 11:10-41)
8Amo ini an mga ngaran han bantogan nga mga sondalo ni David: an syahan amo hi Isboset nga taga-Hacmon, nga pangulo han “An Tutulo”; nakig-away hiya pinaagi han iya bangkaw kontra hin 800 nga mga tawo ngan pinamatay niya ngatanan dida hin usa la nga pakig-away.
9An ikaduha han bantogan nga kaapi han tutulo amo hi Eleazar nga anak ni Dodo nga sakop han banay ni Aho. Usa ka adlaw gin-ayat niya ngan hi David an mga Filisteohanon nga nagkatirok para hin araway. Inmisol an mga Israelita
10kundi nagpadayon hiya pakig-away kontra han mga Filisteohanon tubtob han pagbikogi han iya kamot nga waray na niya kabuhii an iya espada. Hito nga adlaw nagdaog an Ginoo hin dako nga pagdarag-an. Han kahuman na han araway, binmalik an mga Israelita ngadto han hinmumutangan ni Eleazar ngan ira pinanguhaan han mga hinganiban an mga patay.
11An ikatulo han bantogan nga kaapi han tutulo amo hi Sama nga anak ni Age nga taga-Arar. Nagkatirok didto ha Lehi an mga Filisteohanon diin may uma hin balatong didto. Nangalagiw an mga Israelita tikang han mga Filisteohanon,
12kundi tinindogan hin madig-on ni Sama an uma, iya ini ginpanalipdan, ngan pinamatay an mga Filisteohanon. Hito nga adlaw nagdaog hin dako nga pagdarag-an an Ginoo.
13Han harapit na magtikang an kat-ani, linmugsong in tulo han “An Traynta” ngadto han Lungib han Adulam, diin nakadto hi David, samtang nagkampo didto han Kahamub-an han Repaim in hugpo hin mga Filisteohanon.
14Hito nga panahon nakadto hi David hin usa nga pungtod nga pinaderan, ngan narikopohan an Betlehem hin hugpo hin mga Filisteohanon.
15Nahidlaw hi David ngan nagsiring, “Maupay unta kon may magdara ha akon in tubig tikang han atabay ha ligid han ganghaan han Betlehem.”
16Nagpirit hin pagtalabok ha butnga han kampo han mga Filisteohanon an bantogan nga tulo nga mga sondalo, inmalog hira didto han atabay ngan gindara ini ngadto kan David. Kundi waray hiya uminom; igin-ipis lugod ini niya nga iya halad ngadto han Ginoo,
17ngan nagsiring, “O Ginoo, diri ako makakainom hini! Masusugad ini hin pag-inom han dugo hini nga tulo ka tawo nga kon haros maunong an ira kinabuhi!” Sanglit dinmiri hiya hin pag-inom.
Amo ini an maisog nga mga ginbuhat han tulo nga bantogan nga sondalo.
18Hi Abisai nga bugto ni Joab amo an pangulo han “An Bantogan nga Traynta.” Nakig-away hiya pinaagi han iya bangkaw kontra hin 300 nga mga tawo ngan pinamatay niya hira, ngan nabantogan hiya dida han “An Traynta.”
19Hiya an labi kabantogan han “An Traynta,” ngan nahimo nga ira pangulo, kundi diri hiya sugad kabantogan han “An Tutulo.”
20Bantogan liwat nga sondalo hi Benaias, nga anak ni Joyada nga taga-Cabseel; damo an iya magkarit nga mga binuhatan, upod in pagpatay niya hin duha nga mag-isog nga mga sondalo nga Moabita. Nakausa hiya dida hin mauran nga panahon sinmulod hin luong ngan nagpatay hiya hin liyon.
21Nagpatay liwat hiya hin higante nga Ehiptohanon nga nakakadara hin bangkaw. Ginbalbag ni Benaias an higante, gin-agaw an iya bangkaw, ngan ginpatay niya an higante pinaagi han iya naagaw nga bangkaw.
22Amo ini an maisog nga mga binuhatan ni Benaias, an usa han hugpo han “An Traynta.”
23Bantogan hiya ha sakob han ira hugpo, kundi diri hiya sugad ka bantogan han mga kaapi han hugpo han “An Tutulo.” Iginbutang hiya ni David nga tinaporan han iya kalugaringon nga mga gwardya.
24-39An iba nga mga kaapi han “An Traynta” amo hira:
Asahel, an bugto ni Joab
Elhanan, an anak ni Dodo nga taga-Betlehem
Samot ug Elica nga taga-Aroti
Heles nga taga-Falon
Ira nga anak ni Asir nga taga-Tecoa
Abiezer nga taga-Anatot
Sabocai nga taga-Husat
Ilai nga taga-Aho
Maharai nga taga-Netofa
Heled nga anak ni Baana nga taga-Netofa
Etai nga anak ni Ribai nga taga-Gabaa han Benjamin
Benaias nga taga-Faraton
Hurai nga tikang han mga kahamub-an han Gaas
Arbiel nga taga-Arbat
Asmot nga taga-Bauram
Eliaba nga taga-Salabon
Jonatan an mga anak ni Jasen
Sama nga taga-Arari
Ahiam nga anak ni Sacar nga taga-Arari
Elifal nga anak ni Ahasbai nga taga-Maaca
Eliam nga anak ni Ahitofel nga taga-Gilo
Hesro nga taga-Carmelo
Paarai nga taga-Arabia
Igal nga anak ni Natan nga taga-Soba
Bani nga taga-Gad
Selec nga taga-Amon
Naharai nga taga-Berot (amo hiya an paradara han hinganiban ni Joab nga anak ni Seruia)
Ira ug Gareb nga taga-Hetre
Urias nga Hiteohanon.
Traynta syete hira ngatanan nga bantogan nga mga sondalo.
Who We AreWhat We EelieveWhat We Do
2025 by iamachristian.org,Inc All rights reserved.
