1Han paghibaro la ni Mardoqueo han ngatanan nga ginbuhat, ginggisi niya an iya panapton tungod hin kabido. Niyan nagbado hiya hin sako, ginbutangan niya hin agbon an iya ulo, ngan naglinakat hiya ha sakob han syudad, nga nagngunguyngoy ha dako nga tingog, “Usa nga nasod nga waray sala ginpupukan.”
2Han pag-abot niya han aragian han palasyo inmukoy hiya. Waray hiya sumulod kay diri tinutugotan ha sakob an may bado nga sako ngan may agbon ha ulo.
3Didto han ngatanan nga mga lalawigan, diin iginpahibaro an kanan hadi pasangyaw, nagmasulob-on gayod an mga Judiyo. Nagtangis hira, nagnguyngoy, ngan kadam-an ha ira in nagbado hin sako ngan nanhigda ha mga agbon.
4Han pagsumati kan Ester han iya mga surugoon nga kababayen-an ngan mga yunuko han ginbuhat ni Mardoqueo, naguol gud hiya. Ginpadad-an niya hi Mardoqueo hin mga panapton nga iya igsusul-ot liwat han bado nga sako, kundi waray niya karawata.
5Niyan gintawag niya hi Hatac, usa han mga yunuko han palasyo nga gintudlok han hadi nga surugoon ni Ester, ngan ginpakadto hiya kan Mardoqueo pagpausisa kon ano an nahinanabo. (
6Kinmadto kan Mardoqueo hi Hatac didto han plasa han syudad dida han aragian han palasyo.)
7Ginsumatan hiya ni Mardoqueo han ngatanan nga nahinabo ngan han pagsaad ni Aman nga mabutang hiya hin 375,000 ka kilo nga salapi didto han hiriposan hin mga manggad han hadi kon pamatayon an ngatanan nga mga Judiyo.
8Gintagan niya hi Hatac hin kopya han pasangyaw nga iginpagawas didto ha Susa, nga nagsusugo hin pagpuo han mga Judiyo. Ginhangyo ni Mardoqueo nga dad-on ini niya ngadto kan Ester, pagsaysayan hiya han kahimtang, ngan pakadtoon hiya hin paghangyo han hadi nga kalooyan han hadi an iya mga tawo. Nagsiring hiya, “Sumati hiya hin panumdom han mga adlaw nga diri pa hiya rayna, nga nakada pa hiya ha ubos han akon pagdumara. Tungod kay hi Aman, an primero ministro nagyakan supak ha aton ngan karuyag niya nga pamatayon kita, kinahanglan mag-ampo hiya han Ginoo ngan makighimangraw hiya han hadi mahitungod ha aton. Kinahanglan talwason kami ha kamatayon.”
9Ginbuhat ini ni Hatac,
10ngan gintagan hiya ni Ester hini nga mensahe nga dadad-on niya ngadto kan Mardoqueo:
11“Kon may bisan hin-o nga lalake o babaye, nga kumadto ha sakob nga bungsaran han palasyo ngan makigkita han hadi nga waray hiya pagtawga, kinahanglan patayon ito nga tawo. Maaram an ngatanan nga amo ini an sugo. Dida la kon iduhol han hadi an iya bulawan nga baston ngadto han tawo, mahigagawas hiya han kamatayon. Kundi usa na ka bulan tikang ako ipatawag han hadi.”
12Han pakakarawat ni Mardoqueo han tugon ni Ester,
13iya ginpadad-an hiya hini nga mahimatngon: “Ayaw paghunahuna nga diri makulba iton imo kinabuhi kay han iba nga mga Judiyo tungod la nga ada ka han hadianon nga palasyo.
14Kon humilom ka la dida hin sugad hini nga panahon, bubuligan gihapon an mga Judiyo ha lain nga paagi ngan matatalwas hira, kundi mapatay ka ngan mapupuo an banay han imo amay. Kundi hin-o ngani in maaram—bangin ginhimo ka nga rayna para hin sugad hini nga panahon!”
15Ginpadad-an ni Ester hi Mardoqueo hini nga baton:
16“Kadto na ngan tiroka an ngatanan nga mga Judiyo didto ha Susa; pagpuasa ngan pag-ampo kamo para ha akon. Ayaw kamo pagkaon o pag-inom hin bisan ano sulod hin tulo ka adlaw ngan tulo ka gab-i. Bubuhaton man ini nakon ngan han akon mga surugoon nga kababayen-an. Katapos hini, mapakadto ako han hadi bisan supak ini han balaod. Kon kinahanglan ako mamatay tungod hin pagbuhat hini, magpapakamatay ako.”
17Sanglit linmakat hi Mardoqueo ngan gintuman niya an ngatanan nga iginpabuhat ha iya ni Ester.
Who We AreWhat We EelieveWhat We Do
2025 by iamachristian.org,Inc All rights reserved.
